प्रतिनिधी, 11 नोव्हेंबर: महाराष्ट्रात सध्या नागरिकांना विचित्र आणि दुहेरी हवामानाचा अनुभव येत आहे. राज्याच्या विविध भागांत दिवसा उष्ण आणि कोरडे हवामान, तर सकाळी, पहाटे आणि रात्रीच्या वेळी गारवा जाणवत आहे. हवामान विभागाने दिलेल्या माहितीनुसार, राज्याच्या किमान तापमानात दोन ते तीन अंश सेल्सिअसने घट झाली आहे. दरम्यान, ११ नोव्हेंबर रोजी कोकणापासून विदर्भापर्यंत सर्वत्र हवामान कोरडे राहण्याचा अंदाज हवामान विभागाने वर्तवला आहे.
कोकण विभागात मागील काही दिवसांपासून उष्णतेचा प्रभाव कायम आहे. तिथे कमाल तापमान ३४ ते ३५ अंश, तर किमान तापमान १९ अंशांपर्यंत राहण्याची शक्यता असून पुढील चार ते पाच दिवस पावसाची कोणतीही शक्यता नाही. दुसरीकडे, उत्तर महाराष्ट्रातही थंडीची चाहूल लागली असून तिथे कमाल तापमान ३१ अंश आणि किमान तापमान सुमारे १९ अंश सेल्सिअस राहण्याचा अंदाज आहे. या भागात आगामी दोन ते तीन दिवस हवामान कोरडे राहील.
पुण्यासह पश्चिम महाराष्ट्रात कमाल तापमान ३१ अंश तर किमान तापमान १७ अंश सेल्सिअसपर्यंत राहण्याची शक्यता आहे. या भागात दिवसा उन्हाचा चटका, तर रात्री आणि पहाटे हवेत गारवा असे संमिश्र हवामान पुढील काही दिवस कायम राहील. मराठवाड्यातही कमाल तापमान तुलनेने स्थिर असले, तरी किमान तापमानात घट होत असल्याने उष्ण आणि थंड अशा दुहेरी हवामानाचा सामना नागरिकांना करावा लागत आहे. मराठवाड्यात पुढील चार ते पाच दिवस प्रामुख्याने कोरडे हवामान राहील.
विदर्भात आगामी चार ते पाच दिवस हवामानात कोणताही मोठा बदल अपेक्षित नाही. या भागात कमाल तापमान ३१ अंश तर किमान १८ अंश सेल्सिअसच्या आसपास राहण्याचा अंदाज असून दिवसा उष्णता आणि रात्री काहीसा गारवा जाणवेल. एकंदरीत, सध्या राज्यात पावसाचा कोणताही अलर्ट देण्यात आलेला नाही. बहुतांश भागांत पुढील चार ते पाच दिवस हवामान कोरडे राहण्याची शक्यता आहे. दिवाळीच्या काळात जाणवणाऱ्या या दुहेरी हवामानामुळे राज्यात आता हळूहळू हिवाळ्याची चाहूल लागल्याचे स्पष्ट होत आहे.
📌 महत्वाच्या बातम्या
- विलीनीकरणाच्या चर्चेत मोठी घडामोड! अजित पवार गटाचे २० आमदार शरद पवारांच्या भेटीला?
- रत्नागिरीत गिफ्ट दुकानाला भीषण आग; अग्निशमन दलाच्या बंबात पाणीच नसल्याने नागरिकांचा संताप
- जन्मदात्या बापाकडून १० वर्षीय मुलीवर अत्याचार; आईने बसवलेल्या सिक्रेट कॅमेऱ्यातून प्रकार उघड
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
