शाहरुख खान, अजय देवगणची गय नाहीच; जाहिरातींवरून एफडीए आयुक्त तुकाराम मुंढेंचा इशारा

प्रतिनिधी, 12 ऑक्टोबर: राज्याचे अन्न व औषध प्रशासन (FDA) आयुक्त म्हणून पदभार स्वीकारल्यापासून तुकाराम मुंढे यांनी धडक कारवाई करण्यास सुरुवात केली आहे. पान मसाला ब्रँडच्या कथित सरोगेट जाहिरातींप्रकरणी त्यांनी आपला मोर्चा आता थेट बॉलिवूडकडे वळवला असून शाहरुख खान, अजय देवगण आणि टायगर श्रॉफ या आघाडीच्या कलाकारांना त्यांनी नोटीस बजावली होती. याप्रकरणी कायदा सर्वांसाठी समान असून कोणाचीही गय केली जाणार नाही, असा मोठा इशारा मुंढे यांनी दिला आहे.

एफडीएने बजावलेल्या या नोटीसला तिन्ही कलाकारांनी सुरुवातीला प्रतिसाद दिला नव्हता. मात्र, आता त्यांच्याकडून उत्तर देण्यात आले आहे. यावर बोलताना तुकाराम मुंढे यांनी स्पष्ट केले की, नैसर्गिक न्यायाच्या तत्त्वांचे पालन करून अंतिम निर्णय घेण्यापूर्वी किंवा पुढील कठोर कायदेशीर कारवाई करण्यापूर्वी संबंधित कलाकारांना आपली बाजू मांडण्याची किंवा त्यांचे म्हणणे ऐकून घेण्याची आणखी एक संधी दिली जाईल.

‘इंडिया टुडे कॉन्क्लेव्ह २०२६’ मध्ये बोलताना मुंढे (Tukaram Mundhe) यांनी या प्रक्रियेची माहिती दिली. ते म्हणाले की, अन्न व औषध प्रशासन आपल्या कायदेशीर अधिकारांच्या कक्षेत राहूनच काम करत आहे आणि पुढील कारवाई ही सध्या लागू असलेल्या कायदेशीर चौकटीच्या आधारेच निश्चित केली जाईल.

कोणतीही जाहिरात करण्यापूर्वी कलाकारांनी सावधगिरी बाळगणे आवश्यक असल्याचेही त्यांनी सुनावले. ‘अन्न सुरक्षा आणि मानके कायदा २०२६’ चे कलम २४ आणि ‘२०१८ च्या जाहिरातविषयक नियमां’चा संदर्भ देत मुंढे यांनी स्पष्ट केले की, जाहिरातीचे समर्थन करणाऱ्या संबंधित व्यक्तीचीच त्या जाहिरातीची जबाबदारी असते.

📌 महत्वाच्या बातम्या

• अमरावती हादरलं! आई खोटं बोलत असल्याच्या संतापातून इंजिनिअर मुलाने घेतला जन्मदातीचा बळी
• इंडिया ‘अ’ चा ऑस्ट्रेलियावर ४९ धावांनी दणदणीत विजय, मुंबईकर सुर्यांश शेडगेची दमदार खेळी
• सरन्यायाधीश सूर्यकांत यांनी फेटाळली इंडिया आघाडीची भेटीची विनंती; विरोधकांचा सुप्रीम कोर्टावर मोर्चा धडकणार