प्रतिनिधी, 22 नोव्हेंबर: नोव्हेंबर महिना सरत असून डिसेंबरची सुरुवात होत असताना देशभरात हवामानाचे संमिश्र स्वरूप पाहायला मिळत आहे. भारतीय हवामान विभागाने (आयएमडी) देशातील १० राज्यांमध्ये पुढील २४ तासांत मुसळधार ते अतिमुसळधार पावसाचा इशारा दिला असून, या पार्श्वभूमीवर हाय अलर्ट जारी केला आहे.
हवामान विभागाच्या माहितीनुसार, ईशान्येकडील राज्यांमध्ये पावसाचा जोर वाढणार आहे. आसाम, मेघालय, नागालँड, मणिपूर, मिझोरम आणि त्रिपुरा या राज्यांसह एकूण दहा राज्यांमध्ये पुढील २४ तासांत अतिमुसळधार पावसाची शक्यता वर्तवण्यात आली आहे. या भागात पूरस्थिती निर्माण होऊ शकते, असा स्पष्ट इशाराही हवामान विभागाने दिला आहे.
दुसरीकडे, उत्तर भारतात पुढील दोन ते तीन दिवसांत थंडीचा कडाका आणखी वाढण्याची शक्यता आहे. सरासरी तापमानात दोन ते तीन अंश सेल्सिअसने घट होण्याचा अंदाज आहे. त्यामुळे पंजाब, दिल्ली, हिमाचल प्रदेश आणि हरियाणा या राज्यांमध्ये गारठा चांगलाच वाढणार आहे.
महाराष्ट्रातही थंडीची चाहूल लागली असून उत्तर महाराष्ट्र आणि पुणे जिल्ह्यात तापमानात मोठी घट नोंदवली गेली आहे. राज्याच्या इतर जिल्ह्यांमध्येही गारठा वाढत असून, बहुतांश भागात आकाश निरभ्र राहण्याची शक्यता आहे. आगामी काळात राज्यात थंडी आणखी वाढेल. मात्र, चक्रीवादळाच्या प्रभावामुळे राज्यातील काही जिल्ह्यांत पावसानेही हजेरी लावली आहे.
एकीकडे राज्यात थंडी वाढत असताना, गोंदिया जिल्ह्यात मात्र सलग दुसऱ्या दिवशी पावसाचे वातावरण आहे. कालपासून जिल्ह्यात सतत रिमझिम पाऊस सुरू आहे. या पावसामुळे गोंदियातील धान पिकाला मोठा फटका बसण्याची शक्यता निर्माण झाली आहे.
📌 महत्वाच्या बातम्या
- हवामान विभागाचा अलर्ट: महाराष्ट्रात थंडीचा कडाका वाढला, रविवारी विदर्भात पावसाची शक्यता
- अमोल कोल्हे-छगन भुजबळ भेटीत गैर काय? सुप्रिया सुळेंनी स्पष्ट केली भूमिका
- डायल 112 ते GPS ट्रॅकिंग: उद्धव ठाकरेंच्या कार्यकाळात पोलिसांच्या सुविधांकडे दुर्लक्ष; देवेन भारतींचा दावा








