पैठण | किरण काळे पाटील (ढाकेफळ) – तुम्ही कधी विचार केलाय का, की रस्त्यावरून धावणाऱ्या आलिशान गाड्यांमध्ये नक्की काय दडलेलं असू शकतं? छत्रपती संभाजीनगरच्या चित्तेगावमध्ये असंच एक धक्कादायक प्रकरण समोर आलंय.
शासनाने बंदी घातलेला गुटखा चक्क स्कॉर्पिओ गाडीतून फिरवला जातोय. स्थानिक गुन्हे शाखेने मंगळवारी संध्याकाळी (6:15 मिनिटांनी) केलेल्या कारवाईत ५ लाख ३९ हजारांहून अधिक रुपयांचा मुद्देमाल जप्त केला आहे.
Gutkha Smuggling: पोलिसांच्या छाप्यात मोठं रॅकेट उघड!
पोलिसांना त्यांच्या गुप्त खबऱ्याकडून एक टीप मिळाली होती. चित्तेगाव परिसरातील ज्ञानेश्वरनगर जवळ मोकळ्या जागेत एक पांढऱ्या रंगाची स्कॉर्पिओ (MH20EE2950) उभी आहे. त्यात मोठ्या प्रमाणावर गुटखा असल्याची माहिती होती.
वेळ न दवडता पोलिसांनी तिथे छापा टाकला. गाडीत अस्लम हनीफ पठाण हा ३५ वर्षीय तरुण बसलेला होता. पोलिसांनी पंचांसमक्ष गाडीची झडती घेतली. गाडीत हिरा पान मसाला, रॉयल ७१७, राजनिवास आणि ZN-01 यांसारख्या प्रतिबंधित सुगंधी तंबाखू आणि गुटख्याची मोठी पाकिटे होती. जवळपास ३९ हजार ६२० रुपयांचा हा माल आणि पाच लाखांची गाडी असा एकूण ५ लाख ३९ हजार ६२० रुपयांचा मुद्देमाल पोलिसांनी जप्त केलाय.
अस्लम तर फक्त एक मोहरा निघाला
पोलिसांनी अस्लमला खाक्या दाखवताच त्याने मुख्य सूत्रधाराचं नाव सांगितले. बिड बायपासच्या सिराज सय्यद याने एका लोडिंग पिकअपमधून हा माल आणून दिल्याची कबुली अस्लमने दिली आहे. त्यामुळेच आता पोलिसांच्या रडारवर सिराज सय्यद आला आहे.
अन्न सुरक्षा आणि मानके अधिनियम २००६ च्या कलम ५९ सह भारतीय न्याय संहितेच्या (BNS) १२३, २२३ आणि २७५ कलमांनुसार बिडकीन पोलीस ठाण्यात गुन्हा दाखल झालाय. आता या रॅकेटमध्ये आणखी कोणाचे हात बरबटलेले आहेत, हे लवकरच समोर येईल.
स्थानिक गुन्हे शाखेचे पोलीस निरीक्षक विजयसिंह राजपूत यांच्या मार्गदर्शनाखाली, पोलीस हेड कॉन्स्टेबल सचिन सोनार, रवींद्र लोखंडे, अंगद तिडके आणि सनी खरात यांच्या पथकाने ही धडक कारवाई केली. याच पथकाने सापळा रचून या गुटखा तस्करांच्या मुसक्या आवळल्या.
‘मुख्य’ सूत्रधाराची बारी! गुटख्याची आंतरजिल्हा तस्करी उघड
या गुन्ह्याचा पुढील तपास पोलीस उपनिरीक्षक (PSI) मनोज पाटील हे करत आहेत. मुख्य सूत्रधाराला बेड्या ठोकण्याचं मोठं आव्हान आता त्यांच्यासमोर आहे. दुसरीकडे, स्थानिक गुन्हे शाखेच्या या धडक कारवाईमुळे परिसरातील छुप्या गुटखा विक्रेत्यांचे चांगलेच धाबे दणाणले आहेत. आता या रॅकेटमध्ये आणखी कोणाचे चेहरे उघड होणार, याकडे सर्वांचं लक्ष लागलंय.
📌 महत्वाच्या बातम्या
- मनोज जरांगेंना मोठा झटका! मुंबईत आंदोलनासाठी शासनाचे नवे कडक नियम
- महिला आयोगावर राहिलेल्या बाईने बार उघडावा का? अंधारेंचा रूपाली चाकणकरांवर घणाघात
- खवड्या डोंगर मृत्यू प्रकरण: ‘कुणालला आत्महत्या करायची नव्हती तर…’, मावशीच्या दाव्याने प्रकरणाला नवा ट्विस्ट
बातम्यांसाठी YouTube चॅनेल Subscribe करा
Subscribe Now
