पुणे: सध्या आगामी गणेशोत्सवात डीजे वाजवण्यावरून मोठा वाद उफाळून आला आहे. एका बाजूला काही नागरिक डीजे बंदीची आग्रही मागणी करत आहेत, तर दुसरीकडे गणेश मंडळांनी याला तीव्र विरोध दर्शवला आहे. याच तणावाच्या वातावरणात आज पुण्यातील काही नागरिकांनी थेट रस्त्यावर उतरून महानगरपालिकेवर धडक मोर्चा काढला. त्यामुळे आता खरोखरच डीजेवर बंदी येणार का, यावर पुणे पोलिसांनी पहिल्यांदाच आपली ठोस भूमिका स्पष्ट केली आहे.
डीजे बंदीच्या या मुद्द्याला सामाजिक कार्यकर्ते विद्यानंद बापट यांनी सुरुवातीलाच वाचा फोडली होती. यासाठी त्यांना मंडळांच्या कार्यकर्त्यांच्या रोषाचाही सामना करावा लागला होता. आज ‘पुणेकर मंचा’च्या वतीने बालगंधर्व चौक ते महानगरपालिका असा मोर्चा काढण्यात आला. सुरक्षेच्या कारणास्तव बापट या मोर्चात सहभागी होऊ शकले नाहीत, त्यांच्या घरावर कडेकोट पोलीस बंदोबस्त तैनात करण्यात आला होता.
Pune police react to DJ ban in Ganeshotsav
पुणे गणेशोत्सव: डीजे बंदीच्या मागणीवर पोलिसांची भूमिका काय?
या मोर्चानंतर आंदोलकांनी पुणे पोलिसांची भेट घेऊन त्यांना डीजे बंदीसाठी एक सविस्तर निवेदन दिलं. यावर बोलताना पोलीस उपायुक्त ऋषिकेश रावले यांनी सांगितलं की, सुमारे तीनशे ते साडेतीनशे नागरिकांनी एकत्र येत हा मोर्चा काढला आहे. त्यांनी दिलेल्या निवेदनातील मागण्यांचा पोलीस प्रशासन नक्कीच गांभीर्याने विचार करेल. सर्वोच्च न्यायालयाच्या मार्गदर्शक तत्त्वांनुसार ध्वनी प्रदूषण रोखण्यासाठी आम्ही कटिबद्ध आहोत, असं रावले यांनी स्पष्ट केलं.
ध्वनी प्रदूषणाच्या अनुषंगाने पोलीस आयुक्तांनी प्रत्येक झोनमध्ये बैठका घेऊन गणेश मंडळांना सक्त सूचना दिल्या आहेत. अलीकडेच झालेल्या दहीहंडी आणि ईद-ए-मिलाद उत्सवांमध्येही डीजेचा वापर लक्षणीयरीत्या कमी झाल्याचं रावले यांनी निदर्शनास आणून दिलं. ज्यांनी आवाजाची मर्यादा ओलांडली, त्यांच्यावर कठोर कारवाईही करण्यात आली आहे. त्यामुळे यंदा गणेशोत्सवातही नियम मोडणाऱ्यांची खैर नसेल, असेच संकेत पोलिसांनी दिले आहेत.
दरम्यान, या संपूर्ण प्रकरणावर खासदार सुप्रिया सुळे यांनीही भाष्य करत चिंता व्यक्त केली आहे. हा वाद आता खूपच टोकाला गेला असून, आगामी सणासुदीचे दिवस पाहता सर्वांनी एकत्र बसून यावर समंजसपणे तोडगा काढायला हवा, असा सल्ला त्यांनी दिला. शिक्षणाचं माहेरघर म्हणून ओळखल्या जाणाऱ्या पुण्यात सातत्याने चुकीच्या घटना घडत आहेत आणि गुन्हेगारांमध्ये आता पोलिसांच्या वर्दीचीही धास्ती उरली नाही, अशी खंत सुळे यांनी बोलून दाखवली.
📌 महत्वाच्या बातम्या
- “तो कुरळ्या केसांचा बाबा…”, राज ठाकरेंनी भरसभेत उडवली अनिरुद्धाचार्यांची खिल्ली
- राज ठाकरेंचा खळबळजनक दावा; ‘गणपतीच्या दिवसांत दंगली घडवल्या जातील, हिंदू-मुस्लिमांनी…’
- अमित ठाकरेंनी पुण्यात हटवला मोदींचा फोटो, आता राज ठाकरेंचा थेट इशारा; म्हणाले, ‘आत्ताच…’
बातम्यांसाठी YouTube चॅनेल Subscribe करा
Subscribe Now
