🕒 1 min read
मुंबई – ढोल-ताशांचा गजर, लख्ख रोषणाई आणि भगव्या रंगात न्हाऊन निघालेलं वातावरण… अशा भारलेल्या क्षणी जेव्हा साक्षात छत्रपती शिवाजी महाराजांची भूमिका पडद्यावर साकारली जाते, तेव्हा अंगावर काटा आल्याशिवाय राहात नाही. पण, यावेळी उत्सुकता वेगळीच होती. प्रेक्षकांच्या मनात एकच प्रश्न होता, चिन्मय मांडलेकर नसल्यामुळे आता महाराजांच्या भूमिकेत कोण दिसणार? अखेर या मोठ्या सस्पेंसवरून पडदा उठला आहे!
दिग्दर्शक दिग्पाल लांजेकर यांच्या गाजलेल्या ‘शिवराज अष्टक’ मालिकेतील सहावं पुष्प, अर्थात ‘रणपति शिवराय स्वारी आग्रा’ (Ranapati Shivray Swari Agra) लवकरच प्रेक्षकांच्या भेटीला येत आहे. या चित्रपटाच्या भव्य सादरीकरणात छत्रपतींच्या भूमिकेतील नव्या चेहऱ्याची ओळख करून देण्यात आली. यावेळी चिन्मय मांडलेकर (Chinmay Mandlekar) नाही, तर अभिजीत श्वेतचंद्र (Abhijeet Shwetchandra) हा अभिनेता शिवरायांची भूमिका साकारताना दिसणार आहे.
Abhijeet Shwetchandra replaces Chinmay Mandlekar
घोड्यावर स्वार होऊन, कपाळी जिरेटोप आणि हातात भवानी तलवार घेऊन जेव्हा अभिजीत समोर आला, तेव्हा उपस्थितांचे डोळे दिपून गेले. ३० जानेवारीला हा चित्रपट सर्वत्र प्रदर्शित होणार आहे.
अनेक चाहत्यांना प्रश्न पडला असेल की चिन्मयने ही भूमिका का सोडली? तर, काही महिन्यांपूर्वी चिन्मयच्या मुलाच्या नावावरून सोशल मीडियावर मोठा वाद निर्माण झाला होता. त्यावेळी भावना दुखावल्या गेल्याने चिन्मयने स्वतःहून जाहीर केले होते की, “मी यापुढे छत्रपती शिवाजी महाराजांची भूमिका साकारणार नाही.” त्याच्या या निर्णयामुळे दिग्पाल लांजेकर यांनी अभिजीत श्वेतचंद्र याच्या खांद्यावर ही मोठी जबाबदारी सोपवली आहे.
आग्रा येथील नजरकैदेतून महाराजांची सुटका हा इतिहासातील सर्वात थरारक अध्याय मानला जातो. हाच अध्याय ‘रणपति शिवराय स्वारी आग्रा’ मधून उलगडणार आहे. कार्यक्रमात ‘महारुद्र शिवराय’ हे गाणं सादर करण्यात आलं, ज्याला अवधूत गांधी आणि अमिता घुगरी यांचा पहाडी आवाज लाभला आहे. आता अभिजीत श्वेतचंद्र शिवरायांच्या रूपात प्रेक्षकांच्या पसंतीस उतरतो का, हे पाहणे औत्सुक्याचे ठरणार आहे.
📌 महत्वाच्या बातम्या
- ‘बॉर्डर 2’ मध्ये वरुण धवनची हिरोईन कोण? तिच्या घरात ३ पिढ्यांनी घातलीये वर्दी; सत्य जाणून कराल सलाम!
- प्रसिद्ध अभिनेत्रीच्या खरंच अंगात आलं होतं? ‘त्या’ व्हायरल व्हिडिओवर सुधा चंद्रन यांचा संताप
- “अजितदादा, ७० हजार कोटींचा निकाल अजून बाकी…”; बावनकुळेंचा तो इशारा आणि महायुतीत खळबळ!
बातम्यांसाठी YouTube चॅनेल Subscribe करा
Subscribe Now
