“एमएस धोनीने आमचे ५० टक्के काम सोपे केले”: युझवेंद्र चहलने सांगितला ‘कॅप्टन कूल’चा मोठा वाटा

प्रतिनिधी, 15 ऑक्टोबर: भारताचा माजी कर्णधार महेंद्रसिंह धोनी केवळ एक उत्तम फलंदाज आणि नेताच नव्हता, तर गोलंदाजांसाठी एक उत्कृष्ट मार्गदर्शकही होता. भारतीय लेग-स्पिनर युझवेंद्र चहलने आकाश चोप्राच्या यूट्यूब चॅनेलवरील संवादादरम्यान धोनीच्या या योगदानाबद्दल मोठा खुलासा केला आहे. यष्टीमागून खेळपट्टी आणि फलंदाजांना अचूक ओळखण्याच्या धोनीच्या क्षमतेमुळे चहल आणि कुलदीप यादव यांच्यासाठी गोलंदाजी करणे अत्यंत सोपे झाल्याचे त्याने म्हटले आहे.

चहलने स्पष्ट केले की, धोनीच्या अनुभवामुळे या दोन्ही फिरकीपटूंना सामन्यातील परिस्थिती समजण्यास आणि विकेट्स काढण्यास मोठी मदत झाली. पांढऱ्या चेंडूच्या क्रिकेटमध्ये भारताची सर्वात प्रभावी फिरकी जोडी बनण्यात धोनीचा मोठा वाटा होता. आकाश चोप्राशी बोलताना चहल म्हणाला, "धोनीमुळे माझे आणि कुलदीपचे ५० टक्के काम सोपे व्हायचे. आपल्या अनुभवाच्या जोरावर ते यष्टीमागून खेळपट्टीचा अचूक अंदाज घ्यायचे आणि आम्हाला मार्गदर्शन करायचे. ते आम्हाला केवळ यष्टीवरच चेंडू टाकण्याचा सल्ला द्यायचे आणि अतिरिक्त काहीही न करण्यास सांगायचे. त्यांच्या या सल्ल्याचे पालन केल्यावर फलंदाज आपोआप बाद व्हायचे."

फेब्रुवारी २०१८ मध्ये दक्षिण आफ्रिका दौऱ्यावरील सेंच्युरियन येथील दुसऱ्या एकदिवसीय सामन्यातील खास आठवणही चहलने शेअर केली. या सामन्यात त्याने २२ धावांत ५ बळी घेतले होते, तर कुलदीपने ३ बळी घेतले होते. त्यांच्या या कामगिरीमुळे दक्षिण आफ्रिकेचा संघ अवघ्या ११८ धावांत सर्वबाद झाला होता आणि भारताने ९ गडी राखून मोठा विजय मिळवला होता. या सामन्यात आफ्रिकेचा फलंदाज जेपी ड्युमिनीला बाद करण्यात धोनीने महत्त्वाची भूमिका बजावली होती.

याबाबत सांगताना चहल म्हणाला, "२०१८ मध्ये सेंच्युरियनमध्ये जेव्हा मी पाच बळी घेतले होते, तेव्हा जेपी ड्युमिनी फलंदाजी करत होता. त्यावेळी धोनीने मला यष्टीवरच मारा करण्यास आणि परिस्थितीनुसार गती बदलण्यास सांगितले. ड्युमिनीने दुसऱ्या-तिसऱ्या चेंडूवर स्वीप मारण्याचा प्रयत्न केला, तेव्हा मी संथ गतीने चेंडू टाकला आणि तो एलबीडब्ल्यू (LBW) बाद झाला. आमच्या यशात त्यांचे खूप मोठे योगदान आहे, ते आमच्या गोलंदाजी फळीसाठी ऑन-फिल्ड प्रशिक्षकच होते."

धोनीच्या निवृत्तीचा आपल्या आणि कुलदीपच्या कामगिरीवर परिणाम झाल्याची कबुलीही चहलने दिली. तो म्हणाला, "धोनीने आम्हाला परिस्थिती हाताळण्यासाठी परिपक्व बनवले होते. आम्हाला काय करायचे आहे हे माहीत होते, पण नक्कीच त्यांच्या नसण्याने फरक पडला. मात्र, त्यांनी मला आणि कुलदीपला परिस्थिती हाताळण्यासाठी आधीच तयार केले होते." 'लावा' प्रस्तुत 'बैठ अँड बोल' या आकाश चोप्राच्या कार्यक्रमात हा संवाद झाला असून तो यूट्यूब, फेसबुक आणि स्पॉटिफायवर प्रसारित करण्यात आला आहे.

📌 महत्वाच्या बातम्या

• कामगार निरीक्षक पदाची परीक्षा आम्ही घेतलीच नाही; सुषमा अंधारेंच्या आरोपानंतर MPSC चा लेखी खुलासा
• सलमान खानच्या ‘त्या’ हट्टामुळे ‘कुछ-कुछ होता है’च्या सेटवर ढसाढसा रडला होता करण जोहर
• बॉलिवूडमध्ये ‘हिंदूफोबिया’; धर्माबाबत निर्माती एकता कपूरचे वादग्रस्त विधान