जालना, 22 नोव्हेंबर: जालना येथे पार पडलेल्या रिपब्लिकन सेनेच्या २८ व्या वर्धापन दिन सोहळ्यात बोलताना संस्थापक अध्यक्ष आनंदराज आंबेडकर यांनी दिवंगत उपमुख्यमंत्री अजित पवार यांच्याबाबत एक असंवेदनशील विधान केले आहे. राज्यातील दुष्काळी परिस्थिती आणि पाणीटंचाईच्या मुद्द्यावरून त्यांनी राज्यकर्त्यांवर निशाणा साधला.
या कार्यक्रमात बोलताना आंबेडकर यांनी, “आपले राज्यकर्ते म्हणतात की पाणी आडवा, पाणी जिरवा. जिथे पाऊसच पडत नाही, तिथे तलाव भरण्यासाठी अजितदादांना आणायचं का?” असा उपहासात्मक प्रश्न विचारला. त्यांच्या या वक्तव्यामुळे राजकीय वर्तुळात नवा वाद निर्माण होण्याची शक्यता आहे.
या सोहळ्यासाठी राज्यभरातून मोठ्या संख्येने पदाधिकारी उपस्थित होते. दरम्यान, पत्रकारांशी संवाद साधताना आनंदराज आंबेडकर यांनी आपल्या विधानावर स्पष्टीकरण दिले. अजित पवार यांनी पाण्याच्या संदर्भात यापूर्वी केलेल्या विधानाचा आपण केवळ उपरोधिकपणे उल्लेख केल्याचे त्यांनी स्पष्ट केले.
राज्यातील दुष्काळी परिस्थितीच्या प्रश्नावर आगामी काळात तालुकानिहाय बैठका घेण्यात येतील, अशी माहिती आंबेडकर यांनी दिली. तसेच, या बैठकांनंतर दुष्काळाच्या प्रश्नावर मोठे जनआंदोलन उभारण्याचा इशाराही त्यांनी दिला आहे.
सद्यस्थितीत रिपब्लिकन सेनेचे अध्यक्ष आनंदराज आंबेडकर यांची राज्याचे उपमुख्यमंत्री एकनाथ शिंदे यांच्या शिवसेनेसोबत युती आहे. मुंबई महापालिकेच्या निवडणुकीत या दोन्ही पक्षांनी त्यांच्या युतीची ताकद दाखवून दिली होती. निकालानंतर दलित मतांचे समीकरण साधण्यात ही युती यशस्वी झाल्याचे राजकीय जाणकारांनी स्पष्ट केले होते.
📌 महत्वाच्या बातम्या
- अवैध मुरूम वाहतूक रोखणाऱ्या दिव्यांग ग्राम महसूल अधिकाऱ्याला धक्काबुक्की; हायवा मालक व चालकावर गुन्हा
- ऑपरेशन सिंदूरदरम्यान चीन पाकिस्तानसोबत का उभा राहिला? अमेरिकी अहवालातून धक्कादायक माहिती उघड
- ऑस्ट्रेलिया-इंग्लंड टी-२० सामन्यात पदार्पणवीर लॅचलन शॉचा हवेत झेपावत अफलातून झेल








