मुंबई, 13 नोव्हेंबर: काँग्रेस नेते सतेज पाटील यांनी गोकुळ दूध संघाच्या निवडणुकीतील एक रंजक किस्सा उलगडला. मतमोजणीच्या दिवशी गोंधळ सुरू असताना राष्ट्रवादीचे ज्येष्ठ नेते शरद पवार यांचा फोन आल्याचे त्यांनी सांगितले. तसेच, सद्यस्थितीत राष्ट्रवादी काँग्रेसच्या दोन्ही गटांचे विलिनीकरण होणार नसल्याचा विश्वासही पाटील यांनी व्यक्त केला.
मतमोजणीच्या दिवशीची आठवण सांगताना सतेज पाटील म्हणाले की, निकाल पूर्ण होण्यास वेळ लागत होता. त्यावेळी संध्याकाळी चार-पाच वाजता शरद पवार यांचा फोन आला. पाटील मोटरसायकलवरून मतमोजणी केंद्रावर गेले होते, याची माहिती कदाचित पवारांना मिळाली असावी. पवारांनी परिस्थिती विचारल्यावर पाटील यांनी तिथे गोंधळ सुरू असल्याचे सांगितले. त्यावर, संपूर्ण निकाल लागून सर्टिफिकेट हातात मिळेपर्यंत मतमोजणी केंद्र सोडू नको, असा सल्ला पवारांनी दिला. आपणही सर्व प्रक्रिया पूर्ण झाल्यावरच बाहेर पडू, असे त्यांना सांगितल्याचे पाटील म्हणाले.
या प्रक्रियेत आपण अजिबात गाफील नव्हतो, हे सांगताना सतेज पाटील यांनी आपल्या राजकीय अनुभवाचा दाखला दिला. राजकारणात इतकी वर्षे काम केल्यानंतर गाफील राहणे ही अपरिपक्वता ठरली असती. जे १५ वर्षे मित्र होते, ते विरोधक झाल्यावर काय करू शकतात, याचा अंदाज न घेणे म्हणजे राजकारणात कच्चं असण्यासारखे आहे, असेही ते म्हणाले.
गोकुळच्या या निवडणुकीत सतेज पाटील यांच्या आघाडीने १३ जागांवर विजय मिळवला होता, तर भाजपप्रणीत महायुतीला १२ जागा मिळाल्या होत्या. मात्र, राज्य सरकारने चार संचालक नेमून त्यांना मताधिकार दिला आणि गोकुळचे अध्यक्षपद मिळवले. या निर्णयाविरोधातील प्रकरण सध्या उच्च न्यायालयात प्रलंबित असल्याची माहितीही त्यांनी दिली.
राष्ट्रवादी काँग्रेसच्या विलिनीकरणाच्या चर्चेवर सतेज पाटील यांनी भाष्य केले. गेल्या काही दिवसांत आपल्याला हा प्रश्न १० वेळा विचारला गेल्याचे ते म्हणाले. अजित पवार असताना कदाचित यावर चर्चा झाली असेल, पण आता विलिनीकरण होईल असे अजिबात वाटत नाही. सरकारमधील तिन्ही पक्षांमध्ये वाद निर्माण करून अस्थिरता आणल्याशिवाय भाजपला फायदा होत नाही. राष्ट्रवादी आणि शिंदे गट कसे कमकुवत होतील, असा भाजपचा प्रयत्न आहे. त्यामुळे शरद पवार विलिनीकरणाच्या विषयात पडणार नाहीत, याची आपल्याला १०० टक्के खात्री असल्याचे पाटील यांनी स्पष्ट केले.
📌 महत्वाच्या बातम्या
- ‘२० वर्षे परिणाम भोगतोय’, ‘सीरियल किसर’ इमेजवर इमरान हाशमीचे स्पष्ट भाष्य
- मुंबईत पुन्हा बॉम्बस्फोटाची धमकी! महापौर कार्यालय, विमानतळासह ५ ठिकाणे टार्गेटवर
- आमदार परिणय फुकेंच्या मुलाकडून मद्यधुंद अवस्थेत भीषण अपघात? एकाचा मृत्यू; विरोधकांचे गंभीर आरोप
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
