भाव गडगडल्याने शेतकऱ्याने तीन एकर उभ्या कोबीवर फिरवला रोटावेटर

लासलगाव, 5 ऑक्टोबर: बाजारभावातील घसरणीचा मोठा फटका बसल्याने येवला तालुक्यातील एका शेतकऱ्याने आपल्या तीन एकर क्षेत्रातील उभ्या कोबीच्या पिकावर रोटावेटर फिरवला आहे. गुलाबराव सोनवणे असे या शेतकऱ्याचे नाव असून, बाजारात अवघा दोन रुपये किलो इतका नीचांकी भाव मिळत असल्याने त्यांनी हे टोकाचे पाऊल उचलले.

दुष्काळी परिस्थिती असतानाही सोनवणे यांनी पाण्याचे नियोजन करून तीन एकर शेतात कोबीची लागवड केली होती. या पिकासाठी त्यांनी रोपे, मजुरी, रासायनिक खते, कीटकनाशके, निंदणी आणि ट्रॅक्टरच्या मशागतीवर सुमारे तीन लाख रुपयांचा खर्च केला होता. पीक काढणीला आल्यानंतर सुरुवातीला कोबीला चांगला दर मिळेल, अशी त्यांची अपेक्षा होती.

सुरुवातीला कोबीला सुमारे साडेसहा रुपये प्रति किलोचा भाव मिळाला. त्यावेळी १२ टन कोबीची एक गाडी बाजारात पाठवून त्यांना ८० हजार रुपये मिळाले. मात्र, त्यानंतर बाजारात आवक अचानक वाढल्याने कोबीच्या दरात मोठी घसरण झाली. दर थेट दोन रुपये किलोपर्यंत खाली आल्याने उर्वरित पीक बाजारात पाठवणेही परवडेनासे झाले.

मजुरी, खते आणि मशागतीचा एकूण खर्च पाहता केवळ दोन रुपये किलोच्या दरातून उत्पादन खर्चही वसूल होणे अशक्य झाले. उभ्या पिकातून काहीच आर्थिक फायदा होणार नसल्याचे लक्षात आल्यानंतर, सोनवणे यांनी आधी कोबीच्या शेतात जनावरांसाठी मेंढ्या सोडल्या आणि त्यानंतर रोटावेटरच्या साहाय्याने उर्वरित संपूर्ण पीक नष्ट केले.

📌 महत्वाच्या बातम्या

• निवडणूक आयोगाच्या कामकाजावर माजी न्यायमूर्ती नरीमन यांची गंभीर चिंता; ‘एसआयआर’ प्रक्रियेवर उपस्थित केले प्रश्न
• नरेंद्र मोदी जानेवारीनंतर सत्तेत नसतील; संजय राऊतांचा भाजपसह एकनाथ शिंदेंवर घणाघात
• एमपीएससी विद्यार्थ्यांच्या आंदोलनाला यश; आयोगाच्या अध्यक्षांवर कारवाईसाठी राज्यपालांकडे समितीची शिफारस

📰 पूर्ण बातमीचा Newspaper फोटो तयार करा