प्रतिनिधी, 11 ऑक्टोबर: भारतीय संघाच्या टी-२० संघात तब्बल चार वर्षांनी भुवनेश्वर कुमारचे पुनरागमन झाल्यानंतर अनुभवी वेगवान गोलंदाज मोहम्मद शमीने आपल्या निवडीकडे होत असलेल्या दुर्लक्षाबाबत उघडपणे नाराजी व्यक्त केली आहे. भारतीय संघात पुन्हा संधी मिळाली नाही तरी यात आपले काहीही नुकसान नाही, असे स्पष्ट मत त्याने मांडले आहे.
भुवनेश्वरच्या निवडीबाबत विचारले असता शमी (Mohammed Shami) म्हणाला की, भुवनेश्वरला देशासाठी खेळण्याची संधी मिळाली ही त्याच्यासाठी उत्तम बाब आहे. परंतु, त्याच्या निवडीचा माझ्याशी कोणताही संबंध नाही. मला जिथे खेळण्याची संधी मिळेल, तिथे मी माझे शंभर टक्के योगदान देईन. सध्या माझे संपूर्ण लक्ष केवळ रणजी करंडक स्पर्धेतील सामन्यांवर केंद्रित असल्याचे त्याने स्पष्ट केले.
संघ व्यवस्थापन आणि निवड समितीवर टीका करताना शमीने सांगितले की, गेल्या दोन-तीन वर्षांपासून माझ्यासोबत हाच प्रकार घडत आहे. बंगालकडून खेळताना आपण सातत्यपूर्ण कामगिरी करत तंदुरुस्ती सिद्ध केली आहे. तरीही मला भारतीय संघाकडून खेळण्याची संधी पुन्हा मिळाली नाही, तर त्यात माझं काहीच जात नाही. ३६ वर्षीय शमी भारतासाठी अखेरचा २०२५ च्या चॅम्पियन्स ट्रॉफीमध्ये खेळला होता. तेव्हापासून फिटनेसच्या समस्या आणि निवड समितीकडून तरुण खेळाडूंना दिले जाणारे प्राधान्य यामुळे तो संघाबाहेरच आहे.
दुसरीकडे, आयपीएल २०२६ मधील प्रभावी कामगिरीच्या जोरावर भुवनेश्वर कुमारने न्यूझीलंड दौऱ्यावरील टी-२० संघात पुनरागमन केले आहे. २०२७ च्या एकदिवसीय विश्वचषकाच्या योजनांचा एक भाग म्हणून त्याचे मूल्यांकन केले जात असल्याचे मानले जाते. सध्या वेस्ट इंडिजविरुद्धच्या मालिकेत सपाट खेळपट्ट्यांवर भारतीय गोलंदाजांची जोरदार धुलाई होत असल्याने तज्ज्ञ आणि चाहत्यांकडून अनुभवी गोलंदाजांची मागणी होत आहे. याच पार्श्वभूमीवर शमीची व्यथा समोर आली आहे.
२०२३ च्या विश्वचषकापासून शमीचा फिटनेस ही त्याच्यासाठी आणि भारतीय संघासाठीही चिंतेची बाब राहिली आहे. या विश्वचषकानंतर प्रदीर्घ काळ संघाबाहेर राहिलेल्या शमीने चॅम्पियन्स ट्रॉफीच्या अगदी आधी संघात पुनरागमन केले होते, मात्र त्या स्पर्धेनंतर त्याला पुन्हा वगळण्यात आले. याच काळात माजी मुख्य निवडकर्ता अजित आगरकर आणि शमी यांच्यात माध्यमांमधून आरोप-प्रत्यारोपही झाले होते. आता आगरकर यांनी निवड समितीतून राजीनामा दिला असून भुवनेश्वरचेही पुनरागमन झाले आहे. त्यामुळे शमीलाही पुन्हा संधी मिळणार का, याचे उत्तर आगामी काही दिवसांत स्पष्ट होईल.
📌 महत्वाच्या बातम्या
- रोहित पवारांचं डोकं मेंढराच्या डागनीने डागलं पाहिजे; MPSC आंदोलनावरून गोपीचंद पडळकर संतापले
- पीएम किसानचा २४ वा हप्ता मिळवण्यासाठी ई-केवायसी अनिवार्य; पोर्टलवरही झाला मोठा बदल
- अभिजीत दीपकेंना ताब्यात घेतल्यानंतर सीजेपीच्या दिल्ली आंदोलनाची धुरा अजिंक्य शिंदेंकडे; कोण आहेत अजिंक्य शिंदे?
Ask Maharashtra Desha
आधी महाराष्ट्र देशाच्या उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
