उपोषण संपलं, पण आंदोलन नाही! अभिजीत दिपके आपल्या भूमिकेवर ठाम

सोनम वांगचूक यांनी 26 दिवसांचे उपोषण संपवल्यानंतर अभिजीत दिपके यांनी धर्मेंद्र प्रधान यांच्या राजीनाम्यापर्यंत CJP चे आंदोलन सुरूच राहणार असल्याची स्पष्ट भूमिका मांडली.

by Diksha

Published On:

जुलै 24, 2026 9:28 AM

दिल्ली : ‘कॉकरोच जनता पार्टी’ (CJP)च्या नेतृत्वाखालील आंदोलनामुळे राजकीय हालचालींना वेग आला आहे. तरुणांच्या नेतृत्वाखालील या आंदोलनाची मोदी सरकारही (Modi Government) गांभीर्याने दखल घेत असल्याचे दिसून येते. या आंदोलनादरम्यान नवी दिल्लीत रात्री उशिरा महत्त्वपूर्ण राजकीय घडामोडी घडल्या. केंद्रीय मंत्र्यांच्या उपस्थितीत सोनम वांगचुक (Sonam Wangchuk) यांनी मेदांता रुग्णालयात आपले २६ दिवसांचे उपोषण मागे घेतले. त्यानंतर, अभिजीत दीपके (Abhijit Dipke) यांनी पक्षाची भूमिका स्पष्ट केली की, वांगचुक यांनी उपोषण सोडले असले तरी आंदोलन सुरूच राहील.

दीपके यांनी ‘एक्स’ (X) वरील एका पोस्टद्वारे आपली भूमिका स्पष्ट केली की, कॉकरोच जनता पार्टीचे आंदोलन शांततापूर्ण मार्गाने सुरू राहील. केंद्रीय शिक्षण मंत्र्यांनी राजीनामा देईपर्यंत हे आंदोलन चालूच राहील, असा ठाम निर्धार त्यांनी व्यक्त केला. त्यामुळे, वांगचुक यांचे उपोषण संपल्यानंतरही पक्षाचे आंदोलन सुरूच राहणार हे स्पष्ट आहे. (Abhijit Dipke on Sonam Wangchuk Hunger Strike)

कॉकरोच जनता पार्टीने २० जून रोजी जंतरमंतर येथे आपले आंदोलन सुरू केले होते. केंद्रीय शिक्षण मंत्री धर्मेंद्र प्रधान यांच्या राजीनाम्याची मागणी CJP करत आहे. महिनाभर चाललेल्या या आंदोलनादरम्यान पक्षाचे कार्यकर्ते अधिक आक्रमक झाले होते आणि याच काळात सोनम वांगचुक यांनी उपोषण सुरू केले होते. उपोषण सुरू केल्यानंतर वांगचुक यांनी आपली भूमिका ठाम ठेवली होती. आंदोलनादरम्यान दिल्ली पोलिसांनी त्यांना बळजबरीने रुग्णालयात दाखल केले होते. त्यांना रुग्णालयात दाखल केल्यानंतर अभिजीत दीपके यांनीही उपोषणाची घोषणा केली होती, परंतु वांगचुक यांच्या विनंतीवरून त्यांनी काही दिवसांतच ते मागे घेतले.

दरम्यान, वांगचुक यांनी रुग्णालयातूनही आपले उपोषण सुरूच ठेवले, ज्यामुळे त्यांचे वजन मोठ्या प्रमाणात घटले. त्यांचे उपोषण वैद्यकीय देखरेखीखाली सुरू होते. मात्र, आंदोलन अधिक तीव्र होत असताना केंद्रीय मंत्री जे.पी. नड्डा यांनी (JP. Nadda) वांगचुक यांची भेट घेतली. त्यानंतर, आज रात्री उशिरा केंद्रीय मंत्री जे.पी. नड्डा आणि जितेंद्र सिंह (Jitendra Singh) यांच्या उपस्थितीत सोनम वांगचुक यांनी आपले उपोषण मागे घेतले.