शासनाच्या १०८ आणि १०२ रुग्णवाहिका सेवांचे एकत्रीकरण; वर्षअखेरीपर्यंत ४,५०० नव्या गाड्या सेवेत दाखल होणार

मुंबई, 15 ऑक्टोबर: राज्यातील आपत्कालीन आरोग्य सेवेचा दर्जा सुधारण्यासाठी आणि रुग्णांना वेळेत मदत मिळवून देण्यासाठी राज्य सरकारने मोठा निर्णय घेतला आहे. सार्वजनिक आरोग्य व कुटुंब कल्याण मंत्री प्रकाश आबिटकर यांनी दिलेल्या माहितीनुसार, १०८ आणि १०२ या दोन्ही रुग्णवाहिका सेवांचे आता एकत्रीकरण केले जाणार आहे. तसेच, या वर्षाच्या अखेरीपर्यंत तब्बल ४ हजार ५०० नव्या अत्याधुनिक रुग्णवाहिका राज्याच्या सेवेत दाखल होतील.

सध्या गंभीर आजार व अपघातांसाठी १०८ क्रमांकाची रुग्णवाहिका, तर गरोदर माता आणि बालकांसाठी १०२ क्रमांकाची सेवा स्वतंत्रपणे चालवली जाते. या दोन्ही यंत्रणांमधील तांत्रिक अडचणी आणि समन्वयाच्या अभावामुळे रुग्णांपर्यंत पोहोचण्यास अनेकदा उशीर होतो. ही बाब विचारात घेऊन आता एकाच मध्यवर्ती नियंत्रण कक्षातून या दोन्ही सेवांचे कॉल व्यवस्थापन केले जाईल, जेणेकरून रुग्णाच्या सर्वांत जवळ असलेली रुग्णवाहिका तातडीने पाठवता येईल.

राज्याच्या ग्रामीण, आदिवासी आणि अतिदुर्गम भागात आरोग्य सुविधा अधिक सक्षम करण्यासाठी या नव्या रुग्णवाहिका उपयुक्त ठरणार आहेत. यामध्ये ‘ॲडव्हान्स्ड लाईफ सपोर्ट’ (ALS) आणि ‘बेसिक लाईफ सपोर्ट’ (BLS) या अत्याधुनिक सुविधांचा समावेश असेल. सर्व गाड्या जीपीएस प्रणालीशी जोडलेल्या असल्याने नियंत्रण कक्षाला त्यांचे लोकेशन अचूक समजेल आणि रुग्णांना लवकरात लवकर रुग्णालयात हलवणे शक्य होईल.

अपघात, हृदयविकाराचा झटका किंवा इतर गंभीर आजारांच्या वेळी उपचारांचा पहिला तास म्हणजेच ‘गोल्डन अवर’ अत्यंत महत्त्वाचा असतो. या नव्या एकात्मिक प्रणालीमुळे रुग्णवाहिकेचा ‘रिस्पॉन्स टाईम’ कमी होऊन रुग्णांचे प्राण वाचवण्यास मोठी मदत होणार आहे. विशेषतः गरोदर महिलांना प्रसूतीसाठी सुरक्षितपणे रुग्णालयात पोहोचवण्याची प्रक्रिया अधिक वेगवान होईल.

राज्यातील प्रत्येक नागरिकाला वेळेत दर्जेदार आरोग्य सेवा देणे हेच सरकारचे उद्दिष्ट असल्याचे आरोग्यमंत्री आबिटकर यांनी स्पष्ट केले. ते म्हणाले, “एकत्रीकरणामुळे आपत्कालीन परिस्थितीत मदत मिळण्याची प्रक्रिया अधिक सुलभ आणि वेगवान होईल. जीपीएस प्रणाली, जीवनरक्षक उपकरणे आणि एकात्मिक नियंत्रण कक्षाच्या माध्यमातून संपूर्ण राज्यातील रुग्णांना वेळेत वैद्यकीय मदत पोहोचवण्यावर आमचा भर राहील. या व्यवस्थेमुळे महाराष्ट्राची आपत्कालीन आरोग्य सेवा देशात पथदर्शी ठरेल, असा मला विश्वास आहे.”

📌 महत्वाच्या बातम्या

• IND vs WI: श्रेयस अय्यर संतापला, पराभवानंतर ६ गोलंदाजांवर फोडलं खापर
• नाना पाटेकरांचे शेवटचे शब्द मनाला बोचतात; शोकसभेत आठवणी सांगताना तुकाराम मुंढे भावूक
• ‘मेरी मिल्बेन भाजपच्या बाजूनं बोलू शकते, पण OCI कार्डधारक इम्रान खान…’; अभिजित दिपकेंचा हल्लाबोल