Sanju Samson: झिम्बाब्वे दौऱ्यातून बाहेर राहिल्यानंतर आता धडाकेबाज फलंदाज संजू सॅमसनने अफगाणिस्तानविरुद्धच्या आगामी टी-२० मालिकेसाठी भारतीय संघात पुनरागमन केलं आहे. याच वर्षाच्या सुरुवातीला मिळवलेल्या टी-२० विश्वचषक विजयानंतर भारतीय संघ व्यवस्थापन सतत नवनवीन खेळाडूंना आजमावत असून, विशेषतः सलामीच्या जोडीत अनेक प्रयोग केले जात आहेत. अशातच, आगामी मालिकेत संजू सॅमसनसोबत युवा शिलेदार वैभव सूर्यवंशी सलामीला उतरण्याची दाट शक्यता निर्माण झाली आहे.
आयपीएलमधील दमदार कामगिरीनंतर वैभव सूर्यवंशीला थेट सीनिअर संघात एन्ट्री मिळाली असून, त्याने अभिषेक शर्मासोबत सलामीला येऊन आपली चमकही दाखवली आहे. दुसरीकडे, विश्वचषकातील चमकदार कामगिरीनंतर काही सामन्यांमध्ये सातत्य न राखल्याने संजूला आपली जागा गमवावी लागली होती. पण आता अफगाणिस्तानविरुद्धच्या या मालिकेतून त्याला पुन्हा फॉर्ममध्ये येण्याची मोठी संधी चालून आली आहे. सूत्रांनी दिलेल्या माहितीनुसार, भारतीय संघ अद्यापही एका भक्कम आणि कायमस्वरूपी सलामीच्या जोडीच्या शोधात आहे.
Sanju Samson & Vaibhav Sooryavanshi अफगाणिस्तानविरुद्ध ओपनिंग जोडी
संघात संजू परतल्यामुळे आता सलामीला नेमके कोण उतरणार, याची चर्चा क्रिकेट वर्तुळात चांगलीच रंगली आहे. भारताचे माजी यष्टीरक्षक दीप दासगुप्ता यांनी यावर एक अतिशय वेगळा आणि महत्त्वाचा सल्ला दिला आहे. त्यांच्या मते, संघ व्यवस्थापनाने आता संजू सॅमसन आणि वैभव सूर्यवंशी या नव्या जोडीला सलामीला उतरवण्याचा प्रयोग करून पाहायला हवा. या दोघांनी अद्याप भारतासाठी एकत्र ओपनिंग केलेली नाही, त्यामुळे हा प्रयोग नक्कीच फायदेशीर ठरू शकतो.
आपल्या युट्यूब चॅनेलवर बोलताना दासगुप्ता यांनी स्पष्ट केलं की, “इंग्लंडविरुद्धच्या शेवटच्या सामन्यात संजू आणि अभिषेकने ओपनिंग केली होती. आत्तापर्यंत आपण अभिषेक-वैभव आणि अभिषेक-संजू अशा जोड्या पाहिल्या आहेत. त्यामुळे आता संजू आणि वैभव ही जोडी एकत्र कशी कामगिरी करते, हे पाहणे नक्कीच एक चांगला पर्याय ठरू शकतो.”
दुसरीकडे, वैभव सूर्यवंशीने झिम्बाब्वेविरुद्धच्या मालिकेत तीन डावांमध्ये सर्वाधिक १५१ धावा कुटत आपणच या जागेसाठी योग्य असल्याचा भक्कम दावा केला आहे. त्याने ५०.३३ च्या सरासरीने आणि १९६.१० च्या तडाखेबंद स्ट्राईक रेटने धावा करत ‘प्लेअर ऑफ द सिरीज’चा किताबही पटकावला. श्रेयस अय्यरकडे नव्याने सोपवण्यात आलेल्या नेतृत्वाखाली भारताने हा पहिलाच मालिका विजय मिळवला होता. थोडक्यात सांगायचं तर, कोणालाही संघातून वगळावं असं दासगुप्तांचं म्हणणं नाही, तर आगामी मोठ्या स्पर्धांपूर्वी सर्व पर्यायांची आणि कॉम्बिनेशन्सची योग्य ती चाचपणी व्हावी, अशी त्यांची मुख्य भूमिका आहे.
📌 महत्वाच्या बातम्या
- रोहित शर्माच्या निवृत्तीवर बीसीसीआयने सोडले मौन! म्हणाले, ‘तुम्हाला आणखी काय हवंय?’
- स्मृती मानधनाचा आशिया चषकात झंझावात! एकाच झटक्यात मोडले २ मोठे जागतिक विक्रम
- जरांगे पाटलांची मंत्र्यांसमोर प्रश्नांची सरबत्ती! कुणबी प्रमाणपत्रातील अडचणींवरून सरकारला थेट सवाल
