प्रतिनिधी, 16 ऑक्टोबर: भारतीय क्रिकेट नियामक मंडळाने (BCCI) न्यूझीलंडविरुद्धच्या आगामी पाच सामन्यांच्या एकदिवसीय मालिकेसाठी भारतीय संघाची घोषणा केली आहे. या दौऱ्यासाठी जाहीर करण्यात आलेल्या संघातून अष्टपैलू रवींद्र जडेजाला डच्चू देण्यात आला आहे. नोव्हेंबर महिन्यात होणारी ही एकदिवसीय मालिका भारताच्या न्यूझीलंड दौऱ्याचा एक भाग आहे.
या मालिकेसाठी दोन स्वतंत्र संघांची निवड करण्यात आली आहे. पहिल्या तीन सामन्यांसाठी शुभमन गिलकडे कर्णधारपद तर श्रेयस अय्यरकडे उपकर्णधारपद सोपवण्यात आले आहे. तसेच, चौथ्या आणि पाचव्या एकदिवसीय सामन्यासाठी श्रेयस अय्यर संघाचे नेतृत्व करेल, तर इशान किशनकडे उपकर्णधारपदाची जबाबदारी असेल.
या एकदिवसीय मालिकेला ४ नोव्हेंबरपासून ऑकलंडच्या ईडन पार्कवर सुरुवात होईल. यानंतर ७ नोव्हेंबरला वेलिंग्टनच्या स्काय स्टेडियमवर दुसरा, तर १० नोव्हेंबरला हॅमिल्टनच्या सेडन पार्कवर तिसरा सामना खेळवला जाईल. मालिकेतील शेवटचे दोन सामने माऊंट माउंगानुई येथील बे ओव्हल मैदानावर अनुक्रमे १३ आणि १५ नोव्हेंबरला पार पडतील.
या एकदिवसीय मालिकेपूर्वी २२ ऑक्टोबर ते १ नोव्हेंबर दरम्यान पाच सामन्यांची टी-२० मालिका खेळवली जाणार आहे. एकदिवसीय मालिकेनंतर भारत आणि न्यूझीलंड यांच्यात दोन कसोटी सामनेही होणार असल्याने हा दौरा सर्व फॉरमॅटचा आणि प्रदीर्घ असणार आहे.
यापूर्वी जानेवारी २०२६ मध्ये भारत आणि न्यूझीलंड यांच्यात भारतात तीन एकदिवसीय सामन्यांची मालिका झाली होती. न्यूझीलंडने ती मालिका २-१ ने जिंकत भारतात पहिल्यांदाच एकदिवसीय मालिका विजयाची नोंद केली होती. वडोदरा येथे झालेला पहिला सामना भारताने ४ गडी राखून जिंकला होता, ज्यात ३०० धावांचे लक्ष्य ६ चेंडू शिल्लक असताना पूर्ण केले होते. मात्र, राजकोटमध्ये न्यूझीलंडने सात गडी राखून विजय मिळवत मालिकेत बरोबरी साधली होती.
इंदूरमध्ये झालेल्या तिसऱ्या आणि निर्णायक सामन्यात न्यूझीलंडने भारताचा ४१ धावांनी पराभव करत मोठा विजय नोंदवला होता. डॅरिल मिशेल आणि ग्लेन फिलिप्स यांच्या शतकांमुळे आणि चौथ्या विकेटसाठी त्यांनी केलेल्या २१९ धावांच्या भागीदारीमुळे न्यूझीलंडने ८ बाद ३३७ धावा केल्या होत्या. प्रत्युत्तरात विराट कोहलीने आपले ५४ वे एकदिवसीय शतक आणि नितीश कुमार रेड्डीने अर्धशतक झळकावूनही भारतीय संघ २९६ धावांत गारद झाला होता.
पहिल्या तीन एकदिवसीय सामन्यांसाठी भारतीय संघ: शुभमन गिल (कर्णधार), रोहित शर्मा, विराट कोहली, श्रेयस अय्यर (उपकर्णधार), केएल राहुल (यष्टीरक्षक), नितीश कुमार रेड्डी, अक्षर पटेल, नमन धीर, अंशुल कंबोज, गुरनूर ब्रार, ऋतुराज गायकवाड, अर्शदीप सिंग, इशान किशन (यष्टीरक्षक), मोहम्मद सिराज, प्रसिद्ध कृष्णा आणि कुलदीप यादव.
चौथ्या आणि पाचव्या एकदिवसीय सामन्यांसाठी भारतीय संघ: श्रेयस अय्यर (कर्णधार), रोहित शर्मा, विराट कोहली, तिलक वर्मा, इशान किशन (यष्टीरक्षक, उपकर्णधार), नितीश कुमार रेड्डी, अक्षर पटेल, नमन धीर, आकिब नबी, गुरनूर ब्रार, ऋतुराज गायकवाड, अर्शदीप सिंग, कुमार कुशाग्र (यष्टीरक्षक), मोहम्मद सिराज, यश ठाकूर आणि कुलदीप यादव.
📌 महत्वाच्या बातम्या
- न्यूझीलंड दौऱ्यासाठी भारताचा कसोटी संघ जाहीर; मोहम्मद शमीला डच्चू
- सुनेत्रा पवारांना अर्थखातं द्या, राष्ट्रवादीची मुख्यमंत्र्यांकडे मागणी; नाराजीच्या चर्चांवर राहुल कुल यांचे स्पष्टीकरण
- भीमनवारांनंतर आता ‘हा’ सदस्य रोहित पवारांच्या रडारवर; थेट नाव घेत म्हणाले- “ते मोठे खिलाडी…”
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
