IND vs NZ Final Live : महाअंतिम थरार अहमदाबादमध्ये, भारताची भिडत न्यूझीलंडशी!

२५६ धावांच्या महाकाय लक्षाचा पाठलाग करताना न्यूझीलंडचा संघ भारतीय गोलंदाजीसमोर पूर्णपणे शरणागत झाला आहे. बुमराहच्या या चौथ्या विकेटनंतर संपूर्ण मैदानात ‘इंडिया-इंडिया’चा जयघोष सुरू झाला आहे. किवींना विजयासाठी अजूनही १५ चेंडूंत १०४ धावांची गरज असून मॅच आता पूर्णपणे टीम इंडियाच्या मुठीत आहे.

जसप्रीत बुमराहने आज किवी फलंदाजांना डोकं वर काढू दिलेलं नाही. त्याने आपल्या ३.३ षटकांत अवघ्या १३ धावा देऊन ४ अतिशय महत्त्वाचे बळी टिपले आहेत. न्यूझीलंडची धावसंख्या आता १७.३ षटकांत ९ बाद १५२ अशी झाली असून भारताचा विजय आता केवळ एका विकेटच्या अंतरावर आहे.

न्यूझीलंडचा कर्णधार मिचेल सँटनर जो एकटा खिंड लढवत होता, त्याला जसप्रीत बुमराहने आपल्या जाळ्यात ओढलं आहे. बुमराहच्या चेंडूवर मोठा फटका मारण्याच्या नादात सँटनर बाद झाला. त्याने ३५ चेंडूंत ४३ धावांची लढाऊ खेळी केली, पण ती किवींना पराभवापासून वाचवण्यासाठी पुरेशी नव्हती. सँटनर बाद झाल्याने न्यूझीलंडचा ९ वा फलंदाज तंबूत परतला आहे.

पहिल्या डावात भारताला धक्के देणाऱ्या जेम्स नीशमला बुमराहने पहिल्याच चेंडूवर बाद करून आपला बदला पूर्ण केला. त्यानंतर पुढच्याच चेंडूवर त्याने मॅट हेन्रीचा त्रिफळा उडवला. दोघेही फलंदाज खाते न उघडता (०) शून्यावर बाद झाले. सध्या मैदानावर कर्णधार मिचेल सँटनर (३६ धावा) आणि लॉकी फर्ग्युसन खेळत असून न्यूझीलंडचा पराभव आता अटळ दिसत आहे.

जसप्रीत बुमराहने आतापर्यंत २.५ षटकांत अवघ्या १२ धावा देऊन ३ अतिशय महत्त्वाचे बळी टिपले आहेत. १५.५ षटकांच्या खेळानंतर न्यूझीलंडची धावसंख्या ८ बाद १४२ अशी केविलवाणी झाली आहे. किवींना विजयासाठी अजूनही २५ चेंडूंत तब्बल ११४ धावांची गरज असून त्यांचा आवश्यक रनरेट (RRR) २७.४ वर पोहोचला आहे.

भारताचा हुकमी एक्का जसप्रीत बुमराहने फायनलच्या महामुकाबल्यात आपली दहशत निर्माण केली आहे. बुमराहने आपल्या स्पेलमध्ये सलग दोन चेंडूंवर जेम्स नीशम आणि मॅट हेन्रीला तंबूत धाडले आहे. या दुहेरी धक्क्यामुळे न्यूझीलंडचा संघ आता पूर्णपणे बॅकफूटवर गेला असून भारताचा ऐतिहासिक विजय आता अवघ्या काही पावलांवर आहे.

२५६ धावांच्या महाकाय लक्षाचा पाठलाग करताना न्यूझीलंडची अवस्था आता अत्यंत केविलवाणी झाली आहे. ९ षटकांच्या खेळानंतर किवींची धावसंख्या ५ बाद ८३ अशी आहे. सध्या मैदानावर डॅरिल मिचेल (१ धाव) आणि कर्णधार मिचेल सँटनर (७ धावा) खेळत आहेत. न्यूझीलंडला विजयासाठी आता उरलेल्या ६६ चेंडूंत तब्बल १७३ धावांची गरज असून, त्यांचा आवश्यक रनरेट (RRR) १५.७ वर पोहोचला आहे.

एकीकडे विकेट्स पडत असताना एकाकी झुंज देणारा टिम सिफर्ट अखेर बाद झाला आहे. फिरकीपटू वरुण चक्रवर्तीने सिफर्टला आपल्या जाळ्यात ओढले असून ईशान किशनने त्याचा उत्कृष्ट झेल टिपला. सिफर्टने २६ चेंडूंत ५२ धावांची लढाऊ खेळी केली, ज्यात त्याने २ चौकार आणि ५ गगनभेदी षटकार ठोकले. सिफर्ट बाद झाल्याने आता टीम इंडियाच्या विजयावर शिक्कामोर्तब झाले आहे.

चार मोठे फलंदाज तंबूत परतल्यामुळे न्यूझीलंडचा संघ प्रचंड दबावाखाली आला आहे. आता त्यांना विश्वचषक जिंकण्यासाठी उरलेल्या ७४ चेंडूंत तब्बल १८६ धावांची आवश्यकता आहे. त्यांचा आवश्यक रनरेट (RRR) आता १५.१ इतका भयंकर झाला आहे. सध्या मैदानावर हार्दिक पंड्या आणि फिरकीपटू वरुण चक्रवर्ती गोलंदाजी करत आहेत.

एकीकडे न्यूझीलंडचे इतर फलंदाज पत्त्यांच्या बंगल्यासारखे कोसळत असताना, सलामीवीर टिम सिफर्टने मात्र एक बाजू लावून धरली आहे. सिफर्टने भारतीय गोलंदाजांचा सामना करत आपले अर्धशतक पूर्ण केले आहे. तो सध्या २४ चेंडूंत ५१ धावांवर नाबाद खेळत असून किवींचा डाव सावरण्याचा प्रयत्न करत आहे.

अक्षर पटेल आणि जसप्रीत बुमराहच्या धुमाकुळानंतर आता अष्टपैलू हार्दिक पंड्यानेही किवींना मोठा धक्का दिला आहे. हार्दिकने धोकादायक मार्क चॅपमनला थेट त्रिफळाचीत (Bowled) करत तंबूत धाडले आहे. दडपणाखाली खेळणाऱ्या चॅपमनला ८ चेंडूंत केवळ ३ धावा करता आल्या. या मोठ्या विकेटमुळे ७.४ षटकांनंतर न्यूझीलंडची अवस्था ४ बाद ७० अशी बिकट झाली आहे.

२५६ धावांचा अवाढव्य डोंगर पार करताना न्यूझीलंडची सुरुवात अतिशय खराब झाली आहे. ४.५ षटकांनंतर किवींनी आपले ३ टॉप ऑर्डर फलंदाज गमावले असून त्यांची धावसंख्या ३ बाद ४७ अशी बिकट झाली आहे. फिन ऍलन, रचिन रवींद्र आणि आता ग्लेन फिलिप्स बाद झाल्याने संपूर्ण जबाबदारी सलामीवीर टिम सिफर्टवर (नाबाद ३१ धावा) आली आहे. न्यूझीलंडला जिंकण्यासाठी अजूनही ९१ चेंडूंत २०९ धावांची गरज असून त्यांचा आवश्यक रनरेट (RRR) १३.८ वर गेला आहे.

बुमराह पाठोपाठ आता फिरकीपटू अक्षर पटेलनेही किवींना आणखी एक मोठा धक्का दिला आहे. अक्षरने आपल्या दुसऱ्या षटकात धोकादायक ग्लेन फिलिप्सला थेट त्रिफळाचीत (Bowled) केले आहे. फिलिप्सला अवघ्या ५ धावा करता आल्या. अक्षर पटेलने आतापर्यंत केवळ १.५ षटकांत १८ धावा देऊन फिन ऍलन आणि ग्लेन फिलिप्स असे २ अतिशय महत्त्वाचे बळी घेतले आहेत.

२५६ धावांचा अवाढव्य डोंगर पार करताना न्यूझीलंडची सुरुवात अतिशय खराब झाली आहे. फिन ऍलन पाठोपाठ रचिन रवींद्रही तंबूत परतल्याने ३.२ षटकांनंतर किवींची अवस्था २ बाद ३३ अशी झाली आहे. आता मैदानावर टिम सिफर्ट (२१ धावा) आणि ग्लेन फिलिप्स (१ धाव) ही जोडी आहे. न्यूझीलंडला जिंकण्यासाठी अजूनही १०० चेंडूंत २२३ धावांची गरज असून, त्यांचा आवश्यक रनरेट (RRR) आता १३.४ वर पोहोचला आहे.

अक्षर पटेलने फिन ऍलनला बाद केल्यानंतर आता भारताचा हुकमी एक्का जसप्रीत बुमराहनेही आपली जादू दाखवली आहे. बुमराहने गोलंदाजीला येताच आपल्या पहिल्याच षटकात न्यूझीलंडचा धोकादायक फलंदाज रचिन रवींद्रला अवघ्या १ धावेवर बाद केले आहे. ईशान किशनने विकेटच्या मागे त्याचा उत्कृष्ट झेल टिपून किवींना दुसरा मोठा धक्का दिला.

फिन ऍलन बाद झाला असला तरी, सलामीवीर टिम सिफर्टने मात्र भारतीय गोलंदाजांवर हल्लाबोल सुरू केला आहे. सध्या २.४ षटकांनंतर न्यूझीलंडची धावसंख्या १ बाद ३१ अशी झाली आहे. सिफर्ट अवघ्या ९ चेंडूंत २१ धावांवर नाबाद खेळत आहे. न्यूझीलंडला विजयासाठी अजूनही १७.२ षटकांत २२५ धावांची गरज असून त्यांचा आवश्यक रनरेट (RRR) आता १३.० वर पोहोचला आहे. कॅप्टन सूर्याने सुरुवातीलाच हार्दिक पंड्या आणि अक्षर पटेलला गोलंदाजीला आणले आहे.

अखेर टीम इंडियाने फायनलमध्ये पहिले आणि सर्वात मोठे यश मिळवले आहे! शिवम दुबेने कॅच सोडल्यामुळे वाढलेले टेन्शन अक्षर पटेलने दूर केले आहे. २५६ धावांच्या महाकाय लक्षाचा पाठलाग करताना न्यूझीलंडचा सर्वात घातक फलंदाज फिन ऍलन अवघ्या ९ धावांवर बाद झाला आहे. अक्षर पटेलच्या फिरकीवर तिलक वर्माकडे कॅच देऊन तो तंबूत परतला. ऍलनला अवघ्या ७ चेंडूंचा सामना करता आला.

सेमीफायनलमध्ये याच फिन ऍलनने अवघ्या ३३ चेंडूंत नाबाद १०० धावा ठोकून किवींना एकहाती मॅच जिंकून दिली होती. आता फायनलच्या महामुकाबल्यात अर्शदीपच्या भेदक गोलंदाजीवर त्याला मिळालेले हे जीवदान टीम इंडियाला किती भारी पडणार? याकडे १ लाख ३२ हजार प्रेक्षकांचे लक्ष लागले आहे. हा सोपा कॅच सुटल्याने अर्शदीप सिंग आणि कर्णधार सूर्यकुमार यादव चांगलेच संतप्त आणि निराश झालेले पाहायला मिळाले.

२५५ धावांच्या महाकाय लक्षाचा बचाव करण्यासाठी मैदानात उतरलेल्या टीम इंडियाकडून सुरुवातीलाच एक चूक झाली आहे. वेगवान गोलंदाज अर्शदीप सिंगने पहिल्याच स्पेलमध्ये न्यूझीलंडचा सर्वात घातक फलंदाज फिन ऍलनला बाद करण्याची सुवर्णसंधी निर्माण केली होती. ऍलनने हवेत मारलेला चेंडू शिवम दुबेकडे गेला, पण फायनलच्या दबावाखाली दुबेने हा अतिशय महत्त्वाचा कॅच सोडला आहे!

फायनलच्या या महामुकाबल्यात टीम इंडियाला इथपर्यंत पोहोचवण्यात टॉप ऑर्डरचा सर्वात मोठा वाटा आहे. संजू सॅमसनने सर्वाधिक ८९ धावा (४६ चेंडू, ८ षटकार) कुटल्या. तर ईशान किशनने ५४ (२५ चेंडू) आणि सलामीवीर अभिषेक शर्माने ५२ धावांची (२१ चेंडू) तुफानी खेळी केली. कॅप्टन सूर्या शून्यावर (०) बाद झाला असला तरी, या तिघांनी न्यूझीलंडच्या गोलंदाजांना कुठेच डोकं वर काढू दिलं नाही.

नीशम आणि हेन्रीने सलग विकेट्स काढून भारताची धावगती रोखण्याचा प्रयत्न केला होता. पण शेवटी आलेल्या शिवम दुबेने किवी गोलंदाजांचा चांगलाच समाचार घेतला. दुबेने अवघ्या ८ चेंडूंत नाबाद २६ धावांची (३ चौकार, २ षटकार) स्फोटक खेळी केली. त्याचा स्ट्राईक रेट थेट ३२५.०० इतका होता! दुसऱ्या बाजूने तिलक वर्मा ८ धावांवर नाबाद राहिला.

अहमदाबादच्या मैदानात आज भारतीय फलंदाजांनी अक्षरशः आग ओकली आहे. निर्धारित २० षटकांचा खेळ पूर्ण झाला असून टीम इंडियाने ५ बाद २५५ धावांचा महाकाय डोंगर उभा केला आहे. दव फॅक्टरची भीती असतानाही भारताने १२.८ च्या रनरेटने धावा कुटल्या आहेत. आता विश्वचषक जिंकण्यासाठी न्यूझीलंडला २५६ धावांचे महाकाय आव्हान पार करावे लागेल.

हार्दिक बाद झाल्यामुळे टीम इंडियाच्या धावांच्या वेगाला पुन्हा एकदा ब्रेक लागला आहे. सध्या १८.२ षटकांनंतर भारताची धावसंख्या ५ बाद २२६ अशी झाली असून रनरेट (CRR) १२.३ वर आला आहे. मैदानावर आता तिलक वर्मा (५ धावा) खेळत असून, दव पडण्याआधी किवींसमोर मोठे टार्गेट ठेवण्यासाठी उरलेल्या १० चेंडूंवर जास्तीत जास्त धावा कुटण्याची मोठी जबाबदारी आता त्याच्यावर आणि नवीन येणाऱ्या फलंदाजावर असणार आहे.

सूर्या शून्यावर बाद झाल्यानंतर हार्दिक पंड्याकडून मोठ्या फटकेबाजीची आणि फिनिशिंगची अपेक्षा होती, पण तोही मोठी खेळी करण्यात अपयशी ठरला आहे. मॅट हेन्रीच्या गोलंदाजीवर किवी कर्णधार सँटनरकडे झेल देऊन हार्दिक तंबूत परतला. त्याने आपल्या १३ चेंडूंच्या खेळीत १ चौकार आणि १ षटकार ठोकत १८ धावा केल्या.

नीशमने टीम इंडियाला सलग ३ मोठे धक्के दिले आहेत. त्याने आपल्या २ षटकांत अवघ्या १३ धावा देऊन ३ विकेट्स घेतल्या आहेत. सध्या १६.३ षटकांनंतर भारताची धावसंख्या ४ बाद २०७ अशी झाली आहे. आता मैदानावर हार्दिक पंड्या (३ धावा) आणि तिलक वर्मा (१ धाव) ही नवी जोडी असून, धावांच्या वेगाला अचानक मोठा ब्रेक लागला आहे.

अहमदाबादमध्ये जेम्स नीशम नावाचं वादळ आलंय की काय? १६ व्या षटकात संजू आणि ईशानला बाद केल्यानंतर नीशमने आता थेट कॅप्टन सूर्यकुमार यादवला आपला शिकार बनवलं आहे. सूर्याकडून मोठ्या खेळीची अपेक्षा होती, पण तो पहिल्याच चेंडूवर (०) शून्यावर बाद झाला आहे. रचिन रवींद्रने त्याचा झेल टिपला.

संजू सॅमसन तंबूत परतला असला तरी दुसऱ्या बाजूने ईशान किशनने किवी गोलंदाजांवर आपला दबाव कायम ठेवला आहे. टीम इंडियाची धावसंख्या १५.१ षटकांनंतर २ बाद २०३ अशी झाली आहे. ईशान सध्या २४ चेंडूंत नाबाद ५४ धावांवर खेळत असून त्याने आतापर्यंत ४ चौकार आणि ४ उत्तुंग षटकार ठोकले आहेत. भारताचा रनरेट अजूनही १३.४ इतका भयंकर आहे.

अहमदाबादमध्ये ऐतिहासिक शतकाकडे वाटचाल करणाऱ्या संजू सॅमसनची खेळी अखेर संपुष्टात आली आहे. जेम्स नीशमच्या गोलंदाजीवर रचिन रवींद्रकडे कॅच देऊन संजू बाद झाला. त्याने अवघ्या ४६ चेंडूंत ८९ धावांची अतिशय स्फोटक खेळी केली. या तुफानी डावात त्याने ५ कडक चौकार आणि तब्बल ८ गगनभेदी षटकार ठोकले. संजूचे शतक हुकले असले तरी त्याने संघाला एका अवाढव्य धावसंख्येपर्यंत पोहोचवून मोठे काम केले आहे.

ईशान आणि संजूच्या वादळी फटकेबाजीमुळे भारतीय संघाने अवघ्या १५ षटकांतच १ बाद २०३ धावांचा प्रचंड टप्पा ओलांडला आहे. सध्या भारताचा रनरेट १३.५ इतका भयंकर आहे. दुसऱ्या बाजूला संजू सॅमसनही आपल्या ऐतिहासिक शतकाकडे वेगाने वाटचाल करत असून तो ४५ चेंडूंत नाबाद ८९ धावांवर (८ षटकार, ५ चौकार) पोहोचला आहे. किवी कर्णधार मिचेल सँटनर आणि रचिन रवींद्र यांची या दोघांनी जबरदस्त धुलाई केली आहे.

संजू सॅमसनला दुसऱ्या बाजूने भक्कम साथ देत ईशान किशननेही न्यूझीलंडच्या गोलंदाजांचा अक्षरशः घाम काढला आहे. ईशानने आपला आक्रमक फॉर्म कायम ठेवत शानदार अर्धशतक पूर्ण केले आहे. तो सध्या अवघ्या २४ चेंडूंत नाबाद ५४ धावांवर खेळत आहे. या स्फोटक डावात त्याने आतापर्यंत ४ खणखणीत चौकार आणि ४ गगनभेदी षटकार ठोकले आहेत. त्याचा स्ट्राईक रेट थेट २२५.०० चा आहे!

दुसऱ्या बाजूने ईशान किशननेही न्यूझीलंडची उरलीसुरली झोप उडवली आहे. ईशान अवघ्या १९ चेंडूंत नाबाद ४३ धावांवर खेळत असून तोही आपल्या अर्धशतकाच्या जवळ पोहोचला आहे. त्याने आतापर्यंत ३ चौकार आणि ३ कडक षटकार ठोकले आहेत (स्ट्राईक रेट २२६.३२). न्यूझीलंडचे गोलंदाज मॅट हेन्री आणि रचिन रवींद्र यांची ईशान आणि संजूने मिळून जबरदस्त धुलाई केली आहे.

संजू सॅमसनने फायनलच्या महामुकाबल्यात आपला ‘रौद्र अवतार’ धारण केला आहे. तो आपल्या ऐतिहासिक शतकापासून अवघ्या १२ धावा दूर आहे. संजूने किवी गोलंदाजांचा समाचार घेत ४४ चेंडूंत नाबाद ८८ धावा कुटल्या आहेत. या वादळी खेळीत त्याने ५ खणखणीत चौकार आणि तब्बल ८ गगनभेदी षटकार ठोकले आहेत. त्याचा स्ट्राईक रेट थेट २०० चा आहे!

अहमदाबादमध्ये चौकार आणि षटकारांचा अक्षरशः पाऊस पडत आहे. १४ षटकांचा खेळ पूर्ण झाला असून मैदानावर ‘ड्रिंक्स ब्रेक’ (Drinks Break) घेण्यात आला आहे. पण भारतीय फलंदाजांची धावांची तहान काही शमलेली नाही. टीम इंडियाने १ बाद १९१ अशी प्रचंड धावसंख्या उभारली असून भारताचा रनरेट (CRR) १३.६ इतका भयंकर आहे! न्यूझीलंडच्या गोलंदाजांना कुठे चेंडू टाकावा हेच सुचेनासे झाले आहे.

संजू सॅमसनला दुसऱ्या बाजूने ईशान किशनची तगडी साथ मिळत आहे. ईशानने येताच किवी गोलंदाजांवर हल्लाबोल करत १२ चेंडूंत नाबाद २७ धावा (३ चौकार, १ षटकार) कुटल्या आहेत. या दोघांच्या स्फोटक फलंदाजीच्या जोरावर टीम इंडियाने ११ षटकांचा खेळ संपेपर्यंत १ बाद १३७ धावांचा डोंगर उभा केला आहे. सध्या भारताचा रनरेट (CRR) १२.५ इतका जबरदस्त आहे.

अहमदाबादच्या नरेंद्र मोदी स्टेडियमवर संजू सॅमसनने न्यूझीलंडच्या गोलंदाजांचा अक्षरशः घाम काढला आहे. फायनलसारख्या मोठ्या सामन्याचे कोणतेही दडपण न घेता संजूने अतिशय जबाबदारीने खेळत आपले शानदार अर्धशतक पूर्ण केले आहे. त्याने अवघ्या ३३ चेंडूंत नाबाद ५० धावांची खेळी केली असून यात ४ खणखणीत चौकार आणि ३ उत्तुंग षटकारांचा समावेश आहे.

सध्या न्यूझीलंडकडून कर्णधार मिचेल सँटनर आणि जेम्स नीशम गोलंदाजी करत आहेत. सँटनरने आपल्या २ षटकांत ११ धावा दिल्या आहेत, तर नीशमने आपल्या षटकात १२ धावा दिल्या आहेत. भारतीय फलंदाज ज्या वेगाने धावा कुटत आहेत, ते पाहता किवी गोलंदाजांवर आता प्रचंड दडपण आलं आहे.

अभिषेक बाद झाल्यानंतर तिसऱ्या क्रमांकावर आलेल्या ईशान किशननेही तुफानी फटकेबाजी सुरू ठेवली आहे. ईशान ९ चेंडूंत १९ धावांवर (३ खणखणीत चौकार) नाबाद आहे. तर दुसऱ्या बाजूला संजू सॅमसन एका बाजूने किल्ला लढवत असून तो आपल्या अर्धशतकापासून अवघ्या २ धावा दूर आहे. संजूने ३० चेंडूंत नाबाद ४८ धावा (४ चौकार, ३ षटकार) कुटल्या आहेत.

न्यूझीलंडने टॉस जिंकून प्रथम गोलंदाजीचा निर्णय घेतला, पण टीम इंडियाच्या फलंदाजांनी त्यांचे सर्व मनसुबे उधळून लावले आहेत. पहिल्या १० षटकांचा खेळ संपला असून भारताने १ बाद १२७ अशी अतिशय भक्कम धावसंख्या उभारली आहे. अभिषेक शर्मा (५२ धावा) बाद झाल्यानंतरही भारताच्या धावगतीला कोणताही ब्रेक लागलेला नाही. सध्या भारताचा रनरेट (CRR) १२.७ इतका जबरदस्त आहे.

अभिषेक बाद झाल्यानंतर तिसऱ्या क्रमांकावर ईशान किशन मैदानात आला असून त्यानेही आक्रमक पवित्रा घेतला आहे. सध्या ८ षटकांनंतर ईशान ५ चेंडूंत १२ धावांवर नाबाद आहे (२ चौकार). तर दुसऱ्या बाजूला संजू सॅमसन अतिशय शानदार खेळी करत २२ चेंडूंत ३८ धावांवर (३ चौकार, ३ षटकार) नाबाद खेळत आहे. न्यूझीलंडचा कर्णधार सँटनर आणि रचिन रवींद्र सध्या गोलंदाजी करत आहेत.

टीम इंडियाला ९८ धावांवर पहिला धक्का बसला. सलामीवीर अभिषेक शर्माने फायनलच्या दबावाला न जुमानता अवघ्या २१ चेंडूंत ५२ धावांची तुफानी खेळी केली. या स्फोटक डावात त्याने तब्बल ६ कडक चौकार आणि ३ उत्तुंग षटकार ठोकले (स्ट्राईक रेट २४७.६२). अखेर रचिन रवींद्रच्या गोलंदाजीवर टिम सिफर्टकडे कॅच देऊन अभिषेक तंबूत परतला.

न्यूझीलंडने टॉस जिंकून गोलंदाजी घेतली असली तरी, टीम इंडियाच्या फलंदाजांनी सुरुवातीपासूनच किवी गोलंदाजांवर जोरदार हल्लाबोल केला आहे. भारताने तुफानी फलंदाजी करत अवघ्या ८ षटकांत १ बाद ११० धावांचा टप्पा ओलांडला आहे. सध्या भारताचा रनरेट (CRR) १३.८ इतका जबरदस्त असून, दव पडण्याआधीच जास्तीत जास्त धावा कुटण्याचा टीम इंडियाचा प्लॅन स्पष्ट दिसत आहे.

एकीकडे अभिषेक धुलाई करत असताना संजू सॅमसनचीही त्याला भक्कम साथ मिळत आहे. संजू सध्या २२ चेंडूंत ३८ धावांवर नाबाद खेळत असून त्यानेही ३ चौकार आणि ३ षटकार लगावले आहेत. या दोघांच्या स्फोटक ओपनिंग पार्टनरशिपमुळे भारताचा रनरेट (CRR) सध्या १४.० इतका जबरदस्त झाला आहे. किवींचा कर्णधार मिचेल सँटनर स्वतः गोलंदाजीला आला असून त्याने आपल्या पहिल्या षटकात ६ धावा दिल्या आहेत.

अहमदाबादच्या मैदानावर अभिषेक शर्माने न्यूझीलंडच्या गोलंदाजांची अक्षरशः पिसं काढली आहेत. अभिषेकने अवघ्या २० चेंडूंत नाबाद ५२ धावांची वादळी खेळी करत आपलं अर्धशतक पूर्ण केलं आहे. यात त्याने ६ कडक चौकार आणि ३ उत्तुंग षटकार ठोकले आहेत. पहिल्या ७ षटकांतच टीम इंडियाने एकही विकेट न गमावता तब्बल ९८ धावा कुटल्या आहेत.

अहमदाबादच्या मैदानात न्यूझीलंडला अखेर पहिले यश मिळाले आहे. सुरुवातीपासून तुफान फटकेबाजी करत किवी गोलंदाजांची पिसं काढणारा सलामीवीर अभिषेक शर्मा बाद झाला आहे. त्याने अवघ्या २१ चेंडूंत ५२ धावांची स्फोटक अर्धशतकी खेळी केली. या तुफानी खेळीत त्याने ६ कडक चौकार आणि ३ उत्तुंग षटकार ठोकले.

रचिन रवींद्रने गोलंदाजीला येताच अभिषेकची महत्त्वाची विकेट काढली. सध्या ७.१ षटकांनंतर टीम इंडियाची धावसंख्या १ बाद ९८ अशी झाली असून, संजू सॅमसन २२ चेंडूंत ३८ धावांवर नाबाद खेळत आहे. भारताचा रनरेट सध्या १३.७ इतका जबरदस्त आहे.

न्यूझीलंडचा कर्णधार मिचेल सँटनर याने मात्र फायनलसाठी एक मोठा बदल केला आहे. किवी संघात ऑफ-स्पिनर कोल मॅककॉन्ची (Cole McConchie) याच्या जागी वेगवान गोलंदाज जेकब डफी (Jacob Duffy) याला संधी देण्यात आली आहे. दव फॅक्टर लक्षात घेऊन हा निर्णय घेतल्याचं स्पष्ट दिसत आहे.

न्यूझीलंडची प्लेईंग ११ : फिन ऍलन, टिम सेफर्ट (विकेटकीपर), रचिन रवींद्र, ग्लेन फिलिप्स, मार्क चॅपमन, डॅरिल मिशेल, जेम्स नीशम, मिचेल सँटनर (कर्णधार), मॅट हेन्री, लॉकी फर्ग्युसन, जेकब डफी.

कर्णधार सूर्यकुमार यादवने आपला शब्द खरा करून दाखवला आहे. उपांत्य फेरीतील ‘विनिंग कॉम्बिनेशन’ न बदलता टीम इंडिया फायनलच्या मैदानात उतरली आहे. वरुण चक्रवर्ती आणि अभिषेक शर्मावर सूर्याने पुन्हा एकदा मोठा विश्वास दाखवला आहे.

भारताची प्लेईंग ११ : अभिषेक शर्मा, संजू सॅमसन (विकेटकीपर), ईशान किशन, सूर्यकुमार यादव (कर्णधार), तिलक वर्मा, शिवम दुबे, हार्दिक पंड्या, अक्षर पटेल, वरुण चक्रवर्ती, जसप्रीत बुमराह, अर्शदीप सिंग.

ज्या गोष्टीची भीती होती, तेच घडलं आहे. सँटनरने टॉस जिंकताच गोलंदाजी निवडली, कारण रात्री दुसऱ्या डावात पडणाऱ्या ‘दव’ (Dew) फॅक्टरचा त्याला पुरेपूर फायदा घ्यायचा आहे. दव पडल्यावर गोलंदाजांना चेंडू पकडणं कठीण जातं. त्यामुळे आता संजू सॅमसन आणि सूर्यावर सुरुवातीच्या षटकांतच मोठी धावसंख्या उभारण्याचं प्रचंड दडपण असणार आहे.

अहमदाबादच्या नरेंद्र मोदी स्टेडियमवर १ लाख ३२ हजार प्रेक्षकांच्या साक्षीने महामुकाबल्याचा ‘टॉस’ पार पडला आहे. न्यूझीलंडचा कर्णधार मिचेल सँटनरने नाणेफेक जिंकून प्रथम गोलंदाजी करण्याचा (Bowling First) मोठा निर्णय घेतला आहे. त्यामुळे सूर्यकुमार यादवच्या नेतृत्वाखालील टीम इंडियाला आता प्रथम फलंदाजी करत किवींसमोर धावांचा डोंगर उभा करावा लागेल.

फायनल पाहण्यासाठी देशभरातून लोक अहमदाबादमध्ये पोहोचले आहेत, त्यामुळे तिकिटांचा काळाबाजार (Black Marketing) आणि बनावट तिकिटे विकणाऱ्यांवर गुजरात पोलिसांच्या सायबर सेलने करडी नजर ठेवली आहे. सोशल मीडिया किंवा इतर अनधिकृत ठिकाणांवरून तिकीट खरेदी करू नका, असे स्पष्ट आवाहन पोलिसांनी चाहत्यांना केले आहे.

सामना रात्री उशिरापर्यंत चालणार असल्यामुळे चाहत्यांची गैरसोय होऊ नये म्हणून अहमदाबाद मेट्रो आणि बस सेवेने मोठा निर्णय घेतला आहे. उद्या रात्री उशिरा १:३० वाजेपर्यंत मेट्रो सेवा सुरू राहणार असल्याची अधिकृत माहिती प्रशासनाने दिली आहे. तसेच, स्टेडियमवरून शहराच्या विविध भागात जाण्यासाठी जादा बसेसची सोय करण्यात आली आहे.

उद्याच्या ऐतिहासिक फायनलसाठी नरेंद्र मोदी स्टेडियमच्या बाहेर आणि आत सुरक्षेचा मोठा फौजफाटा तैनात करण्यात आला आहे. ताज्या माहितीनुसार, अहमदाबाद पोलिसांनी ३००० हून अधिक पोलीस कर्मचारी, एसआरपी (SRP) आणि रॅपिड ॲक्शन फोर्सच्या (RAF) तुकड्या तैनात केल्या आहेत. कोणत्याही अनुचित प्रकाराला आळा घालण्यासाठी आज रात्रीपासूनच स्टेडियमकडे जाणारे मुख्य रस्ते सामान्य वाहतुकीसाठी बंद करण्यात आले असून, चाहत्यांना फक्त ‘पार्क अँड राईड’ सुविधेचा वापर करावा लागणार आहे.

ऑस्ट्रेलियाचा माजी विश्वविजेता कर्णधार मायकल क्लार्क याने फायनलमध्ये जसप्रीत बुमराह गेमचेंजर ठरेल, अशी मोठी भविष्यवाणी केली आहे. क्लार्क म्हणाला, “बुमराह हा जगातील सर्वोत्तम आणि सर्वात घातक गोलंदाज आहे. तो एक चमत्कार (Freak) आहे. उद्याच्या फायनलमध्ये बुमराहच ‘मॅन ऑफ द मॅच’ ठरला, तर मला अजिबात आश्चर्य वाटणार नाही. तो कोणत्याही दबावाखाली मॅच फिरवू शकतो.”

दक्षिण आफ्रिकेचा दिग्गज वेगवान गोलंदाज डेल स्टेन याने फायनलपूर्वी न्यूझीलंडवर जोरदार निशाणा साधला आहे. स्टेन म्हणाला, “सगळे दक्षिण आफ्रिकेला चोकर्स म्हणतात, पण न्यूझीलंडने आमच्यापेक्षा जास्त फायनल गमावल्या आहेत. त्यामुळे उद्या ते हरले, तर मी ‘चोकर्स’चा टॅग अधिकृतपणे त्यांना देईन.” तसेच, “उद्या न्यूझीलंड भारताला हरवू शकत नाही, त्यासाठी भारताला खूपच खराब खेळावं लागेल,” असा ठाम विश्वासही स्टेनने व्यक्त केला आहे.

उद्याच्या महामुकाबल्यापूर्वी न्यूझीलंडचा कर्णधार मिचेल सँटनर याने अत्यंत आक्रमक वक्तव्य केलं आहे. २०२३ च्या विश्वचषकातील पॅट कमिन्सप्रमाणेच सँटनरनेही ‘१ लाख भारतीयांना शांत करायला (Silence the crowd) आम्हाला नक्कीच आवडेल’ असं म्हटलं आहे. तसंच, “आम्ही फेवरेट नसलो तरी, ट्रॉफी जिंकण्यासाठी भारतीयांची मने तोडायला (Breaking Hearts) आम्ही मागेपुढे पाहणार नाही,” असा थेट इशारा सँटनरने दिला आहे.

उद्या संध्याकाळी ७ वाजता डे-नाईट फायनल सुरू होणार असल्याने, आज रात्री नरेंद्र मोदी स्टेडियमवरील सर्व ‘फ्लडलाईट्स’ (Floodlights) चालू करून त्यांची अंतिम चाचणी घेतली जात आहे. तसेच, रात्री दव पडल्यानंतर मैदानाची स्थिती कशी राहते, याचा अंदाज घेण्यासाठी बीसीसीआयचे क्युरेटर्स आता ग्राऊंडवर खेळपट्टी आणि आऊटफिल्डची बारकाईने पाहणी करत आहेत. ही उद्याच्या मॅचसाठीची अत्यंत महत्त्वाची तांत्रिक प्रक्रिया सध्या सुरू आहे.

उद्याच्या महामुकाबल्यापूर्वी आज संध्याकाळी आयसीसीच्या (ICC) अधिकृत प्रोटोकॉलनुसार दोन्ही संघांच्या कर्णधारांचे फोटोशूट नुकतेच पार पडले आहे. टीम इंडियाचा कर्णधार सूर्यकुमार यादव आणि न्यूझीलंडचा कर्णधार मिचेल सँटनर यांनी टी-२० विश्वचषकाच्या ट्रॉफीसोबत पोझ दिल्या आहेत. या फोटोशूटचे अधिकृत फोटो लवकरच आयसीसी आणि बीसीसीआयच्या सोशल मीडिया हँडलवर पहायला मिळतील.

आज सामन्याच्या पूर्वसंध्येला दोन्ही संघांवर कोणताही अतिरिक्त ताण येऊ नये म्हणून ‘ऑप्शनल सराव’ (Optional Practice) ठेवण्यात आला आहे. ज्या खेळाडूंना सराव करायचा आहे तेच नेट्समध्ये घाम गाळत आहेत. उर्वरित खेळाडू हॉटेलमध्ये आराम करत असून, आज संध्याकाळी दोन्ही संघांची अंतिम ‘स्ट्रॅटेजी मीटिंग’ पार पडेल.

आज शनिवारी सकाळीच बीसीसीआयच्या मुख्य क्युरेटर्सनी खेळपट्टीचा अंतिम आढावा घेतला आहे. उद्याच्या सामन्यासाठी खेळपट्टीवर शेवटचा ‘हेवी रोलर’ फिरवण्याचं काम सुरू आहे. संध्याकाळी ७ वाजता सामना सुरू होणार असल्याने दुसऱ्या डावात ‘दव’ (Dew) पडण्याची दाट शक्यता असते. त्यामुळे आज संध्याकाळपासूनच मैदानावर ‘अँटी-ड्यू स्प्रे’ (Anti-dew spray) मारण्याची प्रक्रियेला सुरुवात होणार असल्याची १०० टक्के खात्रीलायक माहिती आहे.

उद्या ८ मार्चला अहमदाबादच्या नरेंद्र मोदी स्टेडियमवर होणाऱ्या महामुकाबल्यासाठी सर्वात दिलासादायक बातमी समोर आली आहे. हवामान खात्याच्या (IMD) अधिकृत अंदाजानुसार, उद्या अहमदाबादमध्ये पावसाची ०% शक्यता आहे. दिवसभर कडक ऊन असेल आणि संध्याकाळी सामन्याच्या वेळी तापमान २८ ते ३० अंश सेल्सिअसच्या आसपास राहील. त्यामुळे चाहत्यांना कोणत्याही व्यत्ययाविना पूर्ण ४० षटकांचा थरार पाहायला मिळणार हे १००% निश्चित झालं आहे!

रिचर्ड इलिंगवर्थ आणि ॲलेक्स व्हार्फ यांना अशा दबावाच्या आणि मोठ्या सामन्यांचा प्रचंड अनुभव आहे. नरेंद्र मोदी स्टेडियमवर १ लाख ३२ हजार प्रेक्षकांच्या उपस्थितीत होणाऱ्या या फायनलमध्ये खेळाडूंवर जितका दबाव असेल, तितकाच अचूक निर्णय घेण्याचं मोठं आव्हान या पंचांवरही असणार आहे. त्यामुळे आयसीसीने अत्यंत विचारपूर्वक या दोन दिग्गजांची निवड केली आहे.

उद्या अहमदाबादच्या नरेंद्र मोदी स्टेडियमवर होणाऱ्या भारत विरुद्ध न्यूझीलंड महामुकाबल्यासाठी आयसीसीने (ICC) मॅच अधिकाऱ्यांची अधिकृत घोषणा केली आहे. या हाय-व्होल्टेज सामन्यात मैदानावर रिचर्ड इलिंगवर्थ (Richard Illingworth) आणि ॲलेक्स व्हार्फ (Alex Wharf) हे दोन अनुभवी पंच (Umpires) मुख्य जबाबदारी सांभाळणार आहेत.

इंग्लंडविरुद्धच्या सेमीफायनलमध्ये वरुण चक्रवर्तीने अत्यंत महागडी गोलंदाजी केली होती, तर सलामीवीर अभिषेक शर्माही फ्लॉप ठरला होता. त्यामुळे फायनलसारख्या महामुकाबल्यात कर्णधार सूर्यकुमार यादव आणि कोच गौतम गंभीर संघात बदल करण्याचा धाडसी निर्णय घेऊ शकतात. सूत्रांनुसार, न्यूझीलंडविरुद्ध कुलदीप यादव आणि रिंकू सिंगला थेट ‘प्लेईंग ११’ मध्ये संधी मिळण्याची दाट शक्यता वर्तवली जात आहे.

अहमदाबादमध्ये रविवारी पावसाची फारशी शक्यता नसली तरी, आयसीसीने कोणत्याही परिस्थितीला तोंड देण्यासाठी ९ मार्च (सोमवार) हा ‘राखीव दिवस’ (Reserve Day) ठेवला आहे. जर रविवारी पावसामुळे दोन्ही डावांत किमान १०-१० षटकांचाही खेळ होऊ शकला नाही, तर सोमवारी सामना जिथे थांबला तिथूनच पुढे सुरू होईल. पण धक्कादायक बाब म्हणजे, जर राखीव दिवशीही पाऊस पडला आणि सामना रद्द करावा लागला, तर भारत आणि न्यूझीलंड या दोन्ही संघांना ‘संयुक्त विजेता’ घोषित केलं जाईल.

हा हाय-व्होल्टेज सामना रविवारी, ८ मार्चला संध्याकाळी ७:०० वाजता अहमदाबादच्या नरेंद्र मोदी स्टेडियमवर सुरू होईल. संध्याकाळी ६:३० वाजता दोन्ही संघांचे कर्णधार टॉससाठी (नाणेफेक) मैदानात उतरतील. आता टीम इंडियाचा कर्णधार सूर्यकुमार यादव टॉस जिंकून काय निर्णय घेतो, याकडे संपूर्ण देशाचे लक्ष लागले आहे.

जे चाहते प्रवासात आहेत किंवा मोबाईलवर फायनलचा थरार अनुभवू इच्छितात, त्यांच्यासाठी जिओ हॉटस्टार (JioHotstar) ॲप आणि वेबसाईटवर या सामन्याचे थेट प्रक्षेपण (Live Streaming) केले जाणार आहे. विशेष म्हणजे, या महामुकाबल्याची मराठी कॉमेंट्रीसुद्धा तुम्हाला जिओ हॉटस्टारवर ऐकायला मिळेल. 

रविवारी अहमदाबादमध्ये होणारा भारत विरुद्ध न्यूझीलंड हा टी-२० विश्वचषकाचा महामुकाबला टीव्हीवर पाहण्यासाठी चाहत्यांची मोठी उत्सुकता आहे. हा ऐतिहासिक सामना स्टार स्पोर्ट्स नेटवर्कच्या (Star Sports Network) विविध चॅनेल्सवर लाईव्ह पाहता येईल. तुम्ही हिंदी, इंग्रजीसह इतर अनेक भाषांमध्ये या फायनलच्या कॉमेंट्रीचा आनंद घेऊ शकता.

ओव्हरऑल रेकॉर्ड्समध्ये भारत पुढे असला, तरी टी-२० विश्वचषकाचा इतिहास टीम इंडियासाठी धोक्याची घंटा आहे. टी-२० विश्वचषकाच्या इतिहासात हे दोन्ही संघ आतापर्यंत ३ वेळा आमनेसामने आले आहेत. आणि धक्कादायक बाब म्हणजे, या तिन्ही सामन्यांत न्यूझीलंडने भारताचा पराभव केला आहे. त्यामुळे रविवारी अहमदाबादमध्ये टीम इंडियाला हा जुना इतिहास कोणत्याही परिस्थितीत बदलावाच लागेल!

भारतासाठी जमेची बाजू म्हणजे, याच वर्षी जानेवारी-फेब्रुवारी २०२६ मध्ये झालेल्या ५ सामन्यांच्या टी-२० मालिकेत टीम इंडियाने किवींचा ४-१ असा धुव्वा उडवला होता. त्यामुळे रोहित शर्मा आणि विराट कोहली नसले तरी, सूर्यकुमार यादवच्या नेतृत्वाखालील या युवा टीम इंडियाचा आत्मविश्वास अहमदाबादच्या फायनलपूर्वी प्रचंड वाढलेला आहे.

टी-२० क्रिकेटच्या इतिहासात भारत आणि न्यूझीलंड यांच्यात आतापर्यंत एकूण ३० सामने खेळवले गेले आहेत. यापैकी टीम इंडियाने तब्बल १८ सामन्यांत दणदणीत विजय मिळवला आहे, तर न्यूझीलंडला केवळ ११ सामने जिंकता आले आहेत. यातील एक सामना टाय झाला होता. या आकडेवारीवरून फायनलमध्ये सध्या तरी भारताचे पारडे जड दिसत आहे.

१ लाख ३२ हजार प्रेक्षकांच्या उपस्थितीत हा सामना सुरू होईल. सूत्रांनुसार, इथली खेळपट्टी फलंदाजांसाठी नंदनवन मानली जाते, पण लाल मातीचा वापर झाल्यास फिरकीला मोठी मदत मिळू शकते. त्यामुळे भारताचा मिस्ट्री स्पिनर वरुण चक्रवर्ती आणि न्यूझीलंडचा कर्णधार मिचेल सँटनर यांच्यात या सामन्यात खरी लढत पाहायला मिळेल.

इंग्लंडविरुद्धच्या सेमीफायनलमध्ये संजू सॅमसनने अवघ्या ४२ चेंडूंत ८९ धावांची वादळी खेळी केली. विजयानंतर संजूने स्वतः जसप्रीत बुमराहला जगातील सर्वोत्तम गोलंदाज म्हणत या विजयाचे संपूर्ण श्रेय दिले. फायनलमध्ये न्यूझीलंडच्या फिन ऍलनचे आव्हान मोडून काढण्यासाठी बुमराहची गोलंदाजी अत्यंत महत्त्वाची ठरणार आहे. फिन ऍलनने सेमीफायनलमध्ये दक्षिण आफ्रिकेविरुद्ध अवघ्या ३३ चेंडूंत शतक ठोकून सर्व गोलंदाजांची झोप उडवली होती.

रविवारी, ८ मार्चला संध्याकाळी ७ वाजता अहमदाबादच्या नरेंद्र मोदी स्टेडियमवर भारत आणि न्यूझीलंड यांच्यात फायनलचा थरार रंगणार आहे. टीम इंडियाने इंग्लंडला ७ धावांनी हरवून फायनल गाठली आहे, तर न्यूझीलंडने दक्षिण आफ्रिकेचा धुव्वा उडवला आहे. रोहित शर्मा आणि विराट कोहलीशिवाय टीम इंडिया तब्बल २० वर्षांत पहिल्यांदाच एवढा मोठा सामना खेळत असून सूर्यकुमार यादवच्या नेतृत्वात इतिहास रचण्याची भारताला मोठी संधी आहे.