🕒 1 min read
नाशिक : महाराष्ट्राच्या राजकारणात सध्या पक्षांतराच्या चर्चांना वेग आला असून शिवसेना (Shivsena) (उद्धव बाळासाहेब ठाकरे) पक्षाला सातत्याने धक्के बसत असल्याचे चित्र आहे. काही दिवसांपूर्वी सहा खासदारांनी उपमुख्यमंत्री एकनाथ शिंदे (Eknath Shinde) यांच्या नेतृत्वाखालील शिवसेनेत प्रवेश केला. त्यानंतर विधान परिषदेचे आमदार सचिन अहिर (Sachin Ahir) यांनीही शिंदे गटाची वाट धरली. या पार्श्वभूमीवर आता नाशिक महानगरपालिकेतील ठाकरे गटातील (Thackeray Gat) 10 ते 12 नगरसेवक शिंदे गटात (Shinde Gat) जाणार असल्याच्या चर्चांनी राजकीय वर्तुळात खळबळ उडवली आहे. या चर्चांनंतर ठाकरे गटाने तातडीची बैठक घेत पत्रकार परिषद आयोजित केली आणि पक्षातील फुटीच्या चर्चांवर आपली भूमिका स्पष्ट केली.
केशव पोरजेंची स्पष्ट भूमिका
नाशिक महानगरपालिकेतील ठाकरे गटाच्या गटनेता कार्यालयात नगरसेवकांची बैठक पार पडली. त्यानंतर पत्रकार परिषदेत (Press Conference) बोलताना गटनेते केशव पोरजे (Keshav Porje) यांनी पक्षातील कोणताही नगरसेवक फुटणार नसल्याचा ठाम दावा केला. ते म्हणाले की, “काल आम्ही मनपा आयुक्तांना निवेदन देण्यासाठी गेलो होतो. त्यावेळी आमचे 13 नगरसेवक उपस्थित होते. त्यामुळे नगरसेवक पक्ष सोडत असल्याच्या बातम्या पूर्णपणे अफवा आहेत. आमच्यात संशय निर्माण करण्याचा हा प्रयत्न आहे.”
‘5 कोटींची ऑफर’चा गंभीर आरोप
केशव पोरजे यांनी पत्रकार परिषदेत अत्यंत गंभीर आरोप करत सांगितले की, काही व्यक्तींमार्फत नगरसेवकांशी संपर्क साधला जात आहे. त्यांच्या म्हणण्यानुसार, “आमच्याकडे एजंट पाठवले जात आहेत. काही नगरसेवकांना विकासकामांसाठी निधीच्या नावाखाली तब्बल 5 कोटी रुपयांची ऑफर देण्यात आली आहे. आतापर्यंत पाच ते सहा नगरसेवकांशी संपर्क साधण्यात आल्याची माहिती आमच्याकडे आहे.” या आरोपामुळे नाशिकच्या राजकारणात नव्या चर्चांना सुरुवात झाली आहे.
निधी न मिळाल्याचीही तक्रार
पोरजे यांनी महापालिका प्रशासनावरही नाराजी व्यक्त केली. ते म्हणाले की, विरोधी पक्षातील नगरसेवकांना विकासकामांसाठी पुरेसा निधी दिला जात नाही. अधिकाऱ्यांकडूनही अपेक्षित सहकार्य मिळत नसल्याचा आरोप त्यांनी केला. त्यांच्या मते, नगरसेवकांना विकासकामांसाठी अडचणीत आणून त्यांना पक्षांतरासाठी प्रवृत्त करण्याचा प्रयत्न होत आहे.
‘जे जातील त्यांना जनता माफ करणार नाही’
नगरसेवकांच्या संभाव्य पक्षांतरावर बोलताना पोरजे यांनी इशाराही दिला. ते म्हणाले, “जे नगरसेवक पक्ष सोडून जातील, त्यांना जनता कधीच माफ करणार नाही. दोन-चार नगरसेवक घेऊन गेल्यास ते अपात्र ठरू शकतात. लोकशाहीचा विश्वासघात करणाऱ्यांना मतदार योग्य उत्तर देतील.”
दरम्यान, सूत्रांच्या माहितीनुसार ठाकरे गटातील 10 ते 12 नगरसेवक शिंदे गटाच्या संपर्कात असल्याची चर्चा सुरू आहे. मात्र पत्रकार परिषदेत 15 पैकी केवळ 5 नगरसेवक उपस्थित असल्याने या चर्चांना आणखी बळ मिळाले आहे. यामुळे नाशिकमधील शिवसेनेच्या राजकारणात पुढील काही दिवसांत मोठ्या घडामोडी होण्याची शक्यता व्यक्त केली जात आहे.
📌 महत्वाच्या बातम्या
- Nida Khan : गर्भवती असल्याने जामीन; सुनावणीदरम्यान कोर्टाने भगवान श्रीकृष्णाच्या जन्माचा केला उल्लेख
- फनेल झोनमधील पुनर्विकासाला मिळणार वेग! मुख्यमंत्री फडणवीसांचे महत्त्वाचे निर्देश
- ’लोकराज्य’मध्ये बाबासाहेबांचा अपमान; डॉ. नितीन राऊत आक्रमक, मुख्यमंत्र्यांकडून २४ तासांत कारवाईचे आश्वासन
बातम्यांसाठी YouTube चॅनेल Subscribe करा
Subscribe Now
