‘बॉर्डर’ बघायलाही नव्हते पैसे, आज त्याच सिनेमाचा हिरो; ‘बॉर्डर 2’ मधील ‘या’ अभिनेत्याचा थक्क करणारा प्रवास!

नशिबाचं चक्र कसं आणि कधी फिरेल हे खरंच सांगता येत नाही, याचाच एक जबरदस्त प्रत्यय सध्या बॉलीवूडमध्ये आला आहे. 1997 मध्ये जेव्हा जे.पी. दत्ता यांचा ‘बॉर्डर’ सिनेमा आला होता, तेव्हा तो पाहण्यासाठी एका मुलाकडे खिशात दमडीही नव्हती आणि आज तोच मुलगा ‘बॉर्डर 2’ मध्ये खांद्यावर स्टार्स लावून मुख्य भूमिका गाजवतोय. हा अभिनेता दुसरा तिसरा कोणी नसून सर्वांचा लाडका दिलजीत दोसांझ (Diljit Dosanjh) आहे.

सध्या सनी देओलचा ‘बॉर्डर 2’ (Border 2) बॉक्स ऑफिसवर अक्षरशः धुमाकूळ घालतोय. 23 जानेवारीला रिलीज झालेल्या या सिनेमाने अवघ्या काही दिवसांत 50 कोटी रुपयांचा टप्पा पार केला आहे. सनी देओल, वरुण धवन आणि अहान शेट्टी यांच्यासोबतच दिलजीत दोसांझच्या कामाचंही प्रचंड कौतुक होत आहे. पण या यशामागे दिलजीतचा मोठा संघर्ष दडलेला आहे.

Border 2 Diljit Dosanjh

एका मुलाखतीत जुन्या आठवणींना उजाळा देताना दिलजीतने एक मोठा गौप्यस्फोट केला. तो म्हणाला, “जेव्हा पहिला ‘बॉर्डर’ आला, तेव्हा आमच्या घरची परिस्थिती बेताची होती. मला सिनेमा बघायची प्रचंड इच्छा होती, पण तिकीट काढायला पैसे नसल्याने मला तो थिएटरमध्ये पाहता आला नाही.” पण आज आपल्या टॅलेंटच्या जोरावर त्याच दिलजीतने हे सिद्ध केलंय की जिद्द असेल तर काहीच अशक्य नाही.

या सीक्वेलमध्ये दिलजीत ‘फ्लाइंग ऑफिसर निर्मलजीत सिंह सेखों’ यांची भूमिका साकारत आहे. याबद्दल बोलताना तो म्हणाला, “परमवीर चक्र विजेते सेखों यांची भूमिका साकारताना माझा ऊर अभिमानाने भरून आला आहे.”

दरम्यान, या सिनेमाच्या घोषणेवेळी दिलजीत एका वेगळ्याच वादात अडकला होता. पाकिस्तानी अभिनेत्री हानिया आमिरसोबत ‘सरदारजी 3’ मध्ये काम केल्यामुळे त्याच्यावर सडकून टीका झाली होती. त्याला ‘बॉर्डर 2’ मधून काढून टाकण्याची मागणीही सोशल मीडियावर जोर धरू लागली होती. मात्र, या सर्व विरोधाला पुरून उरत दिलजीतने आपल्या अभिनयाने प्रेक्षकांची मने जिंकली आहेत.

📌 महत्वाच्या बातम्या

• ‘धुरंधर’ चित्रपटातील फेम अभिनेत्याला अटक; 10 वर्षे मोलकरणीचं लैंगिक शोषण, मुंबईत खळबळ!
• IND vs NZ : अवघ्या 10 ओव्हरमध्ये खेळ खल्लास! अभिषेक शर्माचं वादळ; न्यूझीलंडचा लाजीरवाणा पराभव
• ‘ही ICC नाही, तर इंडियन क्रिकेट काऊन्सिल!’; पाकिस्तान क्रिकेट बोर्डाच्या माजी अध्यक्षांचा थेट भारतावर वार