तुम्हीही नेहमी ‘आम्ही उघड्यावरचं खात नाही, मोठ्या आणि ब्रँडेड हॉटेलमध्येच जेवतो’ असं अभिमानाने सांगता का? मग जरा थांबा. कारण मोठ्या आणि नामांकित हॉटेल्सच्या किचनमध्ये नेमकं काय शिजतंय, हे ऐकून तुमच्याही पायाखालची वाळू सरकेल. अन्न व औषध प्रशासन (FDA) आयुक्त तुकाराम मुंडे (Tukaram Mundhe) यांनी नागपूरमधील प्रसिद्ध हॉटेल्सवर धडक कारवाई करत अत्यंत धक्कादायक प्रकार उजेडात आणला आहे.
नागपूरच्या प्रसिद्ध ‘अशोका रेस्टॉरंट’मध्ये एका ग्राहकाच्या सूपमध्ये चक्क मेलेले झुरळ सापडल्याने मोठी खळबळ उडाली. कुणाल नरसापूरकर हे तिथे जेवायला गेले असताना हा किळसवाणा प्रकार घडला. या घटनेची माहिती मिळताच तुकाराम मुंडे यांच्या एफडीए विभागाने तातडीने दखल घेत या हॉटेलवर छापा टाकला आणि थेट त्यांचा परवानाच रद्द केला.
Tukaram Mundhe FDA Action
अशोका रेस्टॉरंटच्या किचनची तपासणी केली असता अधिकाऱ्यांना तिथे प्रचंड अस्वच्छता आढळून आली. सर्वात धक्कादायक बाब म्हणजे, हॉटेलच्या फ्रिजमध्ये शाकाहारी आणि मांसाहारी पदार्थ एकत्र आणि अतिशय अयोग्य पद्धतीने कोंबून ठेवल्याचे समोर आले. थेट ग्राहकांच्या आरोग्याशी असा जीवघेणा खेळ सुरू असल्याचे पाहून अधिकाऱ्यांनी तात्काळ कठोर कारवाई केली.
फक्त अशोका रेस्टॉरंटच नाही, तर नागपूरच्या प्रसिद्ध ‘हिरा स्वीट्स’वरही नुकतीच अशीच कारवाई करण्यात आली. तिथे तर किचनमध्ये चक्क मेलेले उंदीर सापडले होते. तुकाराम मुंडे यांनी एफडीएची सूत्रे हाती घेतल्यापासून राज्यभर भेसळखोरांचे आणि अस्वच्छ हॉटेल्सचे धाबे दणाणले आहेत.
मुंडे यांच्या धडक कारवायांमुळे राज्यात भेसळयुक्त दुधाचे प्रमाणही मोठ्या प्रमाणावर घटले आहे. तुमच्याही आजूबाजूला कुठेही असा संशयास्पद प्रकार किंवा अस्वच्छता दिसल्यास तात्काळ एफडीएकडे तक्रार करा, असे आवाहन आता प्रशासनाकडून करण्यात आले आहे.
📌 महत्वाच्या बातम्या
- हातात संविधान आणि थेट ट्रकवर; प्रकाश राज यांनी दिल्ली का दणाणून सोडली?
- ‘आमचं सरकार जनतेने निवडलंय, ते कसं चालवायचं हे…..’; कंगना राणौत थेट विरोधकांवर कडाडली!
- “माझ्या हृदयाचे ठोके १० मिनिटांसाठी थांबले होते”; श्रेयस तळपदेने सांगितला थरारक अनुभव
