“मतदार भाजपला हरवू शकणाऱ्याच्या पाठीशी उभे राहतात” – पृथ्वीराज चव्हाण

पृथ्वीराज चव्हाण यांनी हा लोकशाहीसाठी महत्त्वाचा निकाल असल्याचे सांगत भाजपला पराभूत करू शकणाऱ्या उमेदवारामागे मतदार उभे राहतात, असे म्हटले.

by Diksha

Published On:

ऑगस्ट 4, 2026 9:11 AM

Prashant Kishor Bankipur Victory Prithviraj Chavan

Bankipur Election : बिहारमधील बांकीपूर विधानसभा पोटनिवडणुकीत (Bankipur By-Election) भाजपचा (BJP) पराभव झाला. ‘जन सुराज पक्षा’चे प्रमुख प्रशांत किशोर (Prashant Kishor) यांनी या मतदारसंघात १८,००० मतांच्या फरकाने ऐतिहासिक विजय मिळवला. हा भाजपच्या प्रतिष्ठेला मोठा धक्का मानला जात आहे. या निवडणुकीच्या निकालांचे विश्लेषण केले जात असून, प्रशांत किशोर यांचा विजय हा कालपासून चर्चेचा विषय ठरला आहे. किशोर यांच्या विजयानंतर महाराष्ट्राचे माजी मुख्यमंत्री आणि काँग्रेस नेते पृथ्वीराज चव्हाण (Prithviraj Chavan) यांनी आपली प्रतिक्रिया दिली.

“लोकशाहीसाठी हा अत्यंत महत्त्वपूर्ण आणि निर्णायक निकाल आहे. ज्या मतदारसंघात भाजपचा यापूर्वी कधीही पराभव झाला नव्हता, तिथे प्रशांत किशोर विजयी झाले आहेत. त्याबद्दल मी त्यांचे अभिनंदन करतो. कोणता उमेदवार भाजपला पराभूत करू शकेल, त्याच्या पाठीशी मतदार उभे राहतात.” असे पृथ्वीराज चव्हाण यांनी म्हटले.

Prashant Kishor Bankipur Victory Prithviraj Chavan

पृथ्वीराज चव्हाण यांनी जंतरमंतर येथील आंदोलनावरही भाष्य केले आणि त्याचे श्रेय विद्यार्थ्यांना दिले. “विरोधी पक्षांची एकता टिकवून ठेवली पाहिजे. भाजपला सत्तेतून बाहेर काढणे हे ‘आप’ (AAP) आणि काँग्रेस या दोघांचेही उद्दिष्ट आहे. हे तरुणांच्या नेतृत्वाखालील आंदोलन होते आणि त्याचे श्रेय घेण्याचा प्रयत्न कोणीही करू नये. काँग्रेस पक्ष २० तारखेनंतरच यात सहभागी झाला, कारण आम्हाला या आंदोलनाचे राजकारण करायचे नव्हते.” असे स्पष्टीकरण चव्हाण यांनी दिले.

या आंदोलनाच्या पार्श्वभूमीवर, ज्येष्ठ नेते शरद पवार यांनी पंतप्रधान नरेंद्र मोदी यांची भेट घेण्यासाठी दिल्लीचा दौरा केला. या भेटीमुळे विविध तर्कवितर्क लढवले गेले आणि राज्यातील राजकारणात ती चर्चेचा विषय ठरली. पृथ्वीराज चव्हाण यांनीही या भेटीवर भाष्य केले. “शरद पवार यांनी पंतप्रधान मोदींची भेट नक्की का घेतली, हे मी सांगू शकत नाही. ती शेतकऱ्यांच्या प्रश्नांबाबत असू शकते, जसे त्यांनी सांगितले किंवा त्यांच्या ट्विटमध्ये नमूद केल्याप्रमाणे विद्यार्थ्यांच्या प्रश्नांबाबत असू शकते. तरीही, एखाद्या ज्येष्ठ नेत्याने पंतप्रधानांची भेट घेण्यात काय गैर आहे?” असा सवाल चव्हाण यांनी केला.

विजयानंतर प्रशांत किशोर काय म्हणाले?

बिहारमधील बांकीपूर विधानसभा मतदारसंघावर आता ‘जन सुराज पक्षा’चा झेंडा फडकत आहे. ही जागा संपूर्ण देशाचे लक्ष वेधून घेणारी ठरली होती. भाजपचा बालेकिल्ला असलेल्या या मतदारसंघात प्रशांत किशोर यांनी मिळवलेला विजय हा पक्षासाठी मोठा धक्का मानला जात आहे. गेल्या ३० वर्षांपासून या मतदारसंघावर भाजपची मजबूत पकड होती, तरीही किशोर यांनी तिथे यश मिळवून दाखवले.

विजयानंतर आपली पहिली प्रतिक्रिया देताना प्रशांत किशोर म्हणाले, “बिहारला चांगल्या नेतृत्वाची गरज आहे. पुढील तीन महिन्यांत तुम्हाला बांकीपूर विधानसभा मतदारसंघात बदल दिसून येईल. आमच्याकडे काहीही नसतानाही आम्ही बिहारसाठी आवाज उठवला होता आणि आज, आमचा स्वतःचा आमदार निवडून आला आहे.”