प्रतिनिधी, 19 नोव्हेंबर: ‘द हंड्रेड’ (The Hundred) स्पर्धेच्या २०२७ च्या हंगामापूर्वी इंग्लंडचे माजी फलंदाज इयान बेल यांची ‘बर्मिंगहॅम फिनिक्स’ संघाच्या मुख्य प्रशिक्षकपदी नियुक्ती करण्यात आली आहे. त्यांनी शेन बाँड यांची जागा घेतली असून, बाँड यांना त्यांच्या दोन वर्षांच्या कराराच्या मध्यभागीच पदावरून हटवण्यात आले आहे.
मागील हंगामात बर्मिंगहॅम फिनिक्सची कामगिरी अत्यंत निराशाजनक होती. गुणतालिकेत ते शेवटच्या स्थानी राहिले होते आणि त्यांना सलग सात सामने गमवावे लागले होते. स्टार खेळाडू जेकब बेथेल याची दुखापत, इतर प्रमुख खेळाडूंचा खराब फॉर्म आणि ड्रेसिंग रूममधील तणाव यामुळे संघ संघर्ष करत होता. या सर्व परिस्थितीत बदल करण्यासाठी व्यवस्थापनाने बेल यांच्याकडे संघाची सूत्रे सोपवली आहेत.
२०२० मध्ये आंतरराष्ट्रीय क्रिकेटमधून निवृत्ती घेतल्यानंतर इयान बेल यांनी प्रशिक्षक म्हणून आपली एक नवी ओळख निर्माण केली आहे. गेल्या सहा वर्षांच्या कोचिंग करिअरमध्ये त्यांनी ‘दुबई कॅपिटल्स’सोबत आयएलटी२० (ILT20) स्पर्धेचे विजेतेपद मिळवले आहे. याशिवाय त्यांना आयपीएलसह न्यूझीलंड आणि श्रीलंका राष्ट्रीय संघासोबत काम करण्याचा अनुभव आहे. ‘द हंड्रेड’ स्पर्धेतही ते डॅनियल व्हिटोरी यांचे सहाय्यक म्हणून पाच हंगाम फिनिक्ससोबत होते, तर गेल्या वर्षी ते ‘सदर्न ब्रेव्ह’चे सहाय्यक प्रशिक्षक होते.
या पदासाठी जोनाथन ट्रॉट आणि डॅरेन लेहमन यांसारख्या अनुभवी प्रशिक्षकांचाही विचार सुरू होता. मात्र, चार फेऱ्यांच्या मुलाखतीनंतर ४४ वर्षीय इयान बेल यांनी बाजी मारली. संघात स्थानिक खेळाडूंचा प्रभाव वाढवण्याच्या उद्देशाने त्यांची निवड करण्यात आली आहे. आता आगामी हंगामापूर्वी होणाऱ्या लिलावात बेल यांच्या मार्गदर्शनाखाली संघाची नव्याने बांधणी करणे फिनिक्ससाठी अत्यंत महत्त्वाचे ठरणार आहे.
सध्या आयएलटी२० च्या आगामी हंगामासाठी दुबईत असलेल्या बेल यांनी ‘क्रिकइन्फो’शी बोलताना या नव्या जबाबदारीबाबत आनंद व्यक्त केला. एजबॅस्टनचा संघ जेव्हा लयीत असतो, तेव्हा त्याहून उत्तम काहीच नसते, अशी भावना त्यांनी व्यक्त केली. ते म्हणाले, “ही एक मोठी जबाबदारी आहे: हे एजबॅस्टन आहे, हे द हंड्रेड आहे. मला वाटतं जगभरातील अनेकांना या पदाची अपेक्षा असावी.”
या संधीबद्दल पुढे बोलताना बेल म्हणाले, “या निवडीमुळे मी अत्यंत खूश आहे. भरपूर काम करायचे आहे, परंतु मला ही संधी मिळाल्याचा अभिमान वाटतो आणि मी लवकरात लवकर कामाला लागण्यास उत्सुक आहे.”
फ्रँचायझी लीगमध्ये स्थानिक टॅलेंटला प्राधान्य देण्याबाबत बेल यांनी आपली भूमिका स्पष्ट केली. ते म्हणाले, “जेव्हा तुम्ही जगभरातील अनेक फ्रँचायझी पाहता, तेव्हा स्थानिक खेळाडू त्यांच्यासाठी खेळत असतील तर त्याला अधिक महत्त्व असते. हे खेळाडू पुरेसे सक्षम असले पाहिजेत, पण स्थानिक खेळाडूंमुळे चाहतेही संघाशी मोठ्या प्रमाणावर जोडले जातात.”
📌 महत्वाच्या बातम्या
- जय शहा यांची आयसीसी अध्यक्षपदी बिनविरोध निवड; रोहित शर्माचा खास संदेश
- नातेवाईकाच्या लग्नात एकत्र वावरले, अन् काही तासांतच पत्नीची झोपेत दगडाने ठेचून हत्या; बीडमधील धक्कादायक घटना
- लांबसडक आणि दाट केसांसाठी घरच्या घरी बनवा कढीपत्ता-मेथीचे खास तेल; जाणून घ्या सोपी पद्धत








