लातूर जिल्हा बँक निवडणूक: सहकारमंत्री बाबासाहेब पाटील आणि धीरज देशमुख एकाच गाडीतून दाखल

लातूर, 16 ऑक्टोबर: लातूर जिल्हा मध्यवर्ती सहकारी बँकेच्या निवडणुकीत एका लक्षवेधी राजकीय घडामोडीने सर्वांचे लक्ष वेधून घेतले आहे. राज्याचे सहकारमंत्री बाबासाहेब पाटील आणि काँग्रेसचे माजी आमदार धीरज देशमुख हे उमेदवारी अर्ज दाखल करण्यासाठी चक्क एकाच गाडीतून आल्याने जिल्ह्यात नव्या राजकीय समीकरणांची जोरदार चर्चा सुरू झाली आहे.

राष्ट्रवादी काँग्रेसचे प्रदेशाध्यक्ष सुनील तटकरे यांनी नुकतीच एक महत्त्वाची घोषणा करताना सर्व निवडणुका महायुती म्हणून लढवण्याची भूमिका स्पष्ट केली होती. मात्र, त्यांच्या या विधानाच्या दुसऱ्याच दिवशी राज्याचे सहकारमंत्री आणि काँग्रेस नेते एकत्र एकाच वाहनातून प्रवास करताना दिसल्याने तर्कवितर्क लढवले जात आहेत.

सहकारी संस्थांच्या निवडणुकांमध्ये अनेकदा पक्षीय राजकारण बाजूला ठेवून स्थानिक पातळीवरील संबंध आणि सत्तेची सोयीस्कर गणितं जुळवली जातात. त्यामुळे राज्यपातळीवर महायुतीची भूमिका असली तरी, लातुरात सहकाराच्या माध्यमातून या दोन नेत्यांनी नवी राजकीय मोट बांधली आहे का, असा प्रश्न आता उपस्थित होत आहे.

सध्या तरी बाबासाहेब पाटील आणि धीरज देशमुख यांच्या एकत्र येण्यामागील नेमकी रणनीती किंवा राजकीय भूमिका अधिकृतरीत्या स्पष्ट झालेली नाही. आगामी काळात उमेदवारांची निश्चिती, विविध गटांचा समन्वय आणि स्थानिक नेत्यांची भूमिका यावरच जिल्हा बँक निवडणुकीचे अंतिम चित्र ठरणार आहे. मात्र या पहिल्याच अनपेक्षित एन्ट्रीमुळे संपूर्ण जिल्ह्याचे लक्ष या निवडणुकीकडे लागले आहे.

📌 महत्वाच्या बातम्या

• अमरावती शिक्षक मतदारसंघात महायुतीत तणाव; वंचितच्या पाठिंब्यासाठी एकनाथ शिंदेंचा ‘राजगृहा’वर खास दूत
• राजीनाम्यानंतर धर्मेंद्र प्रधान यांची पहिली प्रतिक्रिया; ‘सीजेपी’ आणि राहुल गांधींवर गंभीर आरोप
• प्रदीप पूर्णेकरांच्या हत्येसाठी पप्या शिंदेने चप्पलेऐवजी बूट का घातले? पोलीस तपासात मोठं कारण उघड