कर्नाटक : शेजारच्या कर्नाटक राज्यातून एक धक्कादायक बातमी समोर आली आहे, ज्यामुळे देशभर खळबळ उडाली आहे. राज्यात केवळ एक-दोन नव्हे, तर तब्बल ७,००० विद्यार्थ्यांना एचआयव्ही/एड्सची (HIV/AIDS) (HIV Positive) लागण झाल्याची चिंताजनक माहिती समोर आली आहे. यासंदर्भातील एका अहवालामुळे आरोग्य विभागाची चिंता वाढली आहे.
अहवालानुसार, राज्यातील १८ ते २५ वयोगटातील ७,००० हून अधिक विद्यार्थ्यांना HIVची लागण झाल्याचे निश्चित झाले आहे. या परिस्थितीची गंभीर दखल घेत, कर्नाटक सरकारने राज्यातील सर्व सरकारी, अनुदानित आणि खाजगी महाविद्यालयांमध्ये नियमित HIV चाचणी आणि समुपदेशन शिबिरे आयोजित करण्याचे कडक आदेश दिले आहेत.
‘नॅशनल एड्स कंट्रोल ऑर्गनायझेशन’च्या (NACO) अहवालानुसार, HIV-बाधित व्यक्तींच्या संख्येच्या बाबतीत कर्नाटक देशात तिसऱ्या क्रमांकावर आहे. सध्या राज्यात सुमारे २,६०,००० लोक एचआयव्हीसह जगत आहेत आणि त्यापैकी २,०५,००० जण उपचार घेत आहेत. मात्र, जवळपास ५४,००० लोकांना आपल्या संसर्गाबद्दल अद्याप माहिती नाही, ही बाब आरोग्य विभागासाठी चिंतेची मोठी बाब ठरली आहे.
आकडेवारीवरून असे दिसून येते की, १८ ते ३५ वयोगटातील तरुणांमध्ये या संसर्गाचा वेगाने प्रसार होत आहे. या वयोगटातील बाधित व्यक्तींची संख्या २०२३-२४ मध्ये ४४,५०० होती, जी २०२५-२६ च्या कालावधीत वाढून ६६,६०० वर पोहोचली आहे. या पार्श्वभूमीवर, कर्नाटकातील विश्वेश्वरैया टेक्नॉलॉजिकल युनिव्हर्सिटीने (VTU) आपल्याशी संलग्न असलेल्या सर्व अभियांत्रिकी महाविद्यालयांना विद्यार्थ्यांसाठी एकात्मिक आरोग्य शिबिरे आयोजित करण्याचे निर्देश दिले आहेत.
ही मोहीम ‘मोबिलायझेशन फॉर एड्स सुरक्षा’ (Mobilization for AIDS Suraksha) कार्यक्रमांतर्गत राबविली जाईल. याचा उद्देश केवळ HIVबद्दलच नव्हे, तर हिपॅटायटीस-बी आणि सिफिलिससारख्या आजारांबद्दलही जागरूकता निर्माण करणे हा आहे. जिल्हा एड्स नियंत्रण अधिकाऱ्यांच्या सहकार्याने आयोजित केली जाणारी ही शिबिरे जुलै २०२६ पासून सुरू होऊन आठ महिन्यांच्या कालावधीत विविध टप्प्यांत घेतली जातील.
📌 महत्वाच्या बातम्या
- राज्यसभेत ‘वंदे मातरम’ला कायदेशीर संरक्षण; अपमान केल्यास 3 वर्षे तुरुंगवास; नवा कायदा मंजूर
- “…तर हेच विद्यार्थी भविष्यात सरकार बदलतील”; अभिजित दीपकेचा कडक इशारा
- Coal Scam प्रकरणात सुप्रीम कोर्टाचा ऐतिहासिक निकाल; मनमोहन सिंग यांना अखेर मोठा दिलासा
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
