प्रतिनिधी, 22 नोव्हेंबर: अक्वान चक्रीवादळाचा प्रभाव आणि उत्तरेकडून वाहणाऱ्या थंड, कोरड्या वाऱ्यांमुळे संपूर्ण महाराष्ट्रात थंडीचा कडाका वाढला आहे. नोव्हेंबरच्या उत्तरार्धात राज्याच्या किमान तापमानात लक्षणीय घट नोंदवली जात असून, पहाटेच्या वेळी धुके आणि दवबिंदू पाहायला मिळत आहेत. उत्तर महाराष्ट्रात तर पारा थेट ६ अंश सेल्सिअसपर्यंत घसरला आहे. दिवसा उन्हाचा चटका आणि रात्री गारवा अशा दुहेरी हवामानाचा सामना नागरिकांना करावा लागत आहे. हवामान विभागाने २२ नोव्हेंबरसाठी राज्याचा सविस्तर अंदाज वर्तवला आहे.
हवामान विभागाच्या अंदाजानुसार, कोकणातील पालघर, ठाणे, मुंबई, रायगड, रत्नागिरी आणि सिंधुदुर्ग या जिल्ह्यांमध्ये हवामानात चढ-उतार पाहायला मिळतील. येथे कमाल तापमान ३३ अंश आणि किमान तापमान १७ अंश सेल्सिअसच्या घरात राहील. दिवसा दमट आणि उष्ण वातावरण असले तरी पहाटे गुलाबी थंडी जाणवेल. दुसरीकडे, उत्तर महाराष्ट्रातील धुळे, जळगाव आणि नाशिक जिल्ह्यांत थंडीचा जोर अधिक आहे. या पट्ट्यात काही ठिकाणी किमान तापमान ६ अंशांवर आले आहे. तर सरासरी कमाल तापमान २९ अंश आणि किमान तापमान १७ अंश सेल्सिअस राहील. पहाटे पडणारे दव शेतीला पूरक असले तरी वाढत्या थंडीमुळे नागरिकांना हुडहुडी भरत आहे.
पुण्यासह अहिल्यानगर, सातारा, सांगली, सोलापूर आणि कोल्हापूर जिल्ह्यांमध्ये किमान तापमानात दोन ते तीन अंशांची घट झाली आहे. येथे कमाल तापमान २९ आणि किमान तापमान १७ अंशांच्या आसपास राहण्याची शक्यता आहे. मराठवाड्यातील छत्रपती संभाजीनगर, जालना, परभणी, बीड, हिंगोली, नांदेड, लातूर आणि धाराशिव या जिल्ह्यांमध्येही रात्रीच्या तापमानात घट होऊन गारवा वाढला आहे. या भागात कमाल तापमान २८ अंश आणि किमान तापमान १७ अंश सेल्सिअसच्या आसपास राहण्याचा अंदाज आहे.
विदर्भात २२ नोव्हेंबरला कमाल तापमान २८ अंश तर किमान तापमान २१ अंश सेल्सिअसच्या घरात असेल. मात्र, आगामी काही दिवसांत येथील पारा १३ अंशांपर्यंत खाली येऊन थंडीचा जोर वाढण्याची शक्यता आहे. संपूर्ण राज्यात किमान तापमानात सरासरी दोन ते तीन अंशांची घसरण झाली आहे. दिवसा उकाडा आणि रात्री थंडी अशा विषम वातावरणामुळे सर्दी, खोकला तसेच श्वसनाचे त्रास वाढण्याची भीती आहे. त्यामुळे नागरिकांनी पहाटे वा रात्री बाहेर पडताना उबदार कपड्यांचा वापर करून आरोग्याची काळजी घ्यावी, असे आवाहन करण्यात आले आहे.
📌 महत्वाच्या बातम्या
- स्वारगेट शिवशाही बस अत्याचार प्रकरण: न्यायालयात साक्ष देताना पीडितेला अश्रू अनावर, कामकाज तहकूब
- २२ नोव्हेंबरला संपूर्ण राज्य अंधारात बुडणार; ७५ जिल्ह्यांची वीज खंडीत करून होणार ‘मॉक ड्रिल’
- IND vs NZ 1st Test: ऋषभ पंतचं झंझावाती शतक, लंचच्या एका चेंडूआधी विकेट; भारताची भक्कम आघाडी








