प्रतिनिधी, 18 नोव्हेंबर: पोलीस भरतीची तयारी करणाऱ्या राज्यभरातील तरुणांसाठी शासनाने एक मोठा आणि दिलासादायक निर्णय घेतला आहे. यापुढे उमेदवारांना मैदानी सरावासाठी महापालिका, नगरपरिषद आणि नगरपंचायतींची मैदाने विनामूल्य उपलब्ध करून दिली जाणार आहेत. याबाबत नगरविकास विभागाने अधिकृत शासन परिपत्रक जारी केले आहे.
नव्या निर्णयानुसार, पोलीस भरतीची जाहिरात प्रसिद्ध झाल्यापासून ते प्रत्यक्ष मैदानी चाचणी संपेपर्यंत उमेदवारांना ही सुविधा मोफत वापरता येणार आहे. या मैदानांच्या वापरासाठी कोणत्याही प्रकारचे भाडे, वापरशुल्क, प्रवेशशुल्क किंवा अनामत रक्कम आकारता येणार नाही, असे परिपत्रकात स्पष्ट करण्यात आले आहे.
उमेदवारांच्या सरावासाठी विशेष वेळा निश्चित करण्यात आल्या असून, पहाटे ५ ते सकाळी ९ आणि सायंकाळी ४ ते रात्री ८ या वेळेत सरावाला प्राधान्य दिले जाणार आहे. याशिवाय, मैदानांवर पिण्याचे पाणी, स्वच्छतागृह, कपडे बदलण्यासाठी कक्ष (बदलकक्ष), पुरेशी प्रकाशव्यवस्था आणि प्राथमिक उपचार सुविधा उपलब्ध करून देण्याचे निर्देशही प्रशासनाला देण्यात आले आहेत.
यापूर्वी काही भागांमध्ये मैदाने वापरताना विद्यार्थ्यांना स्वतःच्या खिशातून पैसे मोजावे लागत होते. राज्यात पोलीस भरतीची तयारी करणाऱ्या विद्यार्थ्यांची संख्या मोठी असून, सरकारच्या या नव्या परिपत्रकामुळे या सर्व उमेदवारांचा मार्ग मोकळा झाला आहे.
📌 महत्वाच्या बातम्या
- श्रद्धांजली वाहिली नाही म्हणून बाळासाहेबांचे महत्त्व कमी होत नाही; संजय राऊतांचा भाजपवर पलटवार
- हिवाळ्यात लहान मुलांची काळजी कशी घ्यावी? कपड्यांपासून आहारापर्यंत ‘या’ खास टिप्स ठरतील फायदेशीर
- रविकांत तुपकरांचा मायक्रो फायनान्स आणि बँकांना इशारा; ‘दुष्काळ सोसण्याचा ठेका फक्त शेतकऱ्यांचा आहे का?’








