प्रतिनिधी, 25 ऑक्टोबर: मराठा आरक्षणासाठी लढा देणारे मनोज जरांगे यांनी उघड केलेल्या ऑडिओ क्लीपवरून राजकीय वातावरण चांगलेच तापले आहे. या क्लीपमध्ये ५०० कोटी रुपयांचा उल्लेख असून जरांगे यांना संपवण्याचे षडयंत्र रचले जात असल्याचा आरोप आहे. याच ऑडिओ क्लीपच्या अनुषंगाने शिवसेना (ठाकरे गट) नेत्या सुषमा अंधारे (Sushma Andhare) यांनी एका सविस्तर फेसबुक पोस्टद्वारे यूट्यूबर सुशील कुलकर्णी यांच्यावर अत्यंत जहरी टीका केली आहे.
आरोपांनुसार, या व्हायरल क्लीपमधील संवाद भाजप आमदार अतुल भातखळकर, भाजप पदाधिकारी श्वेता शालिनी, यूट्यूबर सुशील कुलकर्णी आणि अतुल लिमये या चौघांमधील आहे. या चारही जणांनी हे आरोप फेटाळून लावले आहेत. अंधारे यांनी सांगितले की, दोन दिवसांपूर्वी आपण केवळ दीड मिनिटांचा ऑडिओ ऐकला होता, मात्र आता संपूर्ण ३०-३२ मिनिटांची क्लीप ऐकल्यानंतर बधीर झाल्यासारखे वाटले.
या क्लीपमध्ये भाजप खासदार उदयनराजे भोसले यांचाही उल्लेख असल्यावरून अंधारे यांनी संताप व्यक्त केला आहे. ‘उदयनराजेंना आपण मॅनिप्यूलेट करू शकू, असे वाटण्याइतकी मजल अत्यंत भिकार मानसिकतेच्या सुशील कुलकर्णीची गेली आहे. हा कुलकर्णीचा माज आहे की उदयनराजेंची अवहेलना?’ असा सवाल त्यांनी केला. तसेच, नेहमी आक्रमक असणारे उदयनराजेंचे समर्थक यावर गप्प का आहेत? आतापर्यंत मराठा तरुणांनी सुशील कुलकर्णीचा स्टुडिओ फोडून त्याला चोप द्यायला हवा होता, असेही त्या म्हणाल्या.
क्लीपमध्ये स्वतःच्या नावाचा उल्लेख आल्याबद्दल बोलताना अंधारे यांनी पुरुषी मानसिकतेवर प्रहार केला. एखादी स्त्री हल्ल्याने नामोहरम होत नसेल, तर तिच्या चारित्र्यावर चिखलफेक करणे हाच रामबाण उपाय मानला जातो, असे त्या म्हणाल्या. स्वतःच्या फसलेल्या करिअरची जखम घेऊन टुकार दर्जाच्या पत्रकारितेवर भाजपचा पट्टा गळ्यात बांधलेला कुलकर्णी स्वतःला भाजप प्रवक्त्याचा गुरू म्हणवतो, अशी सडकून टीका त्यांनी केली.
यावेळी अंधारे यांनी कुलकर्णीच्या आडनावावरूनही मोठा दावा केला. सुरुवातीला ‘सुशील रेणापूरकर’ असे आडनाव लावणारा हा माणूस कुलकर्णी आडनावाचे विशेषाधिकार (प्रिव्हिलेज) मिळवण्यासाठी महाधूर्तपणे ‘सुशील कुलकर्णी’ झाला, असा आरोप त्यांनी केला. वाढवण बंदर किंवा इतर प्रकल्पांना विरोध करणाऱ्यांना देशविरोधी ठरवणे आणि त्यांना अमेरिका-चीनकडून फंडिंग मिळते असे नरेटिव्ह वर्तमानपत्रांमधून रुजवू शकतो, या कुलकर्णीच्या आत्मविश्वासावर वर्तमानपत्रांनीही विश्वासार्हतेसाठी रान उठवायला हवे, असे आवाहन त्यांनी केले.
जरांगे यांच्याविरोधात बोलण्यासाठी टीम तयार करणे, त्यांना पैसे देणे आणि गावोगावी रॅली काढण्याच्या रणनीतीवरही अंधारे यांनी भाष्य केले. जरांगेंचे आंदोलन शरद पवार किंवा ठाकरेंच्या पाठबळावर चालते, हे खोटे नरेटिव्ह विविध यूट्यूब चॅनेल्सवरून पेरत राहण्याचे षडयंत्र यात उघड होत असल्याचा दावा त्यांनी केला. कुलकर्णी, भातखळकर, श्वेता शालिनी किंवा लिमये हे तथाकथित वर्णश्रेष्ठत्वाने पछाडलेले लोक मराठ्यांचा मेंदू भ्रमित करून त्यांना त्यांच्याच नेत्याविरोधात उभे करू पाहत आहेत, असे अंधारे यांनी नमूद केले.
एका मोठ्या आंदोलनाला बदनाम करण्यासाठी सुपारीबाज लोक पुढे येत असून, जरांगेंनी पैसे खाल्ले आणि त्यांच्या फार्म हाऊसवर बाया असायच्या, असे बोलणाऱ्या बायका मराठा समाजातूनच तयार केल्या जात असल्याचा गंभीर आरोप त्यांनी केला. ऑडिओ क्लीप खरी असून त्यात कुणाचे आवाज आहेत हे प्रत्येकाला समजते, मात्र सत्ताधारी पक्ष ही क्लीप खोटी ठरवायला क्षणाचाही वेळ लावणार नाही, असेही अंधारे शेवटी म्हणाल्या.
📌 महत्वाच्या बातम्या
- म्हाडाच्या ८१४ सदनिका आणि भूखंड हडप प्रकरण; २३ बिल्डरांची गुन्हे शाखेकडून चौकशी सुरू
- ‘लाडकी बहीण’नंतर आता एकल महिलांसाठी मोठी योजना; चंद्रकांत पाटलांची घोषणा, १२ लाख जणींना मिळणार आधार!
- प्राजक्ता हनमघरची ट्रोलर्सना सणसणीत चपराग; ‘तू हिजडा आहेस’ म्हणणाऱ्याला दाखवली त्याची जागा
Quick Answers
या ऑडिओ क्लीपमध्ये ५०० कोटी रुपयांचा उल्लेख असून मनोज जरांगे यांना संपवण्याचे षडयंत्र रचले जात असल्याचा आरोप आहे.
आरोपांनुसार, या क्लीपमधील संवाद भाजप आमदार अतुल भातखळकर, भाजप पदाधिकारी श्वेता शालिनी, यूट्यूबर सुशील कुलकर्णी आणि अतुल लिमये या चौघांमधील आहे. मात्र, या चौघांनीही हे आरोप फेटाळले आहेत.
उदयनराजेंना मॅनिप्यूलेट करू शकू असे वाटण्याइतकी मजल सुशील कुलकर्णीची गेली असून, हा कुलकर्णीचा माज आहे की उदयनराजेंची अवहेलना, असा सवाल सुषमा अंधारे यांनी केला.
सुरुवातीला 'सुशील रेणापूरकर' असे आडनाव लावणारी ही व्यक्ती कुलकर्णी आडनावाचे विशेषाधिकार मिळवण्यासाठी 'सुशील कुलकर्णी' झाली, असा दावा सुषमा अंधारे यांनी केला आहे.
टीप: खालील झटपट उत्तरे AI च्या सहाय्याने तयार करण्यात आली असून ती वरील मूळ बातमीतील माहितीनुसार आहेत. अधिक संदर्भासाठी संपूर्ण बातमी वाचा.
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
