रामलीला मैदानात इंडिया आघाडीचा एल्गार; ज्ञानेश कुमार जेलमध्ये जाणार, २०२४ ची निवडणूक अवैध – राहुल गांधी

दिल्ली, 1 नोव्हेंबर: मुख्य निवडणूक आयुक्त ज्ञानेश कुमार यांच्या राजीनाम्याच्या आणि ‘एसआयआर’च्या (SIR) निषेधार्थ इंडिया आघाडीने दिल्लीतील रामलीला मैदानावर तब्बल चार तास अभूतपूर्व आंदोलन केले. या रॅलीत २० विरोधी पक्षांनी सहभाग नोंदवला. तत्पूर्वी, १९ विरोधी पक्षांतील २१५ खासदारांनी मॉक संसद अधिवेशनात हजेरी लावत ज्ञानेश कुमार यांच्याविरोधात महाभियोग प्रस्तावही मंजूर केला. रॅलीत एम. ए. बेबी, तेजस्वी यादव, मल्लिकार्जुन खर्गे, अखिलेश यादव, ममता बॅनर्जी, फारुख अब्दुल्ला, मेहबूबा मुफ्ती आणि राहुल गांधी (Rahul Gandhi) यांनी मोदी सरकार व निवडणूक आयोगावर जोरदार हल्लाबोल केला.

काँग्रेस नेते राहुल गांधी यांनी ज्ञानेश कुमार यांच्यावर मतचोरीचा कट रचल्याचा गंभीर आरोप करत त्यांना तुरुंगात जावेच लागेल, असा इशारा दिला. ते म्हणाले की, २०२४ च्या निवडणुकांनंतर १३.५ कोटी मतदारांना (दर सातपैकी एक म्हणजेच १५ टक्के) मतदार यादीतून वगळण्यात आले. केवळ ३ टक्के मतदान झाल्याची निवडणूक आयोगाचीच आकडेवारी असून, यावरून २०२४ ची लोकसभा निवडणूक अवैध ठरते. आपण कोविडबाबत जे बोललो ते खरे ठरले आणि आताही आपण जे सांगत आहोत तेच सत्य असल्याचे राहुल गांधींनी स्पष्ट केले.

देशाचा आवाज दाबण्याचा सर्वांत मोठा गुन्हा ज्ञानेश कुमार यांनी केल्यामुळे त्यांना, तसेच पंतप्रधान मोदी आणि अमित शाह यांना रात्री झोप लागत नसल्याचा दावा राहुल गांधी यांनी केला. अदानींना देश विकल्याचा आपण बदला घेऊ आणि कुणालाही पळून जाऊ देणार नाही, असा इशाराही त्यांनी दिला. हे आंदोलन कोणत्याही एका पक्षाचे नसून संविधान वाचवण्यासाठी असल्याचे सांगत, मोदी-ज्ञानेश यांनी देशाच्या आत्म्यावर हल्ला केला असला तरी आम्ही द्वेषाऐवजी प्रेमाचे दुकान चालवत असल्याचे गांधी म्हणाले. मतचोरीविरोधात कायदेशीर कारवाई करून देशाला न्याय मिळवून देण्याचा निर्धारही त्यांनी व्यक्त केला.

काँग्रेस अध्यक्ष मल्लिकार्जुन खर्गे यांनी ज्ञानेश कुमार यांना थेट इशारा देताना सांगितले की, “ते अंडरवर्ल्डमध्ये गेले तरी आम्ही त्यांना शोधून आणू आणि सोडणार नाही.” पंतप्रधान मोदी लोकांमध्ये फूट पाडत असून ते स्वतःचे मतदार स्वतःच निवडत असल्याचा आरोप खर्गे यांनी केला. आजचे केंद्र, बिहार आणि उत्तर प्रदेशातील सरकार हे ‘चोरीचे सरकार’ असल्याचे सांगत, सरकारने ईडी किंवा सीबीआयचा कितीही वापर केला तरी आपण घाबरणार नसल्याचे खर्गे यांनी ठणकावून सांगितले.

समाजवादी पक्षाचे नेते अखिलेश यादव यांनी उत्तर प्रदेशच्या राजकारणावर भाष्य करताना, जे उत्तर प्रदेशातून आलेत ते तिथूनच जातील आणि २०२७ मध्ये त्यांची एक्झिट निश्चित असल्याचे म्हटले. प्रभू रामाच्या भूमीत देणग्या आणि अर्पण चोरणाऱ्या पापींचा संपूर्ण नायनाट होईल, असा घणाघात त्यांनी केला. उत्तर प्रदेशच्या मतदार यादीतून १.२ कोटी हिंदूंना वगळले गेल्याचे सांगत, हे लोकही पाकिस्तानी आहेत का, असा सवाल त्यांनी विचारला. भाजपने निवडणूक आयोगाचा शस्त्रासारखा वापर करत २०२२ मध्ये उत्तर प्रदेशात आणि त्यापूर्वी बंगालमध्येही निवडणुकीपूर्वी एफआयआर दाखल करून मते रद्द करत निवडणुका चोरल्याचा आरोप यादव यांनी केला.

तृणमूल काँग्रेसच्या नेत्या ममता बॅनर्जी यांनी आपला बंगाल लुटला गेल्याचे सांगत, लोकशाही वाचवण्यासाठी जीव देण्याची तयारी दर्शवली. “तुम्ही केवळ मतेच नाही, तर संपूर्ण मतमोजणीच गायब केली आहे. आम्ही हरलेलो नाही, तर आमचा पराभव करण्यात आला आहे,” असे त्या म्हणाल्या. तर, आरजेडी नेते तेजस्वी यादव यांनी रामलीला मैदानाचा संदर्भ देत मतचोरांसाठी आपण इथे महाभारत आयोजित केल्याचे सांगितले. शकुनी ज्याप्रमाणे फासे फेकून मनासारखे घडवून आणायचा, तसाच हा प्रकार असल्याचे सांगत त्यांनी कुरुक्षेत्र निर्माण करणार असल्याचा इशारा दिला.

पीडीपी नेत्या मेहबूबा मुफ्ती यांनी, २०१४ पूर्वीच्या सरकारांनी कमावलेली संपत्ती व्यावसायिक मित्रांना वाटली गेल्याची टीका केली. तसेच, सैन्यात अभिमानाने सेवा करणाऱ्यांना अग्निवीर ठरवल्याबद्दल संताप व्यक्त केला. नॅशनल कॉन्फरन्सचे फारुख अब्दुल्ला म्हणाले की, भाजप सतत मुस्लिमांकडे बोट दाखवून त्यांना पाकिस्तानी म्हणते, पण आम्ही भारतासाठी रक्त दिले असून यापुढेही देऊ. तर सीपीएमचे एम. ए. बेबी यांनी देशात दुसरे स्वातंत्र्य आंदोलन सुरू झाल्याचे सांगत, फॅसिस्ट आरएसएसपासून देशाला वाचवण्यासाठी मतचोर ज्ञानेश कुमार यांना राजीनामा द्यावाच लागेल, अशी मागणी केली. गेल्या २५ दिवसांत (६ ते १३ ऑक्टोबरदरम्यान झालेल्या ६ आंदोलनांनंतर) विरोधी पक्ष या मुद्द्यावर एकत्र येण्याची ही सातवी वेळ होती.

📌 महत्वाच्या बातम्या

• ये थांब… ये थांब…; वाल्मिक कराडचा मुलगा सुशीलच्या ऑडिओ क्लिपने खळबळ, महिलेला दिल्या घाणेरड्या शिव्या
• ज्ञानेश कुमारांच्या राजीनाम्यानंतर मोर्चा थेट मोदींकडे वळणार; महारॅलीत राहुल गांधींचा मोठा इशारा
• नरेंद्र मोदी हे ज्ञानेश कुमार यांना निवडणार की देशाला? तेजस्वी यादव यांचा थेट सवाल