प्रतिनिधी, 31 ऑक्टोबर: ऑकलंडच्या ईडन पार्कवर झालेल्या सामन्यात न्यूझीलंडच्या ग्लेन फिलिप्सने (Glenn Phillips) भारताविरुद्ध ४९ चेंडूत १०७ धावांची तडाखेबंद शतकी खेळी केली. या खेळीच्या जोरावर न्यूझीलंडने ८७ धावांनी विजय मिळवला. सामन्यानंतर बोलताना फिलिप्सने आपल्या या कामगिरीचे श्रेय इंडियन प्रीमियर लीगला (आयपीएल) दिले असून, या स्पर्धेने आपला खेळ सुधारण्यास मदत केल्याचे त्याने म्हटले आहे.
या सामन्यात न्यूझीलंडने प्रथम फलंदाजी करताना २५९ धावांचा डोंगर उभारला होता. याच्या उत्तरात भारतीय संघाला केवळ १७२ धावांपर्यंतच मजल मारता आली. फिलिप्सला त्याच्या उत्कृष्ट कामगिरीसाठी ‘प्लेअर ऑफ द मॅच’ पुरस्काराने गौरवण्यात आले. ५ सामन्यांच्या या मालिकेत न्यूझीलंडने आपला पहिला विजय नोंदवला आहे. मात्र, भारताने पहिले सलग तीन सामने जिंकून मालिका आधीच खिशात घातली आहे.
सामन्यानंतरच्या पत्रकार परिषदेत बोलताना फिलिप्स म्हणाला, “आयपीएल ही एक वेगळ्याच स्तरावरील स्पर्धा आहे. आठ परदेशी खेळाडूंमधून केवळ चौघांनाच संधी मिळत असल्याने तिथे मोठे आव्हान असते. जर तुम्ही तिथे जाऊन उत्कृष्ट कामगिरी केली नाही, तर दुसरा खेळाडू रांगेत उभा असतो. हे या स्पर्धेचे स्वरूपच आहे.”
आयपीएलच्या गेल्या हंगामात ग्लेन फिलिप्स गुजरात टायटन्सचा भाग होता. तिथे त्याला ६ सामन्यांमधील ५ डावांमध्ये केवळ १६.७५ च्या सरासरीने ६७ धावा करता आल्या, ज्यामध्ये त्याची सर्वोच्च धावसंख्या २५ होती. या खराब फॉर्ममुळे संघ व्यवस्थापनाने त्याला प्लेइंग इलेव्हनमधून वगळले होते. यावर बोलताना तो म्हणाला, “हे ठीक आहे. पण गुजरात टायटन्समध्ये मला अतिशय दर्जेदार सुविधा आणि उत्कृष्ट प्रशिक्षक लाभले, तसेच सरावासाठी भरपूर वेळ मिळाला. मला इंग्लंडमध्येही लाल आणि पांढऱ्या चेंडूने भरपूर क्रिकेट खेळण्याची संधी मिळाली, जी खूप छान गोष्ट आहे.”
बाकावर बसून राहणे ही देखील शिकण्याची मोठी संधी असल्याचे त्याने नमूद केले. “आयपीएलमध्ये भरपूर धावा करून पैसे कमवायला नक्कीच आवडेल. पण तुम्ही खेळत असा किंवा नसलात, तरी तिथून खूप काही शिकायला मिळते. आयपीएल किंवा इतर कोणत्याही स्पर्धेत मिळालेल्या संधीचा कसा फायदा करून घ्यायचा, हे त्या प्रत्येक खेळाडूवर अवलंबून असते,” असेही फिलिप्सने स्पष्ट केले.
📌 महत्वाच्या बातम्या
- स्मृती मंधानाचा खुलासा: वर्ल्ड कप विजयानंतर धोनीने पाठवला होता खास व्हॉट्सॲप मेसेज
- शेतकऱ्यांबाबतच्या विधानावरून एकनाथ शिंदे संतापले; आमदार संजय गायकवाड यांच्यावर निलंबनाची कारवाई होण्याची शक्यता
- “तुझी लायकी किती तू बोलतो किती!” नवनाथ बन यांच्या आरोपांनंतर निलेश राणे आक्रमक; महायुतीत वाद
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
