गौतम गंभीरला २०२८ च्या आयपीएलसाठी चार फ्रँचायझींची ऑफर; केकेआर आणि राजस्थान रॉयल्ससोबत चर्चा सुरू

प्रतिनिधी, 30 ऑक्टोबर: इंडियन प्रीमियर लीगच्या (आयपीएल) चार फ्रँचायझींनी २०२८ च्या हंगामासाठी गौतम गंभीरशी मेंटॉर-प्रशिक्षकपदासाठी संपर्क साधला आहे. गंभीर सध्या २०२७ च्या एकदिवसीय विश्वचषकापर्यंत भारतीय संघाचा मुख्य प्रशिक्षक आहे. मात्र, फ्रँचायझींनी त्याला पुन्हा आयपीएलमध्ये आणण्यासाठी आतापासूनच चाचपणी सुरू केली आहे.

गंभीरने त्याची माजी फ्रँचायझी कोलकाता नाईट रायडर्स (KKR) आणि राजस्थान रॉयल्ससोबत याबाबत चर्चा केल्याचे वृत्त आहे. याशिवाय आणखी दोन संघांनीही त्याच्यात रस दाखवला असून त्यांची नावे अद्याप गुलदस्त्यात आहेत. यापैकी एक संघ आयपीएलच्या इतिहासातील सर्वात यशस्वी संघांपैकी एक आहे, तर दुसऱ्या संघाला अद्याप एकदाही विजेतेपद मिळवता आलेले नाही. २०२८ च्या हंगामापूर्वी काही संघ त्यांच्या कोचिंग सेटअपची नव्याने बांधणी करत असून, त्यांना एका अनुभवी मेंटॉरची आवश्यकता आहे.

बीसीसीआयसोबतचा गंभीरचा सध्याचा करार दक्षिण आफ्रिका, झिम्बाब्वे आणि नामिबिया येथे होणाऱ्या २०२७ च्या एकदिवसीय विश्वचषकापर्यंत आहे. बीसीसीआय हा करार २०२८ च्या ऑलिम्पिकपर्यंत वाढवणार की नाही, हे अद्याप स्पष्ट झालेले नाही. जर त्याचा करार वाढला, तर फ्रँचायझींना त्याला संघात घेण्यासाठी आणखी प्रतीक्षा करावी लागू शकते. बीसीसीआयच्या ‘हितसंबंधांच्या संघर्षा’च्या (conflict-of-interest) नियमांनुसार, एकाच वेळी राष्ट्रीय संघ आणि आयपीएलमध्ये पद भूषवता येत नाही.

सध्या गंभीर न्यूझीलंड दौऱ्यावर असून, तेथे भारताने पाच सामन्यांच्या टी-२० मालिकेत ३-० अशी आघाडी घेतली आहे. २०२४ मध्ये त्याने भारतीय संघाची जबाबदारी स्वीकारल्यापासून त्याची पांढऱ्या चेंडूच्या क्रिकेटमधील प्रशिक्षक म्हणून ओळख अधिक मजबूत झाली आहे. त्याच्या मार्गदर्शनाखाली भारताने २०२६ मध्ये टी-२० विश्वचषक आणि आशिया चषक जिंकला.

२०२४ पासून भारताने श्रीलंका (३-०), बांगलादेश (३-०), दक्षिण आफ्रिका (३-१), इंग्लंड (४-१) आणि ऑस्ट्रेलिया (२-१) यांच्याविरुद्ध द्विपक्षीय मालिका जिंकल्या आहेत. भारतीय संघासोबतची ही प्रभावी कामगिरी आणि आयपीएलमधील त्याचे आधीचे यश, यामुळे पुढील हंगामासाठी कोचिंगची आखणी करणाऱ्या फ्रँचायझींसाठी तो एक पसंतीचा पर्याय ठरला आहे.

गंभीरने त्याच्या आयपीएल कारकिर्दीची सुरुवात २००८ मध्ये दिल्ली डेअरडेव्हिल्सकडून केली. २०१० पर्यंत तो या संघाचा भाग होता. त्यानंतर २०१८ मध्ये तो पुन्हा या संघात परतला, मात्र त्यावेळी त्याने मध्यातूनच कर्णधारपद सोडत श्रेयस अय्यरकडे नेतृत्व सोपवले. २०११ मध्ये केकेआरमध्ये दाखल झाल्यानंतर त्याने २०१२ आणि २०१४ मध्ये संघाला पहिली दोन आयपीएल विजेतेपदे मिळवून दिली आणि पाच वेळा प्लेऑफमध्ये पोहोचवून लीग मधील प्रमुख संघ म्हणून स्थान मिळवून दिले.

खेळाडू म्हणून निवृत्त झाल्यानंतर, २०२२ मध्ये तो लखनौ सुपर जायंट्सचा (LSG) मेंटॉर बनला. त्यांच्या पहिल्याच दोन हंगामात (२०२२ आणि २०२३) संघाने प्लेऑफ गाठले. त्यानंतर २०२४ च्या हंगामापूर्वी केकेआरचे सहमालक शाहरुख खान यांनी गंभीरला ‘मन्नत’ या त्यांच्या निवासस्थानी बोलावून संघात परतण्याची विनंती केली. २०२४ मध्ये श्रेयस अय्यरच्या नेतृत्वाखाली केकेआरने १४ पैकी ९ साखळी सामने जिंकून गुणतालिकेत अव्वल स्थान मिळवले आणि १० वर्षांच्या प्रतीक्षेनंतर तिसरे विजेतेपद पटकावले.

२०२४ च्या विजयानंतर भारतीय संघाची जबाबदारी घेण्यासाठी गंभीरने केकेआरची साथ सोडली. त्यानंतर २०२५ मध्ये केकेआरचा संघ सातव्या आणि २०२६ मध्ये आठव्या स्थानावर राहिला आणि दोन्ही हंगामात प्लेऑफमध्ये पोहोचू शकला नाही. गंभीरच्या एक्झिटनंतर लखनौ सुपर जायंट्सचीही तीच अवस्था झाली. लखनौचा संघ २०२४ आणि २०२५ मध्ये सातव्या, तर २०२६ च्या हंगामात १० व्या स्थानावर राहिला.

📌 महत्वाच्या बातम्या

• न्यूझीलंडविरुद्धच्या टी-२० पूर्वी रंगणार IND vs PAK हायव्होल्टेज सामना; कधी, कुठे पाहाल मॅच?
• ‘२०२९ पर्यंत मुख्यमंत्र्यांना ठेवा म्हणजे झालं’; राज ठाकरेंच्या मिश्किल टोलेबाजीने पिकला हशा
• फडणवीस आणि दोन्ही ठाकरे एकाच मंचावर; ‘हास्यरेषा’च्या प्रकाशनात रंगली राजकीय फटकेबाजी