रत्नागिरी, 11 नोव्हेंबर: रत्नागिरी शहरातील मध्यवर्ती भागात असलेल्या मारुती मंदिर परिसरातील एका गिफ्ट आर्टिकलच्या दुकानाला भीषण आग लागली आहे. दिवाळीनिमित्त या दुकानात मोठ्या प्रमाणावर प्लास्टिकचे साहित्य असल्याने आगीचा भडका अधिक वेगाने उडाला. धक्कादायक बाब म्हणजे, घटनेची माहिती मिळताच घटनास्थळी दाखल झालेल्या नगरपरिषदेच्या पहिल्या अग्निशमन बंबामध्ये पुरेसे पाणीच नसल्याची माहिती स्थानिकांनी दिली आहे. प्रशासनाच्या या बेजबाबदार कारभारामुळे अडीच तासांहून अधिक काळ उलटूनही आगीवर नियंत्रण न मिळवता आल्याने नागरिकांमध्ये तीव्र संताप व्यक्त होत आहे.
प्राथमिक अंदाजानुसार शॉर्टसर्किटमुळे ही आग लागल्याची शक्यता वर्तवण्यात येत आहे. सकाळच्या वेळेस वाऱ्याचा वेग जास्त असल्याने आणि सुरुवातीला आगीवर वेगाने पाण्याचा मारा न झाल्यामुळे आगीने रौद्ररूप धारण केले. अग्निशमन दलाच्या एकूण चार गाड्या घटनास्थळी दाखल झाल्या असून आगीवर नियंत्रण मिळवण्यासाठी शर्थीचे प्रयत्न सुरू आहेत. नगरपरिषदेच्या बंबानंतर काही वेळाने एमआयडीसीतील खासगी कंपन्यांचे अग्निशमन बंबही घटनास्थळी पोहोचले आणि त्यांनी आग विझवण्याचे काम सुरू केले.
सुरुवातीला या आगीत कोणतीही मोठी वित्तहानी झाल्याची माहिती नव्हती. मात्र, आगीचे भीषण स्वरूप पाहता दुकानातील कोट्यवधी रुपयांचा माल जळून खाक झाल्याचा अंदाज असून, आतमध्ये कोणतेही साहित्य शिल्लक राहण्याची शक्यता कमी आहे. अद्यापही आग पूर्णपणे विझलेली नसून आतून धुमसत असल्याचे चित्र आहे.
आग लागलेले दुकान शहराच्या मध्यवर्ती भागात असल्याने आजूबाजूला अनेक घरे आणि कार्यालये आहेत. वेळेत आग आटोक्यात न आल्यास इतर परिसरालाही फटका बसू शकतो, त्यामुळे परिसरात मोठी खळबळ उडाली आहे. योग्य उपाययोजनांचा अभाव आणि अग्निशमन यंत्रणेतील त्रुटींमुळे प्रशासनाच्या कारभारावर आता अनेक प्रश्न उपस्थित केले जात आहेत.
📌 महत्वाच्या बातम्या
- जन्मदात्या बापाकडून १० वर्षीय मुलीवर अत्याचार; आईने बसवलेल्या सिक्रेट कॅमेऱ्यातून प्रकार उघड
- मोहम्मद शमीची कसोटी क्रिकेटमधून निवृत्ती; कारकीर्दीतील ३ सर्वोत्तम कामगिरी
- रोहित शर्माकडे MI तर रियान परागकडे पुन्हा RR चं कर्णधारपद; हार्दिक-अर्शदीपची टीम बदलणार
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
