नव्या वर्षाची (२०२६) सुरुवात कशी असावी, याचं उत्तम उदाहरण आज टीम इंडियाच्या ‘या’ पठ्ठ्याने घालून दिलंय. ज्याची चर्चा गेले अनेक दिवस सुरू होती, तोच अभिषेक शर्मा (Abhishek Sharma) आज नागपूरच्या मैदानात असा काही तळपला की, त्याने थेट आपला गुरु आणि सिक्सर किंग युवराज सिंगलाच मागे टाकलं. भारताची अवस्था बिकट असताना अभिषेकने केलेली फटकेबाजी पाहून स्टेडियममध्ये एकच जल्लोष झाला.
नागपूरच्या विदर्भ क्रिकेट असोसिएशन स्टेडियमवर न्यूझीलंडने टॉस जिंकून भारताला बॅटिंगला बोलावलं. सुरुवातीलाच भारताला मोठे धक्के बसले. संजू सॅमसन (१०) आणि ७८५ दिवसांनी परतलेला ईशान किशन (८) स्वस्तात माघारी परतले. धावफलकावर २ बाद २७ अशी नाजूक परिस्थिती असताना, प्रेक्षकांचे श्वास रोखले गेले होते. पण, असं असलं तरी अभिषेक शर्माने हार मानली नाही. त्याने कॅप्टन सूर्यकुमार यादवच्या साथीने किवी गोलंदाजांची अक्षरशः पिसं काढली.
Abhishek Sharma Breaks Yuvraj Record
या सामन्यात अभिषेकने फक्त २२ चेंडूत ५० धावा कुटल्या. २०२२ च्या स्टाईलने खेळताना त्याने ४ खणखणीत चौकार आणि ४ उत्तुंग षटकार लगावले. विशेष म्हणजे, २०२६ या वर्षात आंतरराष्ट्रीय टी-२० मध्ये अर्धशतक झळकावणारा तो पहिला भारतीय फलंदाज ठरला आहे. त्याचा २२७.२७ चा स्ट्राईक रेट पाहून किवी बॉलरही अवाक झाले.
अभिषेकने आज चक्क युवराज सिंगचा (Yuvraj Singh) टी-२० मधील षटकारांचा विक्रम मोडीत काढला. या सामन्यापूर्वी त्याला युवराजला मागे टाकण्यासाठी फक्त २ सिक्स हवे होते. डावाच्या पाचव्या ओव्हरमध्ये काईल जेमिसनला पहिल्याच बॉलवर सिक्स मारत त्याने हा पराक्रम केला. युवराजने ५८ सामन्यांत ७४ षटकार मारले होते, तर अभिषेकने हा पल्ला अवघ्या ३४ व्या सामन्यातच गाठला आहे. त्यामुळेच आता “शिष्य गुरुपेक्षा वरचढ ठरला,” अशी चर्चा क्रिकेट वर्तुळात रंगली आहे.
दुसरीकडे, अभिषेक आणि सूर्याच्या या भागीदारीमुळे भारताचा डाव सावरला असून, न्यूझीलंडसमोर आता तगड्या आव्हानाची शक्यता निर्माण झाली आहे.
📌 महत्वाच्या बातम्या
- ‘जिंकायचं असेल तर त्याला टीममधून हाकला’; बाबर आझमची पुन्हा लाज काढली
- Ind vs Nz: ७८५ दिवसांनी परतला, पण ५ बॉलमध्ये संपला; ईशान किशनची निराशाजनक एन्ट्री
- Gold Rate : एका दिवसात २५०० रुपयांचा भडका! सोनं दीड लाखांच्या उंबरठ्यावर, जाणून घ्या नवा भाव!
