Maratha Reservation: अंतरवाली सराटी येथे मनोज जरांगे (Manoj Jarange) पाटील यांचे उपोषण सुरू होऊन आज तिसरा दिवस आहे आणि त्यांनी आपल्या समर्थकांना मुंबईकडे कूच करण्याचे आवाहन केले आहे.
५८ लाख कुणबी नोंदींची अंमलबजावणी ही मुख्य मागणी असलेल्या या बेमुदत उपोषणाचा आज (३१ ऑगस्ट २०२६) तिसरा दिवस आहे. मात्र, जरांगे यांनी स्पष्ट केले आहे की, उपोषण सुरू झाल्यापासून चर्चेबाबत सरकारकडून कोणताही अधिकृत संपर्क साधण्यात आलेला नाही.
सोमवारी आंदोलकांशी संवाद साधताना, जरांगे यांनी मुंबईतील आगामी आंदोलनासाठी एका नवीन रणनीतीची रूपरेषा मांडली. मराठा बांधवांनी वाहनांवर झेंडे न लावता मुंबईत पोहोचण्यास सुरुवात करावी, असे आवाहन जरांगे यांनी केले. तसेच, मनोज जरांगे यांनी त्यांना शहरात नातेवाईक, मित्र किंवा ओळखीच्या लोकांकडे राहण्याचा आणि सध्या तरी आझाद मैदान किंवा ‘वर्षा’ निवासस्थानाच्या दिशेने न जाण्याचा सल्ला दिला.
Manoj Jarange Maratha protest
आंदोलनादरम्यान पोलिसांना कोणतीही अडचण येणार नाही, याची काळजी घेण्याचे आवाहन जरांगे यांनी सर्वांना केले. अंतरवाली सराटी येथील गर्दी काहीशी कमी झाली असली, तरी मुंबईतील उपस्थिती वाढवण्यावरच लक्ष केंद्रित केले पाहिजे, यावर जरांगे यांनी भर दिला.
रविवारी आंदोलकांना संबोधित करताना जरांगे यांनी सरकारला १२ सप्टेंबरची अंतिम मुदत दिली. त्यांनी स्पष्ट केले की, जर या तारखेपर्यंत मागण्या मान्य झाल्या नाहीत, तर मुंबईतील आंदोलनाची अंतिम तारीख जाहीर करण्यासाठी १२ सप्टेंबर रोजी अंतरवाली सराटी येथे बैठक घेतली जाईल.
मनोज जरांगे यांनी मुंबईत पाच टप्प्यांत आंदोलन करण्याचा मानसही व्यक्त केला. मोठ्या संख्येने मोटारसायकलींसह आंदोलनाची तयारी करण्याचे आवाहन समर्थकांना केले आहे. त्यांनी स्पष्ट सूचना दिल्या की हा संपूर्ण कार्यक्रम शांततापूर्ण असावा आणि कोठेही जाळपोळ किंवा हिंसाचार होऊ नये.
जरांगे यांनी उपोषणाबाबत अत्यंत भावनिक भूमिका मांडली. मराठा समाजाच्या मागण्यांसाठी आपण शेवटपर्यंत लढणार आहे. उपोषणादरम्यान आपला मृत्यू झाला तरी मृतदेह मुंबईला घेऊन जावा, असे जरांगे यांनी समर्थकांना सांगितले. आता १२ सप्टेंबरपर्यंत राज्य सरकार जरांगे यांच्या मागण्यांवर कोणती भूमिका घेते, याकडे लक्ष लागले आहे.
📌 महत्वाच्या बातम्या
- मतदार याद्यांवरून संजय राऊत राज ठाकरेंच्या भेटीला; राजकीय चर्चांना उधाण
- ‘१२ तारखेपर्यंत हळूहळू मुंबईत घुसा’; मुंबईत २५ लाख मराठे जमवण्यासाठी जरांगेंची नवी रणनीती!
- ‘माझा शाही मसाला मुघल काळातच एक्सपायर…’; तुकाराम मुंढेंच्या कारवाईवर ट्विंकल खन्नाची भन्नाट फिरकी!
बातम्यांसाठी YouTube चॅनेल Subscribe करा
Subscribe Now
