बीड, 18 नोव्हेंबर: बीड जिल्ह्याच्या शिरूर कासार तालुक्यातील तिंतरवणी ग्रुप ग्रामपंचायतीअंतर्गत येणाऱ्या आनंदवाडी येथे एक हादरवून टाकणारी घटना घडली आहे. अनैतिक संबंधांना विरोध करणाऱ्या ५५ वर्षीय पत्नीची पतीनेच डोक्यात दगड घालून निर्घृण हत्या केली आहे. या घटनेनंतर संशयित पती घटनास्थळावरून पसार झाला असून, चकलांबा पोलीस ठाण्यात याप्रकरणी गुन्हा दाखल करण्यात आला आहे.
भिवराबाई विष्णू कदम (वय ५५) असे मृत महिलेचे नाव आहे, तर विष्णू गणपत कदम (रा. आनंदवाडी) असे फरार आरोपी पतीचे नाव आहे. पोलिसांनी दिलेल्या माहितीनुसार, अनैतिक संबंधांवरून गेल्या वर्षभरापासून या पती-पत्नीमध्ये वाद सुरू होता. त्यांच्यात अनेकदा शाब्दिक चकमकी उडत असत. रविवारी रात्री मात्र हा वाद अधिकच विकोपाला गेला.
विशेष म्हणजे, हत्येच्या अगोदर रविवारी एका नातेवाईकाच्या विवाह सोहळ्यात हे दोघेही दिवसभर एकत्र वावरत होते. त्यावेळी दोघांमध्ये सर्व काही सुरळीत असल्याचे चित्र होते. मात्र, सोमवारी पहाटे साडेचार ते पाच वाजेच्या सुमारास भिवराबाई घरात गाढ झोपेत असताना विष्णूने घराच्या मागच्या दरवाजाने आत प्रवेश केला आणि झोपलेल्या पत्नीच्या डोक्यात मोठा दगड घातला.
अचानक झालेल्या या आवाजामुळे घरातील इतर सदस्यांना जाग आली. त्यांनी पाहणी केली असता भिवराबाई रक्ताच्या थारोळ्यात पडल्याचे दिसून आले. कुटुंबीयांनी त्यांना उपचारासाठी तातडीने जिल्हा रुग्णालयात दाखल केले, मात्र तेथील वैद्यकीय अधिकाऱ्यांनी त्यांना मृत घोषित केले. घटनेची माहिती मिळताच चकलांबा पोलिसांनी घटनास्थळी पोहोचून पंचनामा केला असून, फरार पतीच्या शोधासाठी पोलीस पथके रवाना केली आहेत.
📌 महत्वाच्या बातम्या
- Winter Health Care: हिवाळ्यात निरोगी राहण्यासाठी बाजरी, गूळ, तुपासह आहारात करा ‘हे’ बदल
- अर्णब, मुरासूनंतर आता ‘अकवान’ चक्रीवादळाचे संकट; विदर्भासह ‘या’ राज्यांना मुसळधार पावसाचा इशारा
- ४००० कोटींच्या ‘रामायण’मध्ये झळकले हे ५ मुस्लिम कलाकार; जाणून घ्या कोणाची कोणती भूमिका?








