कोल्हापूर, 20 ऑक्टोबर: संपूर्ण राज्याचे लक्ष लागलेल्या कोल्हापूरच्या ‘गोकुळ’ दूध संघाच्या निवडणुकीत महायुतीला मोठा धक्का बसला आहे. माजी मंत्री आणि काँग्रेस नेते सतेज ऊर्फ बंटी पाटील यांच्या नेतृत्वाखालील राजर्षी शाहू शेतकरी समविचारी आघाडीने २५ पैकी १६ जागांवर विजय मिळवला आहे. महायुतीकडून खासदार धनंजय महाडिक, मंत्री हसन मुश्रीफ आणि मंत्री चंद्रकांत पाटील यांच्यासारखे दिग्गज नेते मैदानात होते. सर्व २५ जागा जिंकण्याचा विश्वास महायुतीच्या नेत्यांना होता, मात्र आमदार विश्वजीत कदम यांनी दिलेल्या माहितीनुसार सतेज पाटील यांच्या आघाडीने १६-९ अशा फरकाने दणदणीत विजय नोंदवला आहे.
या विजयानंतर सतेज पाटील यांच्यावर राज्यभरातून अभिनंदनाचा वर्षाव होत आहे. काही दिवसांपूर्वी पुण्यातील एका आंदोलनादरम्यान आमदार विश्वजीत कदम यांनी विवेकानंद पाटील यांना उद्देशून ‘कोल्हापूरचं राजकारण बंटी पाटलाला विचारुन करायचं’ असा डायलॉग मारला होता, ज्याचा व्हिडिओ प्रचंड चर्चेत आला होता. आता गोकुळच्या निकालानंतर कदम यांनी ट्विट करत सतेज पाटलांचे पुन्हा एकदा खास शैलीत अभिनंदन केले आहे. ‘अभिनंदन बंटीदादा, मानलं राव तुम्हाला. शेवटी काय, तो कंडका पाडलाच!’ अशी प्रतिक्रिया विश्वजीत कदम यांनी दिली आहे.
आमदार रोहित पवार यांनीही ‘खटक्यावर बोट जाग्यावर पलटी’ केल्याबद्दल सतेज पाटील, ऋतुराज पाटील आणि त्यांच्या संपूर्ण टीमचे अभिनंदन केले आहे. एकदा ठरवले की ‘कंडका पाडल्याशिवाय’ सोडायचे नाही, हेच कोल्हापूरकरांनी दाखवून दिल्याचे पवार म्हणाले. तसेच, आता संस्थेत दुधासारखा शुभ्र कारभार होईल आणि दूध उत्पादकांना पुन्हा चांगले दिवस येतील, असा विश्वास त्यांनी व्यक्त केला. सत्ता आणि पैशाच्या बळावर कितीही अडथळे आणले तरी संघर्ष सुरूच ठेवा, पदवीधर आणि शिक्षक मतदारसंघाच्या निवडणुकीतही असाच निकाल लागेल, असा संदेश यातून मिळाल्याचे रोहित पवार यांनी स्पष्ट केले.
दरम्यान, या निवडणुकीत महायुतीच्या दोन प्रमुख नेत्यांच्या कुटुंबातील सदस्यांना पराभवाचा सामना करावा लागला आहे. मंत्री हसन मुश्रीफ यांचे चिरंजीव नविद मुश्रीफ आणि भाजप महिला आघाडीच्या उपाध्यक्षा तसेच माजी संचालिका शौमिका महाडिक यांचा पराभव झाला आहे. शौमिका महाडिक यांना १२० मतांनी पराभव स्वीकारावा लागल्याने महाडिक कुटुंबासाठी हा अत्यंत मोठा धक्का मानला जात आहे.
📌 महत्वाच्या बातम्या
- गोकुळच्या निकालानंतर सतेज पाटील यांची पहिली मोठी प्रतिक्रिया; म्हणाले, ‘देवाची भीती घालून शपथा…’
- टायगर श्रॉफवरील गोळीबाराने राम गोपाल वर्मा भडकले; म्हणाले, ‘केवळ अहंकार जपण्यासाठी…’
- बीसीसीआय आणि क्रिकेट ऑस्ट्रेलियामध्ये ‘अम्पायर एक्सचेंज’; पराशर जोशींना नवी संधी
Quick Answers
सतेज पाटील यांच्या नेतृत्वाखालील राजर्षी शाहू शेतकरी समविचारी आघाडीने एकूण २५ पैकी १६ जागांवर विजय मिळवला आहे.
आमदार विश्वजीत कदम यांनी ट्विट करत 'अभिनंदन बंटीदादा, मानलं राव तुम्हाला. शेवटी काय, तो कंडका पाडलाच!' अशी प्रतिक्रिया देऊन सतेज पाटील यांचे अभिनंदन केले.
मंत्री हसन मुश्रीफ यांचे चिरंजीव नविद मुश्रीफ आणि भाजप महिला आघाडीच्या उपाध्यक्षा शौमिका महाडिक यांचा या निवडणुकीत पराभव झाला आहे.
शौमिका महाडिक यांना १२० मतांनी पराभव स्वीकारावा लागला आहे.
टीप: खालील झटपट उत्तरे AI च्या सहाय्याने तयार करण्यात आली असून ती वरील मूळ बातमीतील माहितीनुसार आहेत. अधिक संदर्भासाठी संपूर्ण बातमी वाचा.
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
