उल्हासनगर हादरलं! रेल्वे स्टेशन परिसरात गोळीबार, एकाची थेट डोक्यात गोळ्या झाडून हत्या

उल्हासनगर, 15 ऑक्टोबर: ठाणे जिल्ह्यातील उल्हासनगर रेल्वे स्टेशन परिसरात गोळीबाराची एक धक्कादायक घटना उघडकीस आली आहे. स्टेशनजवळील कॅम्प क्रमांक चार भागात झालेल्या या अंधाधुंद गोळीबारात हरीश गझवानी या व्यक्तीचा जागीच मृत्यू झाला असून, यामुळे संपूर्ण परिसरात मोठी खळबळ उडाली आहे.

मिळालेल्या माहितीनुसार, हरीश गझवानी हे कॅम्प क्रमांक चार परिसरात असताना तिथे अचानक हल्लेखोर आले. त्यांनी पिस्तूल काढून गझवानी यांच्या थेट डोक्यात एकापाठोपाठ दोन गोळ्या झाडल्या. गोळीबाराच्या या आवाजामुळे नागरिकांमध्ये घबराट पसरली. या हल्ल्यात गंभीर जखमी झालेले गझवानी जागेवरच कोसळले आणि त्यांचा मृत्यू झाला. घटनेनंतर जमलेल्या गर्दीचा फायदा घेत आरोपींनी घटनास्थळावरून पळ काढला.

या घटनेची माहिती मिळताच विठ्ठलवाडी पोलिसांनी तातडीने घटनास्थळी धाव घेतली. पोलिसांनी पंचनामा पूर्ण करून मृतदेह शवविच्छेदनासाठी शासकीय रुग्णालयात पाठवला आहे. तसेच, मृताच्या कुटुंबीयांशी संपर्क साधण्याचे प्रयत्न पोलिसांकडून सुरू आहेत. पसार झालेल्या हल्लेखोरांचा माग काढण्यासाठी पोलिसांनी परिसरातील सीसीटीव्ही फुटेज ताब्यात घेतले आहेत.

पूर्ववैमनस्यातून ही हत्या झाली असावी, अशी प्राथमिक माहिती पोलिसांच्या तपासात समोर आली आहे. विठ्ठलवाडी पोलीस या प्रकरणाचा कसून तपास करत असून लवकरच आरोपींना गजाआड केले जाईल, असे सांगण्यात आले आहे. मात्र, वर्दळीच्या रेल्वे स्टेशन परिसरात बंदूकधारी व्यक्ती उघडपणे फिरत असल्याने नागरिकांच्या सुरक्षेचा प्रश्न पुन्हा एकदा ऐरणीवर आला आहे.

📌 महत्वाच्या बातम्या

• ‘कुछ कुछ होता है’साठी अनेक अभिनेत्यांचा होता नकार; ‘कॉफी विथ करण’मध्ये सलमान खानचा कास्टिंगबद्दल मोठा खुलासा
• अभिजीत दिपके आणि ‘सीजेपी’ला अमेरिकेतून निधी मिळतोय; प्रसिद्ध गायिका मेरी मिलबेन यांचा धक्कादायक दावा
• पुणे म्हाडा लॉटरी: तांत्रिक अडचणींमुळे अर्ज प्रक्रियेला मुदतवाढ, आता ‘या’ तारखेपर्यंत संधी