पुणे, 27 सप्टेंबर: पुण्यात डीजेच्या विरोधात लढा देणारे विद्यानंद बापट यांना अभिनेते सुमित राघवन (Sumeet Raghavan) यांनी जाहीर पाठिंबा दर्शवला आहे. “धर्म किंवा सण असू दे, तो घरापुरताच मर्यादित ठेवला पाहिजे,” असे परखड मत त्यांनी व्यक्त केले. रविवारी (२७ तारखेला) ज्येष्ठ अभिनेते अमोल पालेकर यांच्या हस्ते विद्यानंद बापट यांचा गौरव करण्यात आला, यावेळी ते बोलत होते.
‘मधुरजग प्रतिष्ठान’, ‘ब्राईट्स सोसायटी’ आणि ‘विचारवेध’ या संस्थांतर्फे या गौरव सोहळ्याचे आयोजन करण्यात आले होते. या कार्यक्रमाला चिन्मयी सुमित यांचीही उपस्थिती होती. बॅनर लावून बापट यांची खिल्ली उडवणाऱ्यांचा सुमित राघवन यांनी यावेळी समाचार घेतला. ते म्हणाले की, “जेव्हा तुम्ही तार्किक किंवा वैचारिकदृष्ट्या एखाद्या गोष्टीचा सामना करू शकत नाही, तेव्हा अशी थातूरमातूर कृत्ये केली जातात.”
सुमित राघवन यांनी पुढे सांगितले की, मुले वर्ल्ड कप जिंकून आली तर सर्वांनी रस्त्यावर येऊन जल्लोष करणे समजण्यासारखे आहे. मात्र, सध्या रस्त्यांसारखी अनेक मोठी कामे प्रलंबित आहेत, आपला जोश तिकडे सत्कारणी लावला पाहिजे. बापट यांच्या या ध्येयवेड्या प्रयत्नांचे कौतुक करत, “आम्ही केवळ तुझ्या पाठीशी नाही, तर तुझ्याबरोबर आहोत,” अशी ग्वाही त्यांनी दिली.
दरम्यान, या कार्यक्रमापूर्वी विद्यानंद बापट आणि आयोजकांनी आपली पुढील दिशा स्पष्ट केली. आता हा मुद्दा न्यायालय आणि कायदेमंडळाच्या पातळीवर लढणार असल्याचे बापट यांनी सांगितले. पुण्यात लांबलेल्या विसर्जन मिरवणुकांना परवानगी देणेच चुकीचे असल्याचे ते म्हणाले. “विसर्जन मिरवणुका लांबवणं हा गोमूत्र पिऊन आणि शेण खाऊन आलेला माज आहे,” अशा तीव्र शब्दांत बापट यांनी संताप व्यक्त केला.
📌 महत्वाच्या बातम्या
- ‘ज्ञानेश कुमार देशाचे दुश्मन नंबर एक, त्यांना उचलून फेकणार..’ सर्व संस्था मोदी-शाहांचे घरगडी’- संजय राऊत
- “ते व्होट चोरी म्हणतात, पण त्यांचा मेंदूच चोरीला गेलाय”; ईव्हीएम आणि निवडणूक आयोगावरून फडणवीसांचा हल्लाबोल
- २०२७ चा वनडे वर्ल्ड कप अखेरचा; ट्रॉफी जिंकण्यासाठी सर्वस्व पणाला लावणार – विराट कोहली
