‘हा अघोरी बाबा कुठे मिळतो, हे त्यांनाच विचारा’; डीसीसी बँक निवडणुकीच्या वादातून शंभूराज देसाईंचा जयकुमार गोरेंवर पलटवार

साताऱ्यात जिल्हा मध्यवर्ती बँक निवडणुकीवरून मंत्री शंभूराज देसाई आणि जयकुमार गोरे यांच्यातील शाब्दिक वाद पुन्हा उफाळून आला आहे.

Published On: 

Shambhuraj Desai and Jaykumar Gore political clash

सातारा, 22 नोव्हेंबर: साताऱ्यात महायुतीमधील भाजप आणि शिवसेना नेत्यांमधील संघर्ष पुन्हा चव्हाट्यावर आला आहे. साताऱ्याचे पालकमंत्री शंभूराज देसाई यांनी भाजप नेते आणि मंत्री जयकुमार गोरे यांच्या विधानावर मिश्कील पलटवार केला आहे. ‘हा अघोरी बाबा कुठे मिळतो हे गोरे यांनाच विचारावे लागेल. त्यांना त्याचा इलाज लागू पडला असेल, तर मी त्यांच्याकडून माहिती घेईन,’ असा टोला देसाई यांनी लगावला.

साताऱ्यात जिल्हा परिषद आणि पंचायत समिती निवडणुकांपासूनच दोन्ही पक्षांत वाद पाहायला मिळत आहे. जिल्हा परिषद अध्यक्षपदाच्या निवडीवेळी मोठा गोंधळ उडाला होता आणि त्यात मंत्री देसाईंना पोलिसांकडून धक्काबुक्कीही झाली होती. जिल्हा परिषदेची ती जखम जिल्हा मध्यवर्ती बँकेच्या (DCC) निवडणुकीत भरून निघाली, असा संदर्भ देत देसाईंनी सुरुवातीला नाव न घेता टीका केली होती. ‘काही जखमा वरवर बऱ्या झाल्यासारख्या दिसतात, पण खोलवर असलेल्या जखमा लवकर बऱ्या होत नाहीत, त्यासाठी जालीम औषध लागते,’ असे देसाई म्हणाले होते.

देसाईंच्या या ‘जालीम औषध’ विधानाला जयकुमार गोरे यांनी ‘अघोरी विद्येचा’ दाखला देत उत्तर दिले होते. ‘जखमांवर जालीम औषध लावले पाहिजे हे अगदी बरोबर आहे. पण कधी कधी अघोरी विद्येने जखमेला औषध द्यायचा प्रयत्न केल्यास ती बरी होतेच असे नाही, किंबहुना त्याचे परिणाम आणखी गंभीर होतात, हे समजून घेतले पाहिजे,’ असे गोरे म्हणाले होते. याच टीकेला आता देसाईंनी अघोरी बाबाचा संदर्भ देत प्रत्युत्तर दिले आहे.

‘दम होता तर निवडणूक एकट्याने लढवायची,’ या गोरे यांच्या विधानाचाही देसाई यांनी समाचार घेतला. आम्ही कधीही दमाची भाषा केली नाही, पण कोणी वारंवार तसे बोलत असेल तर आकडेवारी सर्व काही स्पष्ट करते आणि यावर जाहीर चर्चा करण्याची आपली तयारी असल्याचे देसाई यांनी ठणकावून सांगितले.

तालुक्याच्या ११ पैकी ७ जागांवर राष्ट्रवादी काँग्रेस आणि शिवसेना युतीने विजय मिळवला आहे. जिल्हा गटातील ५ जागांवरही हेच ठरावधारक मतदान करणार असल्याने आमची बाजू भक्कम असल्याचा दावा देसाई यांनी केला. महायुतीचे अध्यक्ष आणि उपाध्यक्ष निवडून आल्याचा सर्वांना आनंद आहे. तसेच गोरे हे मंत्रिमंडळातील सहकारी असल्याने त्यांच्या स्वबळावरील निवडणुकीच्या वक्तव्यावर आपण अधिक भाष्य करणार नसल्याचेही देसाई यांनी स्पष्ट केले.

📌 महत्वाच्या बातम्या

MHD News

सत्य, निष्पक्षता आणि नव्या दृष्टिकोनाची कास धरत, 'महाराष्ट्र देशा' प्रत्येक घटनेचं प्रामाणिक रिपोर्टिंग करत आले आहे. अचूक आणि वेगवान बातम्या लोकांपर्यंत पोहोचवणे हे आमचे ध्येय आहे.

🕘 संबंधित बातम्या

Maharashtra Desha App Logo

महाराष्ट्र देशा App डाउनलोड करा

ताज्या बातम्या सर्वात आधी — Notifications सकट!

★★★★★ 4.8 (12K+ reviews)
🔔 Breaking Alerts 📖 Offline वाचा 🎙️ Audio News 📺 Live TV

FREE पूर्णपणे मोफत — कोणतेही Subscription नाही