प्रतिनिधी, 1 नोव्हेंबर: दिवाळीत खरेदी करताना डिजिटल पेमेंटला पसंती देणाऱ्या ग्राहकांसाठी एक महत्त्वाची माहिती आहे. सणासुदीच्या काळात दुकानातून कपडे, मिठाई, इलेक्ट्रॉनिक्स वस्तू किंवा गिफ्ट खरेदी करताना युपीआयने (UPI) पैसे दिल्यास तुम्हाला कोणतेही अतिरिक्त शुल्क देण्याची गरज नाही. युपीआय व्यवहारांवर व्यापाऱ्यांकडून शुल्क आकारले जाण्याच्या चर्चेमुळे ग्राहकांमध्ये संभ्रम निर्माण झाला होता, मात्र नव्या नियमांनुसार हा भुर्दंड ग्राहकांना बसणार नाही.
नॅशनल पेमेंट्स कॉर्पोरेशन ऑफ इंडियाने (NPCI) युपीआयद्वारे केल्या जाणाऱ्या काही व्यापारी व्यवहारांवर मर्चंट डिस्काउंट रेट (MDR) लागू करण्याची तरतूद केली आहे. मात्र, दिवाळीच्या पार्श्वभूमीवर याची अंमलबजावणी दिवाळीनंतर करण्याचा निर्णय एनपीसीआयने घेतला आहे. या नियमानुसार, दोन हजार रुपयांपेक्षा जास्त रकमेच्या पात्र व्यापारी व्यवहारांवर ०.४ टक्के शुल्क आकारण्याची मुभा आहे. हे शुल्क एका व्यवहारामागे जास्तीत जास्त ३०० रुपयांपर्यंतच मर्यादित असेल.
विशेष म्हणजे, दोन हजार रुपये किंवा त्याहून कमी रकमेच्या व्यवहारांवर कोणताही मर्चंट डिस्काउंट रेट लागू होणार नाही. तसेच महिन्याकाठी एक लाख रुपयांपर्यंत पात्र युपीआय पेमेंट घेणाऱ्या छोट्या व्यापाऱ्यांनाही यातून सूट देण्यात आली आहे. सर्वात महत्त्वाचे म्हणजे, हे शुल्क केवळ व्यापाऱ्यांनी भरायचे असून ते ग्राहकांकडून वसूल न करण्याच्या स्पष्ट सूचना बँकांना देण्यात आल्या आहेत. याशिवाय युपीआय ॲप्सना प्लॅटफॉर्म फी किंवा कोणतेही छुपे शुल्क लावण्यास मनाई करण्यात आली आहे.
जर तुम्ही दिवाळीसाठी ३ हजार रुपयांची साडी अथवा २५ हजारांचा टीव्ही युपीआय पेमेंट करून घेतला, तर दुकानदार केवळ डिजिटल पेमेंट केल्यामुळे बिलात अतिरिक्त रक्कम जोडू शकत नाही. तरीही खरेदी करताना ग्राहकांनी बिलाची नीट तपासणी करणे गरजेचे आहे. जर दुकानदाराने युपीआय पेमेंटसाठी जास्तीचे पैसे लावले असतील, तर ग्राहकांनी याबाबत स्पष्टीकरण मागावे. तसेच, बिलाची प्रत आणि पेमेंटचा स्क्रीनशॉट किंवा पावती स्वतःकडे जपून ठेवावी, जेणेकरून पुराव्यांच्या आधारे आवश्यकतेनुसार संबंधित ठिकाणी तक्रार करता येईल.
📌 महत्वाच्या बातम्या
- ऑकलंडच्या नेट सत्रात विराट कोहलीला घाम, युवा गोलंदाज आकिब नबीच्या घातक स्पेलने सतावले
- दिवाळीच्या तोंडावर सर्वसामान्यांना दणका; व्यावसायिक गॅस सिलिंडरच्या दरात मोठी वाढ
- निलेश राणेंच्या इशाऱ्यावर नवनाथ बन यांचा पलटवार; नारायण राणेंसोबतचा फोटो शेअर करत दिलं प्रत्युत्तर
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
