🕒 1 min read
मुंबई : राज्याच्या राजकारणात गेल्या काही दिवसांपासून वेगवान घडामोडी घडत असून विविध राजकीय समीकरणांबाबत तर्क-वितर्कांना उधाण आले आहे. सध्या राज्य विधिमंडळाचे पावसाळी अधिवेशन सुरू असल्यामुळे मुख्यमंत्री, उपमुख्यमंत्री, मंत्री आणि सर्व प्रमुख पक्षांचे नेते मुंबईत उपस्थित आहेत. अशा वातावरणात आज उपमुख्यमंत्री एकनाथ शिंदे (Eknath Shinde) यांनी अचानक राष्ट्रवादी काँग्रेस (शरद पवार गट) प्रमुख शरद पवार (Sharad Pawar) यांची विधान भवन परिसरात भेट घेतल्याने राजकीय वर्तुळात मोठी चर्चा सुरू झाली आहे.
कॅबिनेट बैठक सोडून घेतली भेट
आज राज्य मंत्रिमंडळाची महत्त्वाची बैठक सुरू असतानाच उपमुख्यमंत्री एकनाथ शिंदे काही वेळासाठी बैठकीतून बाहेर पडले आणि थेट शरद पवार यांच्या कार्यालयात पोहोचले. दोन्ही नेत्यांमध्ये काही काळ बंद दालनाआड चर्चा झाली. चर्चा संपल्यानंतर शिंदे पुन्हा मंत्रिमंडळ बैठकीसाठी रवाना झाले. या भेटीत कोणत्या विषयावर चर्चा झाली, याबाबत कोणतीही अधिकृत माहिती समोर आलेली नसली तरी या अचानक झालेल्या भेटीमुळे राजकीय चर्चांना चांगलाच उधाण आले आहे. आगामी राजकीय घडामोडींच्या पार्श्वभूमीवर या भेटीकडे विशेष महत्त्वाने पाहिले जात आहे.
राष्ट्रवादीच्या आमदारांची महत्त्वाची बैठक
मिळालेल्या माहितीनुसार, शरद पवार यांनी त्यांच्या पक्षातील सर्व आमदारांची महत्त्वाची बैठक बोलावली आहे. विशेष म्हणजे ही बैठक उपमुख्यमंत्री एकनाथ शिंदे यांच्या कार्यालयात आयोजित करण्यात आली आहे. या बैठकीपूर्वीच शिंदे आणि पवार यांच्यात झालेल्या चर्चेमुळे विविध राजकीय तर्कांना अधिक बळ मिळाले आहे.
या बैठकीला आमदार जितेंद्र आव्हाड, जयंत पाटील, उत्तम जानकर, रोहित पाटील आणि अभिजीत पाटील यांच्यासह अनेक नेते उपस्थित असल्याची माहिती समोर आली आहे. या बैठकीत शरद पवार पक्षाच्या पुढील रणनीतीबाबत आमदारांना मार्गदर्शन करणार असल्याचे सांगितले जात आहे.
राजकीय चर्चांना वेग
गेल्या काही दिवसांपासून महाराष्ट्राच्या राजकारणात पक्षांतर आणि नव्या राजकीय समीकरणांच्या चर्चांना वेग आला आहे. काही दिवसांपूर्वी उद्धव ठाकरे यांच्या शिवसेनेतील सहा खासदारांनी एकनाथ शिंदे यांच्या शिवसेनेत प्रवेश केला. त्यानंतर आमदार सचिन अहिर यांनीही शिंदे गटात प्रवेश केला. या घडामोडींनंतर आता शरद पवार यांच्या नेतृत्वाखालील राष्ट्रवादी काँग्रेस भविष्यात एनडीएला पाठिंबा देणार का, याबाबतही राजकीय वर्तुळात चर्चा सुरू झाली आहे. तसेच राष्ट्रवादी आणि भाजपच्या काही नेत्यांमध्येही अलीकडे भेटीगाठी झाल्याच्या चर्चा रंगल्या आहेत.
अधिकृत भूमिका अद्याप स्पष्ट नाही
मात्र या सर्व चर्चांदरम्यान राष्ट्रवादी काँग्रेस (शरद पवार गट) किंवा महायुतीतील कोणत्याही प्रमुख नेत्याकडून याबाबत अधिकृत भूमिका जाहीर करण्यात आलेली नाही. त्यामुळे शिंदे-पवार भेटीमागील खरे कारण काय, याकडे राज्याच्या राजकीय वर्तुळाचे लक्ष लागले आहे.
📌 महत्वाच्या बातम्या
- Ayodhya Land Scam: एकाच दिवशी दोन जमीन व्यवहार; अनिल मिश्रा यांच्या भूमिकेवर प्रश्न
- US Iran Conflict : ट्रम्प यांची मोठी घोषणा; इराणसोबतचा करार संपुष्टात, पुन्हा वाढला तणाव
- नाशिक पूरपरिस्थितीत किरीट सोमय्यांची बैठक; भाजप नगरसेवकांमध्ये नाराजीची चर्चा
बातम्यांसाठी YouTube चॅनेल Subscribe करा
Subscribe Now
