तुळशी विवाह २०२६: २१ नोव्हेंबरला रंगणार सोहळा; जाणून घ्या शुभ मुहूर्त आणि पूजेची संपूर्ण विधी

प्रतिनिधी, 11 नोव्हेंबर: हिंदू धर्मशास्त्रानुसार दरवर्षी कार्तिक महिन्यातील शुक्ल पक्षाच्या द्वादशीला तुळशीचा शालिग्राम देवाशी विवाह लावला जातो. २०२६ सालात हा विवाह सोहळा शनिवार, २१ नोव्हेंबर रोजी पार पडणार आहे. काही ठिकाणी देवउठनी एकादशीपासून कार्तिक पौर्णिमेपर्यंत असे सलग पाच दिवस या उत्सवाचे आयोजन केले जाते.

पंचांगानुसार, २१ नोव्हेंबर २०२६ रोजी तुळशी विवाहासाठी संध्याकाळी ५ वाजून २५ मिनिटांपासून ते ७ वाजून ४९ मिनिटांपर्यंतचा काळ शुभ राहील. या दिवशी पहाटे ४ वाजून ४० मिनिटे ते ५ वाजून ३० मिनिटांपर्यंत ब्रह्म मुहूर्त असेल. तसेच दुपारी ११ वाजून ४२ मिनिटे ते १२ वाजून २८ मिनिटांपर्यंत अभिजित मुहूर्त असणार आहे.

तुळशी विवाह केल्याने कन्यादानाच्या पुण्याइतकेच फळ मिळते, अशी मान्यता आहे. यामुळे घरात सुख-समृद्धी आणि आनंद नांदतो. ज्या कुटुंबांमध्ये वाद किंवा वैवाहिक जीवनात समस्या आहेत, त्यांच्यासाठी हा विवाह सोहळा करणे विशेष लाभदायक ठरते.

पूजेच्या तयारीसाठी सर्वप्रथम तुळशी वृंदावन स्वच्छ करून त्याला गेरू आणि रांगोळीने सजवावे. तुळशीला हळद-कुंकू लावून वृंदावनाभोवती फुले, आंब्याची पाने आणि उसाचा मंडप उभारावा. यानंतर तुळशी मातेला वधूप्रमाणे सजवण्यासाठी लाल किंवा पिवळे वस्त्र, फुलांचा हार, कुंकू, बांगड्या आणि इतर सौभाग्य अलंकार अर्पण करावेत.

तुळशीशेजारी एका पाटावर श्रीकृष्णाची मूर्ती स्थापन करून त्यांना पिवळे वस्त्र, चंदन व फुले वाहावीत. हळद, कुंकू, अक्षता, धूप, दीप लावून विधिवत पूजा करावी आणि कुटुंबाच्या सुख-शांतीसाठी प्रार्थना करावी.

विधीनुसार तुळशी माता आणि शालिग्राम यांच्यात अंतरपाट धरून मंगलाष्टके म्हणावीत. अक्षता टाकून पारंपरिक पद्धतीने विवाह सोहळा पूर्ण करावा. यामध्ये शालिग्रामासोबत तुळशीला सात फेरेही दिले जातात. विवाह सोहळ्यानंतर आरती करावी आणि गोड पदार्थांचा नैवेद्य दाखवून सर्वांना प्रसाद वाटावा.

📌 महत्वाच्या बातम्या

• न्यूझीलंडविरुद्ध विराट कोहलीने मोडला रिकी पाँटिंगचा सर्वात मोठा वनडे विक्रम
• मोहम्मद शमीच्या कसोटी निवृत्तीनंतर रवी शास्त्री नाराज; अजित आगरकर, गौतम गंभीर यांच्यावर निशाणा
• सोलापूर: आडेगावच्या बिरोबा यात्रेत मराठा आणि लक्ष्मण हाकेंच्या समर्थकांमध्ये राडा, तुंबळ हाणामारी