“माझा न्यायव्यवस्थेवर विश्वास आहे. संगमनेरच्या जनतेचा दृष्टिकोन स्पष्ट आहे आणि मला खात्री आहे की त्यामुळेच माझा विजय होईल. न्यायालयाने केवळ सुनावणीसाठी याचिका स्वीकारली आहे. ‘भावी मुख्यमंत्री’ अशी स्वप्ने पाहणाऱ्यांना अचानक आपण पुन्हा मुख्यमंत्री किंवा आमदार होणार आहोत असे वाटू लागले आहे. तुम्ही ४० वर्षे सत्तेचा उपभोग घेतला. एका ४२ वर्षांच्या तरुणाकडून तुमचा पराभव झाला. तुम्ही पहिल्यांदा आमदार झालात तेव्हा मी अवघ्या दोन वर्षांचा होतो. नशिबानेच तुमचा पराभव घडवून आणला आहे,” अशा शब्दांत एकनाथ शिंदे यांच्या नेतृत्वाखालील शिवसेनेचे संगमनेरचे आमदार अमोल खताळ यांनी (Amol Khatal) जोरदार टीका केली.
निवडणुकीच्या शपथपत्रात चुकीची आणि अपूर्ण माहिती दिल्याचा आरोप असलेल्या अमोल खताळ यांच्या विरोधात उच्च न्यायालयाच्या औरंगाबाद खंडपीठात कायदेशीर खटला चालणार आहे. उच्च न्यायालयाच्या निर्णयाविरुद्ध आमदार खताळ यांनी सर्वोच्च न्यायालयात धाव घेतली होती, परंतु सर्वोच्च न्यायालयाने त्यांची ‘विशेष रजा याचिका’ (Special Leave Petition) फेटाळून लावली. परिणामी, सर्वोच्च न्यायालयाच्या या निर्णयामुळे आमदार खताळ यांच्या विरोधातील खटला उच्च न्यायालयात चालण्याचा मार्ग मोकळा झाला आहे.
Amol Khatal reacts after Supreme Court rejects plea
सर्वोच्च न्यायालयाच्या निर्णयानंतर आमदार खताळ यांनी न्यायव्यवस्थेवरील आपला विश्वास जाहीरपणे व्यक्त केला. मात्र, काँग्रेस नेते आणि माजी मंत्री बाळासाहेब थोरात (Balasaheb Thorat) यांचे नाव न घेता त्यांनी त्यांच्यावर कडक शब्दांत टीका केली. संगमनेरच्या जनतेच्या समस्या सोडवण्यासाठी आयोजित करण्यात आलेल्या ‘छत्रपती शिवाजी महाराज महसूल समाधान शिबिरा’त ते बोलत होते.
आमदार खताळ म्हणाले, “न्यायालयाने केवळ सुनावणीसाठी याचिका दाखल करून घेतली आहे. नशीब आणि जनतेने त्यांचा पराभव केला आहे आणि ते हे सत्य स्वीकारू शकत नाहीत. म्हणूनच ते माझ्यावर निराधार आरोप करत आहेत. मला याची काहीही चिंता नाही, कारण जनता माझ्या पाठीशी आहे.”
विधानसभेत ‘तुकडेबंदी’ कायद्याचा मुद्दा सातत्याने मांडल्यामुळे राज्यातील ५० लाख नागरिकांना फायदा होणार आहे. तळेगाव परिसरातील पाणीटंचाई दूर करण्यासाठी भोजापूर धरण, सिंचन योजना आणि कालव्यांच्या दुरुस्तीचे काम सुरू करण्यात आले आहे. कौठे मलकापूर भागात एमआयडीसी (MIDC) स्थापन करण्याची प्रक्रिया अंतिम टप्प्यात आली आहे. तसेच, नाशिक-पुणे रेल्वे मार्ग संगमनेरमधून जाईल, यासाठीही प्रयत्न सुरू असल्याचे आमदार खताळ यांनी सांगितले.
शिबिरात १० हजार लाभार्थ्यांचा सहभाग
संगमनेर तालुक्यातील १० हजार लाभार्थ्यांनी या शिबिरातील सेवांचा लाभ घेतला. या शिबिराद्वारे १,७९७ फेरफार (म्युटेशन) प्रकरणे निकाली काढण्यात आली. तसेच, ३८० ‘७/१२’ उतारे दुरुस्त करण्यात आले आणि ४,५०० डिजिटल ‘७/१२’ उतारे वितरित करण्यात आले. याव्यतिरिक्त, १,७०० महसुली दाखले जारी करण्यात आले आणि ‘सिंगल विंडो’ (एक खिडकी) योजनेअंतर्गत १,०७० अर्जांवर कार्यवाही करण्यात आली.
📌 महत्वाच्या बातम्या
- 8th Pay Commission: कर्मचाऱ्यांच्या मूळ वेतनात थेट तिप्पट वाढ? १८ हजारांवरून ६९ हजारांच्या आकड्यामागचं गणित काय?
- मुंबई हायकोर्टाचा FDA ला दणका; मंत्रालयाच्या कँटीनची अवस्था पाहून न्यायाधीश संतापले, नेमकं काय घडलं?
- राज्यात मुसळधार पाऊस धुमाकूळ घालणार; पुणे, नाशिकसह अनेक जिल्ह्यांना धोक्याचा इशारा!
बातम्यांसाठी YouTube चॅनेल Subscribe करा
Subscribe Now
