बीड, 14 नोव्हेंबर: बीडच्या गेवराई तालुक्यातील ४० गावांसाठी जायकवाडी धरणातून स्वतंत्र कालवा काढण्यात यावा, या मागणीसाठी सध्या आंदोलन सुरू आहे. याच लोकलढा आंदोलनाच्या एका बैठकीत बीडचे खासदार बजरंग सोनवणे यांच्या भाषणापूर्वीच एका तरुणाने माईक हातात घेत पाण्याचा प्रश्न सोडवण्यासाठी पुढाकार घेण्याची थेट मागणी केली.
गेवराई तालुक्यातील शिंगारवाडी येथील मंदिर परिसरात या लोकलढा बैठकीचे आयोजन करण्यात आले होते. या बैठकीला खासदार बजरंग सोनवणे उपस्थित होते. मात्र, त्यांचे भाषण सुरू होण्यापूर्वीच गावातील मनीष शेळके या तरुणाने माईक घेतला आणि तो थेट खासदारांशी बोलू लागला. बीडमध्ये रेल्वे आणल्याचे श्रेय अनेक जण घेतात, आता तुम्ही आमच्या पाण्यासाठी लढा उभारा, अशी साद या तरुणाने घातली.
बाप्पांनी आम्हाला खरोखरच पाणी आणून दिले, असे आम्ही लोकांना अभिमानाने सांगू, असे मनीष शेळके म्हणाला. या प्रश्नावर आपण आपल्याला शंभर वेळा फोन केला असून, आता तुम्ही इथे आला आहात तर आमचा प्रश्न सोडवाच, अशी मागणी त्याने केली. खासदारांच्या भाषणाआधीच घडलेल्या या प्रकाराची सध्या जोरदार चर्चा सुरू आहे.
दरम्यान, पावसाने पाठ फिरवल्याने दुष्काळाच्या झळा सोसणाऱ्या मराठवाड्यासाठी एक दिलासादायक बातमी आहे. जायकवाडी प्रकल्पाच्या डाव्या आणि उजव्या कालव्यातून पाण्याचे पहिले आवर्तन सोडण्यात आले असून, हे पाणी आज परभणी जिल्ह्यात दाखल झाले आहे.
पाण्याच्या या आवर्तनामुळे हजारो हेक्टरवरील रब्बी हंगामातील पिकांना सिंचनासाठी मोठा फायदा होणार आहे. तसेच, जनावरांच्या चाऱ्याचा आणि पिण्याच्या पाण्याचा प्रश्न काही प्रमाणात सुटण्याची आशा निर्माण झाली आहे. पावसाअभावी कोरडे पडलेले नदी-नाले आणि पाणीटंचाईचा सामना करणाऱ्या ग्रामीण भागाला या पाण्यामुळे मोठा आधार मिळणार आहे.
📌 महत्वाच्या बातम्या
- डिलिमिटेशन विधेयकासाठी भाजपला राष्ट्रवादीचे १५-१६ खासदार हवेत; पृथ्वीराज चव्हाणांचा मोठा गौप्यस्फोट
- अमेरिकेत सर्व विमान उड्डाणे अचानक ठप्प; ७ हजार विमानांना फटका, हजारो प्रवासी अडकले
- मीही राष्ट्रवादीत काम केलंय, बरंच काही बोलू शकतो; शिंदेसेनेच्या मंत्र्याचा सुनील तटकरेंना सूचक इशारा
