‘पुरावे अपुरे’ म्हणत न्यायालयाचा निर्णय; पवनराजे निंबाळकर केसचा निकाल जाहीर

पवनराजे निंबाळकर हत्याकांड प्रकरणात अंतिम निकाल लागला आहे. पद्मसिंग पाटलांसह सर्व आरोपींची न्यायालयाकडून निर्दोष मुक्तता करण्यात आली आहे. या निर्णयामुळे खासदार ओमराजे निंबाळकर आणि निंबाळकर कुटुंबाला मोठा कायदेशीर धक्का बसला आहे.

by Diksha_Chichghare

Published On:

जून 20, 2026 1:59 PM

🕒 1 min read

मुंबई : बहुचर्चित पवनराजे निंबाळकर (Pawanraje Nimbalkar) हत्याकांड प्रकरणात अखेर न्यायालयाने निकाल जाहीर केला आहे. माजी मंत्री पद्मसिंग पाटील (Padamsinh Patil) यांच्यासह सर्व आरोपींची न्यायालयाने निर्दोष मुक्तता केली आहे. पुरावे आणि साक्षीदारांच्या आधारे आरोप सिद्ध करण्यात यश न आल्याने न्यायालयाने हा निर्णय दिला. हा निकाल खासदार ओमराजे निंबाळकर आणि निंबाळकर कुटुंबासाठी मोठा कायदेशीर धक्का मानला जात आहे.

नवी मुंबईतील कळंबोली येथे 2006 मध्ये काँग्रेस नेते पवनराजे निंबाळकर आणि त्यांचे चालक समद खान यांची गोळ्या झाडून हत्या करण्यात आली होती. या प्रकरणाचा तपास सीबीआयकडे सोपवण्यात आला होता.

या हत्याकांडात पद्मसिंग पाटील यांच्यासह काही जणांवर कट रचल्याचा आरोप करण्यात आला होता. मात्र, सुनावणीदरम्यान आरोप सिद्ध करण्यासाठी आवश्यक ठोस पुरावे सादर करण्यात तपास यंत्रणेला अपयश आल्याचे न्यायालयाने नमूद केले. निकालानंतर पद्मसिंग पाटील यांच्यासह सर्व आरोपींना दिलासा मिळाला असून, या बहुचर्चित प्रकरणाचा न्यायालयीन प्रवास अखेर संपला आहे.

दरम्यान, या निकालामुळे खासदार ओमराजे निंबाळकर (Omraje Nimbalkar) आणि निंबाळकर कुटुंबासाठी हा मोठा कायदेशीर धक्का मानला जात आहे. पवनराजे निंबाळकर यांच्या हत्येप्रकरणी न्याय मिळण्याच्या अपेक्षेने सुरू असलेल्या दीर्घ न्यायालयीन लढाईनंतर आलेल्या या निर्णयामुळे निंबाळकर कुटुंबाच्या भूमिकेकडे आता सर्वांचे लक्ष लागले आहे.

पवनराजे निंबाळकर हत्याकांड प्रकरण काय होतं?

पवनराजे निंबाळकर हे महाराष्ट्रातील काँग्रेसचे ज्येष्ठ नेते होते. त्यांची 3 जून 2006 रोजी नवी मुंबईतील कळंबोली परिसरात गोळ्या झाडून हत्या करण्यात आली होती. त्यांच्या ड्रायव्हर समद काझी यांचाही या हल्ल्यात मृत्यू झाला. या हत्येमागे राजकीय कटकारस्थान असल्याचा आरोप करण्यात आला. सीबीआयच्या तपासानुसार हा एक सुपारी देऊन केलेला करारबद्ध खून असल्याचा संशय होता. या प्रकरणात अनेक राजकीय व्यक्तींवर आरोप झाले, त्यात माजी मंत्री पद्मसिंह पाटील यांचाही समावेश होता. सुमारे 9 आरोपींवर खटला चालला आणि प्रकरण सीबीआय न्यायालयात गेलं.

सुरुवातीला राज्य पोलिसांनी तपास केला, नंतर तो CBI कडे सोपवण्यात आला. एक माफीचा साक्षीदार देखील या खटल्यात महत्त्वाचा ठरला.
खटला अधिक काळ चालला असून 2026 मध्ये या प्रकरणाचा अंतिम निकाल जाहीर झाला.