पुनरागमनानंतर काही तासांतच ऑस्ट्रेलियन गोलंदाज लान्स मॉरिसला पुन्हा दुखापत

प्रतिनिधी, 9 नोव्हेंबर: पाठीची शस्त्रक्रिया आणि साईड स्ट्रेनच्या दुखापतीतून सावरून क्रिकेटच्या मैदानात पुनरागमन करणाऱ्या वेस्टर्न ऑस्ट्रेलियाचा वेगवान गोलंदाज लान्स मॉरिसला पुन्हा एकदा दुखापतीचा सामना करावा लागला आहे. तब्बल २० महिन्यांनंतर क्रिकेटमध्ये परतलेल्या या गोलंदाजाला काही तासांतच नव्या दुखापतीला सामोरे जावे लागल्याने त्याच्या कारकिर्दीला मोठा धक्का बसला आहे.

शनिवारी इंग्लंडविरुद्धच्या वेस्टर्न ऑस्ट्रेलियाच्या एकदिवसीय सामन्यानंतर एका सामाजिक कार्यक्रमात मॉरिसच्या डाव्या हाताला (नॉन-बॉलिंग आर्म) कट लागला. ऑस्ट्रेलियाचा संघ इंग्लंडविरुद्ध तीन सामन्यांची एकदिवसीय आणि पाच सामन्यांची टी-२० मालिका खेळणार आहे. या मालिकेसाठी मॉरिसला संघात स्थान मिळण्याची शक्यता होती, मात्र आता तो उपलब्ध नसेल असा अंदाज वर्तवला जात आहे.

वेस्टर्न ऑस्ट्रेलियन क्रिकेट असोसिएशनने (वाका) या संदर्भात एक निवेदन प्रसिद्ध केले आहे. त्यात म्हटले आहे की, “आज लान्स हाताच्या तज्ज्ञ डॉक्टरांचा सल्ला घेईल, जेणेकरून दुखापतीचे स्वरूप आणि त्याच्या मैदानावर परतण्याबाबतची वेळ निश्चित करता येईल.”

इंग्लंडविरुद्धच्या सराव सामन्यात मॉरिसने शानदार गोलंदाजी करत १० षटकांत २९ धावा देऊन ३ बळी घेतले होते. त्याच्या या कामगिरीने इंग्लंड राष्ट्रीय क्रिकेट संघाचे मुख्य प्रशिक्षक ब्रेंडन मॅक्युलम यांनाही प्रभावित केले होते.

२८ वर्षीय वेगवान गोलंदाज मॉरिसने यापूर्वीच ऑस्ट्रेलियन राष्ट्रीय संघासाठी पदार्पण केले असून त्याने आपला शेवटचा सामना २०२४ मध्ये पाकिस्तानविरुद्ध खेळला होता. अद्याप त्याने राष्ट्रीय संघाकडून टी-२० आणि कसोटी पदार्पण केलेले नाही. ऑक्टोबर २०२० मध्ये शेफिल्ड शील्डमधून पदार्पण केल्यापासून त्याने आतापर्यंत २६ प्रथम श्रेणी सामने खेळले आहेत.

आपल्या दुखापतीच्या कठीण काळाविषयी बोलताना मॉरिसने गेल्या आठवड्यात सांगितले होते की, “शस्त्रक्रियेनंतर सुरुवातीला सर्व काही सुरळीत होते. पण जेव्हा आम्ही पुन्हा खेळण्याची तयारी सुरू केली, तेव्हा गोष्टी नियोजनानुसार झाल्या नाहीत आणि काही वेळा परिस्थिती थोडी आव्हानात्मक बनली.”

त्याच्या आठ आठवड्यांच्या रिहॅबविषयी तो पुढे म्हणाला, “अलीकडेच, सरावादरम्यान गोलंदाजी करताना मला खूप साधारण आणि निराश वाटत होते. (हा) साईड स्ट्रेन, ज्यामुळे आधीच लांबलेल्या रिहॅबमध्ये आणखी आठ आठवड्यांची भर पडली, तो काळ पार करणे खूप कठीण होते.”

📌 महत्वाच्या बातम्या

• एकनाथ शिंदेंची रुग्णालयात जाऊन शरद पवारांना भेट; मुख्यमंत्र्यांकडून फोनवरून प्रकृतीची विचारपूस
• देशाला मोदीजी हवे आहेत, राहुल गांधींना अतिडावी व्यवस्था उभी करायचीय: मुख्यमंत्री फडणवीसांचा हल्लाबोल
• सरकार कोणत्याही पक्षाचं असो, सत्तेत ५ मराठा मंत्री असायलाच हवेत: मनोज जरांगे पाटील