मुंबई, 26 ऑक्टोबर: राजकारणात आरोप-प्रत्यारोप करण्यात वेळ घालवण्यापेक्षा थेट दुष्काळग्रस्त शेतकऱ्यांच्या बांधावर जाऊन त्यांना मदत करा, असे स्पष्ट आदेश उपमुख्यमंत्री एकनाथ शिंदे यांनी शिवसेनेचे मंत्री, खासदार, आमदार आणि पदाधिकाऱ्यांना दिले आहेत. सरकारी मदत प्रत्यक्ष हातात मिळेपर्यंत म्हणजेच अर्जापासून ते पंचनाम्यापर्यंत शेतकऱ्यांच्या पाठीशी ठामपणे उभे राहण्याचे आवाहन त्यांनी केले आहे.
व्हिडीओ कॉन्फरन्सद्वारे आयोजित बैठकीत बोलताना शिंदे यांनी शिवसेनाप्रमुख बाळासाहेब ठाकरे यांच्या ‘८० टक्के समाजकारण आणि २० टक्के राजकारण’ या विचाराची आठवण करून दिली. दसरा मेळाव्याच्या निमित्ताने शिवसेनेकडून १७९ दुष्काळग्रस्त तालुक्यांमध्ये ४ लाख ६० हजार धान्य किट्स पाठवण्यात आले आहेत. ही मदत आणि आवश्यक जीवनावश्यक वस्तू खऱ्या गरजू कुटुंबांपर्यंत पोहोचवण्याची जबाबदारी स्थानिक पदाधिकाऱ्यांनी घ्यावी, असे निर्देश त्यांनी दिले. तसेच पाण्याची भीषण टंचाई पाहता पक्षाच्या वतीने गावोगावी टँकर पुरवण्याचा विचार असल्याचेही ते म्हणाले.
प्रत्येक मंत्री आणि पालकमंत्र्याने केवळ बैठकांवर अवलंबून न राहता आपल्याकडील दुष्काळग्रस्त भागांचे नियमित दौरे करावेत, अशा सूचना शिंदे यांनी दिल्या. शेत, गाव, बाजारपेठेत जाऊन शेतकरी, महिला, शेतमजूर आणि पशुपालकांशी त्यांनी थेट संवाद साधावा. सध्याची परिस्थिती बिकट असल्यामुळे अनेक शेतकऱ्यांच्या मनात आत्महत्येसारखे टोकाचे विचार येऊ शकतात, त्यांना वेळीच रोखून धीर देण्याचे काम शिवसैनिकांनी करावे, असेही त्यांनी सांगितले.
प्रशासकीय विलंबामुळे किंवा केवळ कागदपत्रांअभावी कोणताही पात्र शेतकरी मदतीपासून वंचित राहू नये, यासाठी मंत्र्यांनी दर पंधरा दिवसांनी प्रशासनाकडून आढावा घ्यावा. मदतीची नोंद वही तयार करून सर्व भागात मदत पोहोचते की नाही ते स्वतः तपासावे, असे निर्देश देण्यात आले आहेत. पीक नुकसान, नुकसानभरपाई, पीक कर्ज पुनर्गठन, कृषी पंपांचा वीजपुरवठा, रोजगार आणि पिण्याचे पाणी यांसारख्या प्रश्नांकडे विशेष लक्ष देण्यास सांगण्यात आले आहे.
पाण्याला सर्वोच्च प्राधान्य देत टँकरची गरज, विहिरी आणि बोअरवेलची सद्यस्थिती, तसेच पुढील १५ ते ३० दिवसांचे पाण्याचे नियोजन करण्याच्या सूचना शिंदे यांनी दिल्या. जनावरांसाठी चारा, पाणी, छावण्या आणि पशुवैद्यकीय सुविधांवरही लक्ष केंद्रित करण्यास सांगण्यात आले आहे. दुष्काळाच्या काळात भव्य कार्यक्रम, स्वागत-सत्कार, शक्तिप्रदर्शन, मंडप आणि जाहिरातबाजीवर खर्च न करता ती साधनसंपत्ती मदतकार्यासाठी वापरावी, असे आवाहन त्यांनी केले.
मायक्रो फायनान्स कंपन्या, बँका आणि खाजगी सावकारांकडून शेतकऱ्यांना होणारा त्रास थांबवण्यासाठी प्रशासकीय पातळीवर ठोस निर्णय घेतले जाणार असून पदाधिकाऱ्यांनी यावर लक्ष ठेवावे. पक्ष, जात किंवा राजकीय मत न पाहता सर्वांना मदत पोहोचली पाहिजे, असे शिंदे यांनी स्पष्ट केले. पदाधिकाऱ्यांच्या काही उपयुक्त सूचना आगामी कॅबिनेट बैठकीत मांडण्याची व केंद्रीय पातळीवरील मागण्यांसाठी केंद्र सरकारला पत्र लिहिण्याची तयारीही त्यांनी दर्शवली. सरकारी यंत्रणेसोबत शिवसेनेची यंत्रणा राबल्यास शेतकऱ्यांना नक्कीच मोठा दिलासा मिळेल, असा विश्वास त्यांनी व्यक्त केला.
📌 महत्वाच्या बातम्या
- ‘त्याला थोडा वेळ द्या’, महागड्या गोलंदाजीनंतर मोहम्मद कैफकडून भुवनेश्वर कुमारची पाठराखण
- बॅलेट पेपर हवा होता, तर राजीव गांधींच्या काळात EVM का आणले? रामदास आठवलेंचा काँग्रेसला सवाल
- दिवाळीपूर्वी शेतकऱ्यांसाठी आनंदाची बातमी! ३० ऑक्टोबरला पीएम किसान योजनेचे २००० रुपये खात्यात जमा होणार
Quick Answers
राजकारणात आरोप-प्रत्यारोप करण्यात वेळ घालवण्यापेक्षा थेट दुष्काळग्रस्त शेतकऱ्यांच्या बांधावर जाऊन त्यांना मदत करा आणि सरकारी मदत मिळेपर्यंत शेतकऱ्यांच्या पाठीशी ठामपणे उभे राहा, असे स्पष्ट आदेश एकनाथ शिंदे यांनी दिले आहेत.
दसरा मेळाव्याच्या निमित्ताने शिवसेनेकडून १७९ दुष्काळग्रस्त तालुक्यांमध्ये ४ लाख ६० हजार धान्य किट्स पाठवण्यात आले आहेत.
प्रशासकीय विलंब किंवा कागदपत्रांअभावी शेतकरी मदतीपासून वंचित राहू नये, यासाठी मंत्र्यांनी दर पंधरा दिवसांनी प्रशासनाकडून आढावा घ्यावा आणि मदतीची नोंद वही तयार करून सर्व भागात मदत पोहोचते की नाही ते स्वतः तपासावे, असे निर्देश देण्यात आले आहेत.
दुष्काळाच्या काळात भव्य कार्यक्रम, स्वागत-सत्कार, शक्तिप्रदर्शन, मंडप आणि जाहिरातबाजीवर खर्च न करता ती साधनसंपत्ती दुष्काळग्रस्त शेतकऱ्यांच्या मदतकार्यासाठी वापरावी, असे आवाहन करण्यात आले आहे.
टीप: खालील झटपट उत्तरे AI च्या सहाय्याने तयार करण्यात आली असून ती वरील मूळ बातमीतील माहितीनुसार आहेत. अधिक संदर्भासाठी संपूर्ण बातमी वाचा.
Ask Maharashtra Desha
आधी या वेबसाइटवरील उपलब्ध बातम्यांमधून उत्तर शोधले जाईल. माहिती अपुरी असल्यास वेबवरील अतिरिक्त स्रोत तपासले जातील.
