तुरुंगातून बाहेर येताच आझम खान ईडीच्या ताब्यात; जामिनावर सुटताच पुन्हा कारवाई

रामपूर, 1 नोव्हेंबर: समाजवादी पक्षाचे ज्येष्ठ नेते आणि माजी कॅबिनेट मंत्री आझम खान यांना रामपूर जिल्हा कारागृहातून जामिनावर सुटताच अंमलबजावणी संचालनालयाने (ED) ताब्यात घेतले आहे. दोन पॅन कार्ड फसवणूक प्रकरणात तब्बल ११ महिन्यांहून अधिक काळानंतर त्यांची तुरुंगातून सुटका झाली होती. मात्र, जेलच्या गेटबाहेर पाऊल ठेवताच त्यांच्या सुटकेचा आनंद काही मिनिटांतच संपला.

अलाहाबाद उच्च न्यायालयाने आझम खान आणि त्यांचे पुत्र अब्दुल्ला आझम यांना या प्रकरणात जामीन मंजूर केला होता. सुटकेनंतर अब्दुल्ला आझम हे तुरुंगातून थेट आपल्या निवासस्थानी रवाना झाले. मात्र, आझम खान बाहेर येताच केंद्रीय निमलष्करी दलाच्या (CRPF) तुकडीसह तैनात असलेल्या ईडीच्या अधिकाऱ्यांनी त्यांना अडवून गाडीत बसवले. यावेळी आझम खान आणि तपास अधिकाऱ्यांमध्ये तीव्र शाब्दिक वाद झाला.

आझम खान यांच्या स्वागतासाठी कारागृहाबाहेर शेकडो कार्यकर्त्यांनी मोठी गर्दी केली होती. ईडीची वाहने आणि त्यांच्या नेत्यावरील ही कारवाई पाहून समर्थक आक्रमक झाले व त्यांनी जोरदार घोषणाबाजी सुरू केली. ईडीने ही कारवाई २०१९ मध्ये नोंदवलेल्या प्रिव्हेंशन ऑफ मनी लाँड्रिंग ऍक्ट (PMLA – ECIR 2019) अंतर्गत केली आहे.

मौलाना मोहम्मद अली जौहर ट्रस्ट आणि जौहर युनिव्हर्सिटीच्या उभारणीत झालेल्या सुमारे ४१६ कोटी रुपयांच्या अघोषित आणि संशयास्पद आर्थिक व्यवहारांचा तपास ईडीकडून सुरू आहे. याच प्रकरणात नुकतेच २८ ऑक्टोबर रोजी ईडीने या विद्यापीठाची १,१७० कोटी रुपयांची मालमत्ता तात्पुरती जप्त केली होती.

अटकेची प्रक्रिया पूर्ण केल्यानंतर ईडीचे अधिकारी आझम खान यांना गाझियाबाद येथील विशेष पीएमएलए (PMLA) न्यायालयात हजर करणार आहेत. तेथे त्यांच्या रिमांडची मागणी केली जाईल. पुढील वर्षी उत्तर प्रदेशात होणाऱ्या विधानसभा निवडणुकांच्या पार्श्वभूमीवर या राजकीय घडामोडीला अत्यंत महत्त्व प्राप्त झाले आहे.

📌 महत्वाच्या बातम्या

• अर्शदीप सिंगचा विश्वविक्रम, टी-२० आंतरराष्ट्रीय क्रिकेटमध्ये १५० बळींचा टप्पा पार
• न्यूझीलंडचा भारताविरुद्ध T20 मधील सर्वोच्च धावसंख्येचा विश्वविक्रम; इंग्लंडचा रेकॉर्ड मोडला
• २०३० च्या राष्ट्रकुल क्रीडा स्पर्धेसाठी राहुल द्रविड आणि सायना नेहवाल यांच्यावर मोठी जबाबदारी