भाजपचे ज्येष्ठ नेते लालकृष्ण अडवाणी अपोलो रुग्णालयात दाखल; छातीच्या संसर्गावर उपचार सुरू

दिल्ली, 17 ऑक्टोबर: भारतीय जनता पक्षाचे ज्येष्ठ नेते आणि माजी उपपंतप्रधान लालकृष्ण अडवाणी यांना छातीतील संसर्गामुळे दिल्लीतील अपोलो रुग्णालयात दाखल करण्यात आले आहे. ९८ वर्षीय अडवाणी यांना शुक्रवारी सायंकाळी साडेसात वाजण्याच्या सुमारास रुग्णालयात आणण्यात आले. सध्या त्यांची प्रकृती स्थिर असून रुग्णालयाच्या फुफ्फुस विभागात त्यांच्यावर वैद्यकीय उपचार सुरू आहेत.

रुग्णालयात दाखल करण्याच्या सुमारे आठवडाभर आधी, ७ ऑक्टोबर रोजी पंतप्रधान नरेंद्र मोदी यांनी नवी दिल्लीतील निवासस्थानी जाऊन अडवाणी यांची भेट घेतली होती. सरकार प्रमुख म्हणून २५ वर्षे पूर्ण केल्याच्या निमित्ताने मोदींनी त्यांचे आशीर्वाद घेतले. ७ ऑक्टोबर २००१ रोजी मोदींनी गुजरातचे मुख्यमंत्री म्हणून पदभार स्वीकारला होता. त्यानंतर त्यांनी तीन वेळा मुख्यमंत्री आणि सलग तीन वेळा पंतप्रधानपदाची निवडणूक जिंकत देशाचे नेतृत्व केले आहे.

ज्येष्ठ नेते अडवाणी यांच्या भेटीनंतर पंतप्रधान मोदींनी सोशल मीडिया प्लॅटफॉर्मवर एक पोस्टही शेअर केली होती. अडवाणींची अनेक दशकांची सार्वजनिक सेवा आणि राष्ट्रजीवनातील त्यांच्या योगदानाने खोलवर ठसा उमटवला असल्याचे मोदींनी यात नमूद केले होते. तसेच, देशाची प्रगती भक्कम करण्यामध्ये अडवाणींनी बजावलेल्या महत्त्वपूर्ण भूमिकेचीही त्यांनी आवर्जून नोंद घेतली होती.

लालकृष्ण अडवाणी यांनी भाजपचे राष्ट्रीय अध्यक्ष म्हणून तीन वेळा (१९८६ ते १९९०, १९९३ ते १९९८ आणि २००४ ते २००५) पक्षाची धुरा सांभाळली आहे. त्यांच्या नेतृत्वाखाली पक्षाचा जनाधार अत्यंत वेगाने वाढला. १९८४ च्या लोकसभा निवडणुकीत केवळ दोन जागा मिळवणाऱ्या भाजपने १९८९ मध्ये ८५ जागा जिंकल्या आणि १९९६ मध्ये भाजप लोकसभेतील सर्वांत मोठा पक्ष म्हणून पुढे आला. अटल बिहारी वाजपेयी यांच्या नेतृत्वाखालील राष्ट्रीय लोकशाही आघाडी (एनडीए) सरकारमध्ये अडवाणी यांनी १९९८ ते २००४ या काळात केंद्रीय गृहमंत्री आणि २००२ ते २००४ दरम्यान उपपंतप्रधान म्हणून जबाबदारी पार पाडली. यासोबतच त्यांनी लोकसभेचे विरोधी पक्षनेते म्हणूनही काम पाहिले आहे.

📌 महत्वाच्या बातम्या

• IND vs WI 5th T20I: पाचव्या सामन्यासाठी ड्रीम 11 प्रेडिक्शन, खेळपट्टीचा अहवाल आणि संभाव्य संघ
• आमदार सुनील शेळके आणि आरटीआय कार्यकर्त्यात पुण्यात राडा; पोलिसांत परस्परविरोधी तक्रारी दाखल
• पंकजा मुंडे दत्तक घेणार अंतरवाली सराटी गाव, जिल्हाधिकाऱ्यांची मोठी घोषणा