आधार कार्डमध्ये घरबसल्या नोंदवा नवीन मोबाईल नंबर, जाणून घ्या १० मिनिटांची सोपी प्रक्रिया

मुंबई, 11 नोव्हेंबर: सध्याच्या काळात सरकारी योजना, बँकिंग आणि इतर ऑनलाइन कामांसाठी आधार कार्ड आणि त्याला लिंक असलेला मोबाईल नंबर अत्यंत महत्त्वाचा ठरतो. अनेकदा जुना नंबर बंद पडल्याने ओटीपी मिळण्यात अडचणी येतात. मात्र, आता आधार सेवा केंद्रात किंवा कागदपत्रांच्या कचाट्यात न अडकता युआयडीएआयच्या (UIDAI) अधिकृत ‘आधार अ‍ॅप’ (Aadhaar App) द्वारे घरबसल्या नवीन मोबाईल नंबर अपडेट करणे शक्य झाले आहे.

स्मार्टफोनवरून ही प्रक्रिया करण्यासाठी अँड्रॉइड (Android) किंवा आयफोनवर (iPhone) हे अधिकृत अ‍ॅप डाउनलोड करावे लागते. अ‍ॅप उघडून भाषा निवडावी आणि आपला १२ अंकी आधार क्रमांक नोंदवावा. त्यानंतर प्रायव्हसी पॉलिसी आणि नियम स्वीकारून अ‍ॅपमध्ये वापरले जाणारे सीम कार्ड (SIM) निवडावे लागते. या टप्प्यावर फेस ऑथेंटिकेशन पूर्ण केल्यानंतर सुरक्षेसाठी ६ अंकी पिन (PIN) सेट करावा.

मोबाईल नंबर बदलण्यासाठी अ‍ॅपमध्ये या ६ अंकी पिनने लॉग-इन करा आणि ‘Services’ मधील ‘Mobile Number Update’ हा पर्याय निवडा. स्क्रीनवरील सर्व सूचना वाचून पुढे जा आणि तुमचा नवीन मोबाईल नंबर तिथे नोंदवा. या नवीन नंबरवर आलेला ओटीपी (OTP) टाकून व्हेरिफिकेशन करा. त्यानंतर पुन्हा एकदा फेस ऑथेंटिकेशन पूर्ण करून ठरलेले शुल्क भरा व अर्ज सबमिट करा.

अर्ज जमा झाल्यानंतर मिळणाऱ्या ‘रिक्वेस्ट आयडी’च्या माध्यमातून अ‍ॅपमधील ‘Track My Request’ पर्यायावर जाऊन अर्जाची स्थिती कधीही तपासता येते. ही ऑनलाइन सुविधा वापरण्यासाठी आधारला आधीपासून जुना मोबाईल नंबर जोडलेला असणे आवश्यक आहे. जर तुमच्याकडे जुन्या नंबरचा अ‍ॅक्सेस नसेल किंवा आधारला कोणताही नंबर जोडलेला नसेल, तर हे अ‍ॅप वापरता येणार नाही. अशावेळी जवळच्या आधार सेवा केंद्रात जाऊन बायोमेट्रिक पद्धतीनेच नंबर अपडेट करावा लागेल.

नवीन मोबाईल नंबर अ‍ॅपद्वारे त्वरित अपडेट होत नाही. युआयडीएआयच्या (UIDAI) नियमांनुसार, ही प्रक्रिया पूर्ण होण्यासाठी साधारण ३० दिवसांपर्यंतचा वेळ लागू शकतो. महत्त्वाचे म्हणजे, या ऑनलाइन अर्जादरम्यान केवळ फेस ऑथेंटिकेशन आणि शुल्क भरणे आवश्यक असते; यासाठी कोणतीही अतिरिक्त कागदपत्रे जमा करण्याची गरज पडत नाही.

📌 महत्वाच्या बातम्या

• दक्षिण आफ्रिका दौऱ्यासाठी भारतीय महिला संघांची घोषणा; स्मृती मानधना कसोटी कर्णधार, जेमिमाचे पुनरागमन
• लाडक्या बहिणींना ऑक्टोबरचे १५०० रुपये कधी मिळणार? हप्त्याबाबत महत्त्वाची माहिती समोर
• आयपीएल घोषणेपूर्वीच अर्शदीप सिंगच्या मुंबई इंडियन्स प्रवेशावर वडिलांचे शिक्कामोर्तब