पुणे, 1 नोव्हेंबर: दिवाळीच्या पार्श्वभूमीवर अन्न व औषध प्रशासन अलर्ट मोडवर आले असून, आयुक्त तुकाराम मुंडे (FDA Tukaram Munde) यांनी स्वतः मैदानात उतरून पाहणीला सुरुवात केली आहे. पुण्यातील एका सार्वजनिक फराळ वाटप कार्यक्रमात त्यांनी लाडू आणि चिवड्याच्या दर्जाची प्रत्यक्ष तपासणी केली. ग्राहकांना सुरक्षित आणि दर्जेदार अन्न न पुरवल्यास उत्पादक व विक्रेत्यांवर कठोर कारवाई करण्याचा थेट इशारा त्यांनी दिला.
पुण्यात झालेल्या या कार्यक्रमादरम्यान मुंडे यांनी फराळ वाटप उपक्रमाचे कौतुक केले. मात्र, अन्नसुरक्षेबाबत त्यांनी काही महत्त्वपूर्ण सूचनाही दिल्या. यात प्रामुख्याने तांत्रिक पर्यवेक्षण, पदार्थांमध्ये नैसर्गिक रंगांचा वापर करणे आणि उघड्यावरील खाद्यपदार्थांची योग्य प्रकारे विल्हेवाट लावणे या बाबींवर त्यांनी भर दिला.
सणासुदीच्या काळात भेसळयुक्त अन्नपदार्थांची विक्री रोखण्यासाठी एफडीएची राज्यभरात मोठी मोहीम सुरू असल्याची माहिती मुंडे यांनी दिली. दिवाळीपूर्वीच मसाले आणि खाद्यतेलातील भेसळीविरोधात कारवाई करत हजारो क्विंटल साठा जप्त करण्यात आला आहे. अनधिकृत आणि भेसळयुक्त पदार्थांची विक्री करणाऱ्यांवर एफडीएचा कडक पहारा असून, नियमांचे उल्लंघन करणाऱ्यांवर यापुढेही कडक कारवाई सुरूच राहील, असे त्यांनी स्पष्ट केले.
उत्पादक आणि विक्रेत्यांनी नियमांचे पालन करत ग्राहकांना सुरक्षित व दर्जेदार खाद्यपदार्थ पुरवावेत, असे निर्देश त्यांनी दिले. यासोबतच, खरेदी केलेल्या खाद्यपदार्थांबाबत काही संशय वाटल्यास नागरिकांनी ‘complaints.mahafda.in‘ या पोर्टलवर तक्रार नोंदवावी, असे आवाहनही एफडीए आयुक्त तुकाराम मुंडे यांनी केले आहे.
📌 महत्वाच्या बातम्या
- रामलीला मैदानात इंडिया आघाडीचा एल्गार; ज्ञानेश कुमार जेलमध्ये जाणार, २०२४ ची निवडणूक अवैध – राहुल गांधी
- ये थांब… ये थांब…; वाल्मिक कराडचा मुलगा सुशीलच्या ऑडिओ क्लिपने खळबळ, महिलेला दिल्या घाणेरड्या शिव्या
- ज्ञानेश कुमारांच्या राजीनाम्यानंतर मोर्चा थेट मोदींकडे वळणार; महारॅलीत राहुल गांधींचा मोठा इशारा
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
