प्रतिनिधी, 11 नोव्हेंबर: दिवंगत उपमुख्यमंत्री अजित पवार यांच्या विमान अपघातावरून राष्ट्रवादी काँग्रेसचे माजी आमदार अमोल मिटकरी यांनी महायुती सरकारला घरचा आहेर दिला आहे. या प्रकरणातील महत्त्वाचा पुरावा असलेले देवगिरी निवासस्थानावरील सीसीटीव्ही फुटेज शोधू न शकणारे सरकार ‘निरुपयोगी’ असल्याची जोरदार टीका त्यांनी केली आहे. तसेच, मृत्यूला नऊ महिने उलटूनही मुख्यमंत्री देवेंद्र फडणवीस यांनी या प्रकरणाची सीबीआय चौकशी का केली नाही, असा सवाल त्यांनी विचारला आहे.
म्हैसपूर येथील स्वतःच्या शेतात आयोजित करण्यात आलेल्या ‘बळी महोत्सव’ या कार्यक्रमात शेतकऱ्यांसमोर बोलताना मिटकरी यांनी हे गंभीर आरोप केले. अजितदादांचे मित्र म्हणवून घेणाऱ्या मुख्यमंत्र्यांवर त्यांनी थेट निशाणा साधला. यासोबतच अजित पवारांचा अपघात नसून घातपात झाल्याच्या दाव्याचा त्यांनी पुन्हा एकदा पुनरुच्चार केला.
मृत्यूबाबत संशय व्यक्त करताना मिटकरी यांनी अनेक प्रश्न उपस्थित केले आहेत. आदल्या दिवशी रस्ते मार्गाने जाण्याचे निश्चित झालेले असताना, अजित पवारांना तो निर्णय ऐनवेळी बदलायला लावणारे कोण होते? शेवटच्या क्षणी विमान प्रवासाचा सल्ला कोणी दिला? तसेच विमानाचे पायलट आणि ‘क्रू मेंबर्स’ बदलवणारे कोण आहेत, असे सवाल त्यांनी केले.
दरम्यान, आगामी ‘महाराष्ट्र एपस्टीन फाईल’ या चित्रपटाच्या दिग्दर्शकाला आपण काही पुरावे दिल्याचेही माजी आमदार मिटकरी यांनी म्हटले आहे. अजितदादांच्या मृत्यूपूर्वी आणि मृत्यूनंतर अघोरी पूजा करणाऱ्यांसंदर्भात हे पुरावे आहेत. खरातच्या आश्रमात स्वतःच्या करंगळ्या कापणारे लोक कोण होते, याचा शोध घेण्याचे आवाहनही त्यांनी केले. मिटकरी यांनी स्वपक्षीयांच्या सरकारवर केलेल्या या कठोर टीकेमुळे महायुतीतील घटक पक्षांमध्ये तीव्र पडसाद उमटण्याची शक्यता आहे.
📌 महत्वाच्या बातम्या
- दक्षिण आफ्रिका दौऱ्यासाठी भारतीय महिला संघांची घोषणा; स्मृती मानधना कसोटी कर्णधार, जेमिमाचे पुनरागमन
- लाडक्या बहिणींना ऑक्टोबरचे १५०० रुपये कधी मिळणार? हप्त्याबाबत महत्त्वाची माहिती समोर
- आयपीएल घोषणेपूर्वीच अर्शदीप सिंगच्या मुंबई इंडियन्स प्रवेशावर वडिलांचे शिक्कामोर्तब
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
